Ağköynək kəndində səyyar görüş keçirilib
Bu gün 2020-ci ilin ilk səyyar görüşü Ağköynək kənd sakinləri ilə olub. Ölkə
başçısının tapşırıq və tövsiyəsinə əsasən aidiyyatı idarə,
müəssisə və təşkilat rəhbərlərinin iştirakı ilə keçirilən görüşdə yola saldığımız
2019-cu ildə qazanılan uğur və nailiyyətlərdən, həyata keçirilən genişmiqyaslı işlərdən
danışılıb, həmçinin sakinləri narahat edən məsələlər dinlənilib, qayğılarla
maraqlanılıb. Qazax Rayon
İcra Hakimiyyətinin başçısı Rəcəb Babaşov kənd sakinlərini salamlayaraq yenicə
qədəm qoyduğumuz 2020-ci ilin gəlişi münasibətilə təbrik edib, səmimi arzularını
çatdırıb. Yola saldığımız ildə əldə olunan nailiyyətlərin bu il
də uğurla davam etdiriləcəyini bildirib. 2019-cu ildə proqrama uyğun olaraq Ağköynək
kəndində dörd dəfə səyyar görüşdə olduğunu qeyd edən icra başçısı bu cür
görüşlərin mütəmadi olaraq keçiriləcəyini qeyd edib. İcra başçısı bildirib ki,
ötən ildə olduğu kimi, bugünkü görüşün də əsas məqsədi sakinlərin
qayğılarını dinləmək, görüş zamanı qaldırılan məsələlərin, səslənən
fikirlərin həlli istiqamətində əməli işlər görməkdir. Bu görüşün vətəndaşları
narahat edən məsələlərin həllinə yönəldiyini, həmin məsələləri öyrənərək
operativ şəkildə yerindəcə həll etmək, ehtiyac olduğu halda isə aidiyyatı
təşkilatlar qarşısında məsələ qaldırmaqdan ibarət olduğunu bir daha
vurğulamaqdır. Ölkə rəhbərinin də söylədiyi kimi
biz məmurların əsas vəzifəsinin xalqa xidmət olduğunu göstərməkdir. Rayon rəhbəri ölkə
başçısının növbəti dəfə Prezident seçildikdən sonra yürütdüyü məqsədyönlü
siyasətdən, son vaxtlar dövlət məmurları, vətəndaş-məmur münasibətləri haqqında
söylədiyi fikirlərdən, apardığı kadr islahatından, vətəndaşlara göstərdiyi
diqqət və qayğıdan, xüsusilə də əhalinin maddi rifah halının, sosial
vəziyyətinin yaxşılaşdırılması istiqamətində imzaladığı çoxsaylı Fərman və
Sərəncamlardan, Birinci vitse-prezident Mehriban Əliyevanın vətəndaşlara
olan diqqət və qayğısından da söhbət açıb. 2019-cu ilin istər
iqtisadi, istərsə də kadr islahatları ili kimi yadda qaldığını qeyd edən icra
başçısı ölkə rəhbərinin düşünülmüş siyasəti nəticəsində istər 2018-ci ilin
sonları, istərsə də 2019-cu ildə vətəndaşların sosial rifah halının
yaxşılaşdırılması istiqamətində həyata keçirilən iqtisadi islahatlardan danışıb.
