Qazaxda Ramazan bayramı münasibətilə xeyriyyə aksiyası keçirilib
Ramazan ayı çərçivəsində Qazax Rayon Mərkəzi Xəstəxanasının
Cərrahiyyə şöbəsində şəhid ailələri, Qarabağ əlilləri və aztəminatlı ailələrin
övladlarının xeyriyyə (sünnət) aksiyası təşkil olunub. Qazax
Rayon Mərkəzi Xəstəxanasının Cərrahiyyə şöbəsinin cərrahı Binyamin
Abbasəliyevin təşəbbüsü ilə hər il ənənəvi olaraq keçirilən
və 15 gün davam edən tibbi aksiyaya 3 həkim-cərrah, 3 reanimatoloq, 1 həkim-laborant,
eləcə də şöbənin bütün həkimləri və tibbi personalı cəlb edilib. Əməkdaşlar tərəfindən
xəstələrə ambulator baxış keçirilib, sonra onlara göstəriş üzrə sünnət
əməliyyatı aparılıb. Əməliyyatlar sanitar-gigiyenik
qaydalara tam əməl olunmaqla keçirilib. Aksiya çərçivəsində
ümumilikdə 239 uşaq sünnət edilib. Bu gün
xeyriyyə aksiyası münasibətilə tədbir təşkil olunub. Tədbirdə Qazax Rayon İcra
Hakimiyyətinin başçısı Rəcəb Babaşov, icra aparatının məsul şəxsləri, idarə,
müəssisə və təşkilat rəhbərləri, səhiyyə işçiləri, məktəb direktorları, ağsaqqallar,
ziyalılar, Qarabağ əlilləri
və şəhid ailələri, sünnət olunacaq uşaqlar və onların valideynləri, KİV nümayəndələri
iştirak ediblər. Tədbirin aparıcısı, Azərbaycan Rəssamlar İttifaqının üzvü, gənc rəssam Akif Əmirov tədbiri açıq elan edərək əlamətdar gün münasibətilə təbriklərini çatdırıb və
sözü rayon rəhbərliyinə verib Qazax Rayon İcra Hakimiyyətinin başçısı Rəcəb Babaşov çıxış edərək ölkə
Prezidenti İlham Əliyev və ailə üzvləri başda olmaqla bütün Azərbaycan xalqını,
rayon sakinlərini və tədbir iştirakçılarını müqəddəs Ramazan bayramı münasibətilə
səmimi qəlbdən təbrik edib. Xalqımıza sülh, əmin-amanlıq və firavan günlər
arzulayıb. Ölkə başçısı İlham Əliyevin diqqət və qayğısı sayəsində respublikamızın
bütün bölgələrinin, o cümlədən də Qazaxın gündən-günə inkişaf etdiyini
bildirib. Rayon rəhbəri Qazaxda bütün sahələrlə yanaşı səhiyyə sahəsinin də
inkişaf etdiyini diqqətə çatdırıb. Respublika Prezidenti İlham Əliyevin bölgələrdə
səhiyyə sahəsinə olan diqqət və qayğısının bariz nümunəsi kimi rayonda inşa
olunan 145 çarpayılıq mərkəzi xəstəxananın tikintisini göstərib. Rayonda vətəndaşlara
səhiyyə sahəsində göstərilən xidmətlərdən söz açan icra başçısı bu sahənin daim
diqqət mərkəzində saxlanıldığını və həkimlərin üzərilərinə düşən vəzifələrin
öhdəsindən layiqincə gəldiklərini vurğulayıb. İcra başçısı cərrah B.Abbasəliyevin
təşəbbüsü ilə baş tutan aksiyanı yüksək qiymətləndirib və əziyyəti keçən hər
bir işçiyə rayon ictimaiyyəti adından minnətdarlığını bildirib. