Azərbaycanda şəhid ailələrinə, müharibə əlillərinə qayğı dövlət siyasətinin prioritet istiqamətlərindən biridir
İyulun 21-də Azərbaycan Respublikasının Prezidenti
İlham Əliyev və birinci xanım Mehriban Əliyevanın iştirakı ilə Bakının Xətai
rayonunda şəhid ailələrinə, müharibə əlillərinə mənzillərin və avtomobillərin
təqdim olunması mərasimi keçirildi. Bu, ölkəmizdə şəhid ailələrinə, müharibə
əlillərinə göstərilən diqqət və qayğının daha bir bariz nümunəsidir. Təqdimat
mərasimində də qeyd edildiyi kimi, dövlət tərəfindən həmin binada şəhid
ailələrinə və ölkəmizin ərazi bütövlüyünün, müstəqilliyinin və konstitusiya
quruluşunun müdafiəsi ilə əlaqədar əlilliyi olan şəxslərə 62 mənzil verildi. Bu
mənzillərin 42-si Qarabağ müharibəsi əlilləri, 20-si isə şəhid ailələri üçün
nəzərdə tutulmuşdur. Ümumiyyətlə, bu mənzillər də daxil olmaqla indiyədək şəhid
ailələrinə və müharibə əlillərinə 8018 mənzil və fərdi ev təqdim olunub. Bu
qəbildən olan vətəndaşlarımız təkcə 2019-cu ildə 634 mənzil, 300 fərdi evlə
təmin ediliblər. 2020-ci ildə 700 mənzil və 800 fərdi evin verilməsi nəzərdə tutulub.
İlin əvvəlindən indiyədək 430 mənzil təqdim olunub. 2018-ci ildə 265, 2019-cu
ildə 600 müharibə əlili avtomobillə təmin olunub. Bu dəfə təqdim edilən 50
avtomobil də daxil olmaqla 2020-ci ildə bu qəbildən olan insanlara, ümumilikdə
150 avtomobil verilib. İlin sonunadək isə 400 müharibə əlilinin avtomobillə
təmin olunması planlaşdırılır. Onu da deyək ki, təqdim olunan avtomobillər
yerli istehsal olan "Khazar LX” avtomobilləridir. Bu dəfə verilən 50 avtomobil
də daxil olmaqla indiyədək müharibə əlillərinə 6900 avtomobil təqdim olunub.
Bütün bu sadaladıqlarımız Azərbaycanda şəhid ailələrinə, müharibə əlillərinə
olan qayğının əyani göstəricisidir. Ölkə Prezidenti cənab İlham Əliyevin də nitqində
söylədiyi kimi, "Şəhid ailələrinin, müharibə əlillərinin problemləri daim
diqqət mərkəzindədir və son illər ərzində bu istiqamətdə çox böyük işlər
görülüb. 8 mindən çox şəhid ailəsi, müharibə əlili mənzillərlə təmin edilib və
7 minə yaxın avtomobil verilibdir. Bu il 1500 şəhid ailəsi, müharibə əlili
dövlət tərəfindən mənzillərlə təmin edilir və ediləcəkdir. Bütün mənzillər ən
yüksək keyfiyyətlə tikilən yeni evlərdədir. Eyni zamanda, əlillər üçün 400
avtomobil də nəzərdə tutulur və beləliklə, bu il bu sahədə ən böyük göstəriciyə
nail olunub”. Dövlət başçısının da söylədiyi kimi, "Sosial
xərclərin içində şəhid ailələrini, müharibə əlillərini, müharibə veteranlarını,
məcburi köçkünləri əhatə edən çox böyük proqramlar icra olunur”. Ölkə başçısı
qeyd edib ki, "Bu il 7 mindən çox məcburi köçkün ailəsi mənzillərlə təmin ediləcək.
Özəl sektor da artıq fəaldır və bu il "Kapital Bank” 68 mənzili öz vəsaiti
hesabına bu kateqoriyadan olan insanlara təqdim edib, özəl şirkət – "Paşa
Holdinq” tərəfindən onun vəsaiti hesabına Qobu qəsəbəsində məcburi köçkünlər
üçün 3 şəhərcik inşa edilibdir və orada artıq 4 minə yaxın köçkün ailəsi
məskunlaşıb. Bu, həm ölkəmizdə vətəndaş həmrəyliyinin, dövlət siyasətinin
təzahürüdür, dövlət və özəl sektor tərəfindən bu kateqoriyadan olan insanlara
qayğının əlamətidir”. Ölkə rəhbərinin də dediyi kimi, "Sosial sahədə də çox
böyük işlər görülür. Keçən il şəhid ailələrinin müavinəti 20 faiz artırılıb -
250 manatdan 300 manata çatdırılıb. Köçkünlər üçün müavinətlər 50 faiz
artırılıb, bəzi müavinətlər 100 faiz artırılıb. Bu il pandemiya dövründə
təqribən 5 milyona yaxın insan dövlət tərəfindən maddi dəstəklə əhatə olunub”. Ölkə başçısı koronavirus (COVID-19) pandemiyası
dövründə görülmüş işlərdən də danışıb. Yeni modul tipli xəstəxanaların tikildiyini,
xəstələrin dərmanlarla təchiz edildiyini bir neçə xarici ölkədən mütəxəssislərin,
həkimlərin cəlb edildiyini vurğulayıb. Ölkə başçısı bildirib ki, "Bu il pensiyalar orta
hesabla 27 faiz, orta əməkhaqqı 25 faiz artıb. Bu il 90 min insan ödənişli ictimai iş yerləri ilə
təmin ediləcək. Vəsaitimizin əsas hissəsi enerji sektorundan gəlir. Bu da
Heydər Əliyev neft siyasətinin uğurlu icrası nəticəsində mümkün olubdur”. Dövlət başçısı qeyd edib ki, "Pandemiya dövründə dünyada böhran davam edir.
Dünyanın 150 ölkəsi kredit üçün beynəlxalq maliyyə qurumlarına müraciət edib.
Neftin qiyməti bir neçə dəfə düşüb və gəlirlərimiz buna uyğun olaraq azalıb,
ancaq bir dənə də olsun sosial layihə ixtisar edilməyib. Neftin qiymətinin
azalmasına Ermənistan sevinir, çünki başa düşürlər ki, Azərbaycanın gəlirləri
azalacaq və Ermənistan da bundan faydalanacaq. Özünü milli şura adlandıran,
əslində, antimilli qruplaşma kimi fəaliyyət göstərən dəstə də sevinir,
istəyirlər ki, Azərbaycan onların dövründəki kimi Ermənistan qarşısında aciz,
gücsüz qalsın”. Düşmən isə anlamır ki, bu gün Azərbaycan dünya dövlətləri
arasında həm söz sahibi olan, həm də güclü dövlət kimi tanınır. Bu gün hər kəs
yaxşı bilir ki, Azərbaycanın bugünkü gücünün, şan-şöhrətinin arxasında ulu
öndər Heydər Əliyevin dövlət və xalq üçün göstərdiyi misilsiz xidmətlər, ölkənin
inkişafı naminə həyata keçirdiyi çoxsaylı layihələr dayanır. Bu gün hamı onu da
yaxşı bilir ki, dahi şəxsiyyət Heydər Əliyev hakimiyyətə gəlməsəydi, bu gün
Azərbaycan müstəqil ölkə kimi qalacaqdı-qalmayacaqdı, bu, hələ böyük sualdır.