Dövlət başçısının verdiyi sözlərin bu gün öz real əksini tapmasını vətəndaşlara
olan ən böyük diqqət və qayğısı kimi göstərib. Respublika Prezidenti tərəfindən
istər ötən ilin sonları, istərsə də 2019-cu ilin əvvəllərində həyata keçirilən
iqtisadi islahatların birbaşa vətəndaş amilinə xidmət edən islahatlar olduğunu
və verilən vədlərin uğurla yerinə yetirilməsi kimi qeyd edib. Həmin
islahatların kökündə əhalinin maddi və sosial rifah halının
yaxşılaşdırılmasının dayandığını söyləyib. Ölkə rəhbərinin iqtisadi islahat
paketinin icrası ilə bağlı imzaladığı mühüm Fərman və Sərəncamlardan danışan
icra başçısı həmin Sərəncamlardan irəli gələn vəzifələrin bu gün də layiqincə
yerinə yetirildiyini bildirib. 2019-cu ilin 18 iyununda imzalanan çoxsaylı
Sərəncamların əhəmiyyətindən danışan rayon rəhbəri istər minimum əməkhaqqının
180 manatdan 250 manata, istər minimum pensiyanın 160 manatdan 200 manata
çatdırılmasını, istər təhsil, istərsə də digər sahələrdə çalışan işçilərin
əməkhaqlarının müvafiq olaraq 20 və 40 faiz artırılmasını ölkə vətəndaşlarının
rifah halının yaxşılaşdırılması istiqamətində atılan ən uğurlu addımlar kimi
dəyərləndirib. Xüsusilə də problemli kreditərin həlli ilə bağlı imzalanan
Fərmanı, ödənişli əsaslarla təhsil alan tələbələrə təqaüdlərin verilməsini
atılan ən humanist addım kimi qeyd edib. Respublika Prezidentinin
diqqət və qayğısı sayəsində yola saldığımız 2019-cu ilin Qazaxda
abadlıq-quruculuq ili kimi, uğur və nailiyyətlərlə zəngin bir il kimi yadda
qaldığını qeyd edən icra başçısı il ərzində xeyli sayda işlərin görüldüyünü
bildirib. İcra başçısı rayon üçün böyük əhəmiyyət daşıyan layihələrin məhz
2019-cu ildə öz müsbət həllini tapdığını bildirib. Rayon
rəhbəri qeyd edib ki, əsas məsələlərdən biri 10 korpusdan ibarət 145 çarpayılıq
Rayon Mərkəzi Xəstəxana Kompleksinin tikintisi idi ki, bu iş yüksək səviyyədə
başa çatdırılıb. Bundan əlavə, yenə də böyük layihələr sayılan su və
kanalizasiya xəttinin və Gəncə-Qazax-Gürcüstan dövlət sərhəddi avtomobil yolunun
çəkilişləridir ki, uğurla davam etdirilir. İcra başçısı Ağköynək və Qarapapaq
kəndlərinin də su və kanalizasiya sisteminin yenidən qurulmasını kənd
sakinlərinə olan dövlət qayğısı kimi göstərib. Görüşdə dövlət
başçısının respublika və yerli əhəmiyyətli yolların yenidən qurulması, ən ucqar
dağ kəndlərinə belə yeni yolların çəkilməsi ilə bağlı imzaladığı çoxsaylı
Sərəncamlara əsasən Qazaxda görülən məqsədyönlü işlərdən də söz açılıb. Son
illər rayonun Qazaxbəyli-Orta
Salahlı-Aşağı Salahlı, Yuxarı Salahlı-Kəmərli, Kosalar, Quşçu Ayrım, Canalı,
Çaylı, Bala Çaylı, Hüseynbəyli, Cəfərli, Daş Salahlı-Ürkməzli-Dəmirçilər kəndlərinə
yeni asfalt yolların çəkilməsi bu sahədə görülən işlərin əyani sübutu kimi qeyd
edilib. Rayon rəhbəri
qəbul edilmiş 5 illik Dövlət Proqramında müxtəlif illər üzrə rayonun İkinci Şıxlı, Xanlıqlar, Fərəhli kəndləri ilə yanaşı Ağköynək və Qarapapaq kəndlərinə də yeni asfalt yol çəkilişlərinin salınmasını bu
sahədə görülən işlərin bundan sonra da uğurla davam etdirilməsi kimi
qiymətləndirib. Ölkə başçısının təhsilə olan yüksək diqqət və