Amma bizi yenə də o dövrə qaytarmaq istəyirlər. Lakin bu heç zaman mümkün
deyil. Çünki Azərbaycan güclü dövlətdir və onu bütün dünyada layiqincə tanıdan,
təmsil edən güclü lideri var. Ölkə Prezidenti xalq-ordu birliyindən, həmrəyliyindən söz açaraq qeyd edib
ki, "Bizim hərbi qələbəmizi qeyd etmək üçün minlərlə insan küçələrə çıxdı,
minlərlə insan dövlətə, orduya dəstək göstərdi. Ancaq Azərbaycan Xalq
Cəbhəsinin üzvləri bundan istifadə edib iğtişaş yaratmağa cəhd etdilər, bu
əməlləri törədən heç bir adam məsuliyyətdən qaça bilməyəcək. Öz xalqına, öz
Vətəninə bağlı olan adam müharibə gedən vaxtda bunu etməz. İndi Azərbaycan
90-cı illərin Azərbaycanı deyil. Azərbaycan güclü dövlətdir, Azərbaycanın güclü
iqtidarı var, Azərbaycan iqtidarının güclü iradəsi var və ən önəmlisi xalqın
dəstəyi var”. Bəli, ölkəmizdə olan birliyi, həmrəyliyi, xalqın öz dövlətinin, ölkə
rəhbərinin yanında olduğunu, güclü, qüdrətli Azərbaycan Ordusuna və Ali Baş
Komandan İlham Əliyevə arxalandığının şahidi oluruq. Bunu ölkə başçısına
ünvanlanan məktublarda səslənən fikirlərdən də aydın şəkildə görmək olur. Prezident
hər gün minlərlə məktub alır, vətəndaşlar öz dəstəyini ifadə edirlər, həmrəyik
ifadə edirlər, orduda xidmət etmək istəyirlər. Birinci gün cəmi 150 nəfər
könüllü olaraq Səfərbərlik və Hərbi Xidmətə Çağırış üzrə Dövlət Xidmətinin
məntəqələrinə gəlmişdisə, Prezidentin çağırışından bir həftə keçməmiş əlli minə
yaxın insan yazıldı. Ölkə rəhbərinin də vurğuladığı kimi, "Bizim siyasətimiz ədalətli
siyasətdir. Bizim siyasətimiz beynəlxalq hüquqa, tarixi ədalətə söykənir və biz
istədiyimizə nail olacağıq”. Azərbaycan son günlər yaşadığı çətin zamanda təkcə
xalq tərəfindən dəstək görmədi. Qonşu qardaş ölkələr də Azərbaycana dəstək
nümayiş etdirdi. Bu günlərdə heç vaxt olmadığı qədər - nə 1990-cı illərin
əvvəllərində ki, müharibə gedirdi, nə də başqa dövrdə, - çox güclü beynəlxalq
dəstək gördük. İlk dəstək Türkiyədən gəldi. Türkiyənin Prezidenti, Müdafiə
naziri, Xarici İşlər naziri, parlament üzvləri, ictimai xadimlər Azərbaycana
birmənalı dəstək göstərdilər. Türkdilli Dövlətlərin Əməkdaşlıq Şurası
Azərbaycana dəstək göstərmişdir. Bu təşkilatda beş ölkə fəaliyyət göstərir -
Azərbaycan, Türkiyə, Qazaxıstan, Qırğızıstan, Özbəkistan. Onlar bu təşkilatın
üzvləridir və Azərbaycana birmənalı dəstək göstərdilər. Ölkə başçısı BMT-dən sonra ikinci böyük təsisat olan Qoşulmama Hərəkatının
və İslam Əməkdaşlıq Təşkilatının dəstəyindən də danışıb. Qeyd edib ki, "Qoşulmama
Hərəkatı burada 120 ölkə cəmləşir - birmənalı Azərbaycanı dəstəklədi. 57 ölkə
birləşdirən İslam Əməkdaşlıq Təşkilatı bizə birmənalı dəstək oldu. Ermənistan
bütün müsəlman aləminə məxsus olan ibadət yerlərini dağıdır, məhv edir, təhqir
edir. Buna görə də necə ki, biz bütün müsəlman ölkələri ilə həmrəyik, onlardan da eyni
münasibət gözləyirik. Xüsusilə belə həssas günlərdə, həssas məsələdə ki,
Ermənistan bizə hücum edib, bizim mövqelərimizi zəbt etmək istəyir, bizim
hərbçilərimizi, mülki vətəndaşları öldürüb, kəndlərimizi dağıdıb”. Ölkə başçısı bildirib ki, "Azərbaycan Ermənistana başından güclü zərbə
vurandan sonra onlar dərhal Kollektiv Təhlükəsizlik Müqaviləsi Təşkilatına
(KTMT) qaçdılar ki, bunları müdafiə eləsin. Tələb edirdilər ki, KTMT
Azərbaycanı qınayan bəyanat versin. Buna nail ola bilmədilər, heç bir bəyanat
verilmədi. Sadəcə olaraq, bu hadisə ilə bağlı ümumi sözlərdən ibarət bir şərh
verildi. KTMT-nin 6 üzvündən 3-ü beynəlxalq təşkilatlar yolu ilə Azərbaycana
dəstək göstərdilər. Türkdilli Dövlətlərin Əməkdaşlıq Şurasında, eyni zamanda,
KTMT-da üzv olan Qazaxıstan və Qırğızıstan Türkdilli Dövlətlərin Əməkdaşlıq
Şurası vasitəsilə bizə dəstək oldular. Belarus Qoşulmama Hərəkatında təmsil
olunur. O da Qoşulmama Hərəkatının bəyanatına qoşularaq bizə dəstək oldu. Yəni,
altı ölkədən üçü Azərbaycanı birmənalı şəkildə dəstəklədi”. Ölkə başçısı öz çıxışında bir daha vurğuladı ki, "Bütün bu məsələlər bir
daha onu göstərir ki, bu gün Azərbaycan həm beynəlxalq müstəvidə, həm ölkə
daxilində, həm mənfur qonşu ilə mübarizədə çox böyük bir gücə çevrilib. Bunu
biz yaratmışıq, Azərbaycan xalqı yaradıb. Azərbaycan xalqı tam əmin ola bilər
ki, Azərbaycanın müstəqilliyi, azadlığı, insanların rifahı və ölkəmizin
güclənməsi daim diqqət mərkəzində olacaq. Bizim üçün bir nömrəli milli məsələ -
Ermənistan-Azərbaycan Dağlıq Qarabağ münaqişəsinin həllidir. Münaqişənin
yarımçıq həlli bizə lazım deyil. Çünki bu, müvəqqəti olacaq. Yarımçıq, sadəcə,
mərhələ ola bilər. Ancaq məsələnin həlli tam olmalıdır. Azərbaycanın
suverenliyi, ərazi bütövlüyü tam təmin edilməlidir. İşğal edilmiş bütün
torpaqlar istisnasız azad edilməlidir. Azərbaycan vətəndaşları işğal edilmiş
bütün torpaqlara, o cümlədən Şuşaya qayıtmalıdır. Ölkəmizin ərazi bütövlüyü
danışıqlar predmeti deyil, olmayıb, olmamalıdır və olmayacaq. Biz öz doğma
torpaqlarımıza qayıtmalıyıq və qayıdacağıq”.
GOYEZEN.AZ
Dövlətimizin başçısı nitqində son günlər Azərbaycan-Ermənistan
dövlət sərhədinin Tovuz rayonu istiqamətində gedən döyüşlərdən, Azərbaycan
Ordusunun düşmənə verdiyi layiqli cavabdan da söz açıb. Ölkə rəhbəri qeyd edib
ki, "Bu
yaxınlarda Ermənistanın hərbi təxribatı nəticəsində şəhidlərimiz olubdur, qan
tökülüb, o cümlədən mülki vətəndaş həlak olub. Ermənistan ordusu Tovuz
istiqamətində bizim mövqelərimizi, torpaqlarımızın bir hissəsini zəbt etmək
üçün namərdcəsinə, qəflətən artilleriya hücumu təşkil edib və bunun nəticəsində
hərbçilərimiz həlak olub, yaralanıb. Qisas əməliyyatı nəticəsində onlarla
düşmən, onların texnikası məhv edilib”.
Facebook-da paylaş