qayğısından söz açan icra başçısı 2019-cu ilin təhsil sahəsində qazanılan
nailiyyətlərlə də yadda qaldığını bildirib. Yola saldığımız ildə məktəb
tikintisi ilə bağlı məqsədyönlü işlər görüldüyünü qeyd edib. İlin əvvəlində
S.Vurğun adına şəhər 2 nömrəli tam orta məktəbin əsaslı yenidənqurmadan sonra
istifadəyə verilməsini, daha sonra "Azərbaycan Respublikası regionlarının
2019–2023-cü illərdə sosial-iqtisadi inkişafı Dövlət Proqramı”nın həyata
keçirilməsi üzrə hazırlanmış tədbirlər planına Qazax rayonu üzrə təmirə
ehtiyacı olan 11 məktəbin salınmasını, həmin məktəblərdən Xalq yazıçısı İsmayıl Şıxlının adını daşıyan 1176
şagird yerlik Kosalar kənd tam orta
məktəbin Heydər Əliyev Fondu tərəfindən əsaslı tikintisini, Ş.Nəsibova adına
Sarıvəlli kənd tam orta məktəbin yenidən tikilməsini, Qaymaqlı kənd tam orta
məktəbin əsaslı təmirini gələcəyimiz olan uşaqlara, eləcə də təhsil sahəsinə
olan diqqət və qayğı kimi qeyd edib. İcra başçısı rayonda
azyaşlı körpələrə göstərilən qayğının, onların sağlam, hərtərəfli və düzgün
böyüməsi, təlim-tərbiyə olunması üçün yaradılan şəraitin 2019-cu ildə də daim
diqqət mərkəzində saxlanıldığını bildirib. 2019-cu ilin əvvəlində 90 yerlik şəhər 6 saylı körpələr evi-uşaq
bağçasının və may ayında Qazaxbəyli kənd uşaq bağçasının istifadəyə
verilməsini bu sahədə görülən işlərin davamı kimi qeyd edib. Ümumiyyətlə, son 3 ildə rayon üzrə olan 25
bağçadan 21-nin müasir standartlara cavab verən səviyyəyə çatdırılmasını
gələcəyimiz olan uşaqlara göstərilən qayğının bariz nümunəsi kimi vurğulayıb. İcra başçısı qeyd edib ki, bu gün bir neçə kənd var ki, bağçanın
açılmasına böyük ehtiyac var. Ağköynək kəndi də həmin kəndlər sırasındadır və
bu sahədə məqsədyönlü işlərin görülməsi nəzərdə tutulub. Bu gün Prezident İlham Əliyev və Birinci vitse-prezident Mehriban
Əliyeva tərəfindən gənclər siyasətinin uğurla davam etdirildiyini qeyd edən icra
başçısı ölkəmizdə gənclərin inkişaf etməsi üçün hər cür imkan və şərait
yaradıldığını bildirib. Respublika Prezidentinin 30 dekabr 2019-cu il tarixli Sərəncamı
ilə 2020-ci ilin "Könüllülər ili” elan edilməsini həmin uğurlu siyasətin və
gənclərə olan qayğının bariz nümunəsi kimi qeyd edib. Rayon rəhbəri Ş.Çobanov
adına Ağköynək kənd tam orta məktəbində təhsil alan yuxarı sinif şagirdlərinin
də könüllülük fəaliyyətinə qoşulmalarını və fəal iştirak etmələrini tövsiyə
edib. Rayon
rəhbəri uzun illərdən bəri mövcud olan su probleminin də zaman-zaman
aradan qaldırıldığını bildirib. Ölkə başçısının bu sahəyə olan qayğısı
sayəsində son illər rayonun Qazaxbəyli, Ürkməzli, Xanlıqlar, Alpout, Kəmərli, Orta Salahlı, Daş
Salahlı, Bala Cəfərli, Ağköynək, Qarapapaq, Çaylı, Bala Çaylı kəndlərinə
içməli su çəkildiyini qeyd edib. Əvvəlki illərdə rayonda suvarma ilə bağlı
görülən işləri, xüsusilə də subartezian quyularının qazılması sahəsində atılan
uğurlu addımları qeyd edən rayon rəhbəri həmin işlərin 2019-cu ildə də davam
etdirildiyini bildirib. Əkin sahələrinin suvarma suyu ilə təminatının
yaxşılaşdırılmasına və əhalinin içməli suya tələbatının ödənilməsinə dair əlavə
tədbirlər haqqında Respublika Prezidentinin 12 fevral 2019-cu il tarixli
Sərəncamını həmin məqsədyönlü işlərin əyani sübutu kimi dəyərləndirib. İcra
başçısı həmin Sərəncama əsasən rayonun Cəfərli, Xanlıqlar, Canalı, Kosalar, Dəmirçilər, Bala Çaylı, Kəmərli,
Qaymaqlı, Aslanbəyli, Aşağı Salahlı və Çaylı kəndlərinin
hər birində 1 ədəd subartezian quyularının qazıldığını qeyd edib. Son 3
ildə rayonda 60-dan artıq subartezian quyusunun qazıldığını, bu işlərin 2020-ci
ildə də davam etdiriləcəyini və Ağköynək kəndində də nəzərdə tutulacağını
vurğulayıb. "Azərbaycan
Respublikası regionlarının 2019–2023-cü illərdə sosial-iqtisadi inkişafı Dövlət
Proqramı”nın təsdiq edilməsi haqqında Prezident İlham Əliyevin 29 yanvar
2019-cu il tarixli Fərmanından söz açan icra başçısı bildirib ki, həmin Dövlət
Proqramı Azərbaycanın növbəti 5 il ərzində daha böyük uğurlar əldə etməsindən
xəbər verir. Rayon rəhbəri həmin Dövlət
Proqramına Kür çayının ətrafında sahilbərkitmə işlərinin aparılması, arxların
beton üzlüyə alınması və bunun kimi bir sıra məsələlərin salındığını vurğulayıb. Rayonda, eləcə də kəndlərdə
elektrik enerjisi və mavi yanacaqla bağlı heç bir problemin olmadığını qeyd
edən rayon rəhbəri bu istiqamətdə görülən işlərdən də söz açıb. Bu gün rayonun
sərhəd kəndləri olan Məzəm, Quşçu Ayrım, Fərəhli, Cəfərli vəBala Cəfərli kəndlərində SİP
kabelləşmə işinin tam başa çatdığını qeyd edib. Digər kəndlərdə olduğu kimi, Ağköynək
kəndində də tam başa çatdırılacağını bildirib. Görüşdə
erkən nikahlarla, eləcə yeni ailə quran gənclərin nikaha daxil olması ilə
əlaqədar olan məsələlərdən, narkomaniya ilə mübarizə sahəsində görülən işlərdən
söhbət açan rayon rəhbəri bu mövzu ilə bağlı istər maarifləndirmə işinin yüksək
səviyyədə təşkil olunmasını, istərsə də ictimai qınağın olmasını, ziyalıların,
ağsaqqalların bu məsələyə münasibət bildirərək xüsusi diqqət ayırmalarını
vurğulayıb. Kənd sakinlərindən Rizvan Mansurov, Şofiq Hacalıyev,
Akifə Hacalıyeva, Vəli Vəliyev, Fidan Yaqubova, Səbinə Murtuzova, Nəzakət
Mansurova, Əlişan Tağıyev, Niyazi İbrahimov, Nihad Musayev, Əli Bayramov, Rafiq
Alıyev, Cəvahir Yusifova, Pərnisə Hacalıyeva və başqaları çıxış edərək onlarla
mütəmadi olaraq görüşə gəldiyinə, diqqət və qayğı göstərdiyinə görə rayon
rəhbərliyinə təşəkkürlərini çatdırıblar. Son illər respublikamızın
bölgələrində, Qazax rayonunda, eləcə də kəndlərdə görülən genişmiqyaslı işlərə
görə ölkə Prezidenti İlham Əliyevə bütün kənd sakinləri adından dərin
minnətdarlıqlarını bildiriblər. Rayonda görülən
işlərdən danışan sakinlər 2019-cu ildə aparılan abadlıq və quruculuğu yüksək
qiymətləndiriblər. Çıxış edənlər sakinlərə göstərdiyi böyük diqqət və qayğıya
görə Prezident İlham Əliyevə, rayon rəhbərliyinə bütün kənd sakinləri adından
bir daha öz dərin minnətdarlıqlarını bildiriblər. Görüşdə minnətdarlıqla
yanaşı, sakinlərin müxtəlif səpkili müraciətləri də dinlənilib. Vətəndaşların
müraciətlərini dinləyən rayon rəhbəri hər bir məsələyə diqqətlə baxılacağını
bildirib. GOYEZEN.AZ
Facebook-da paylaş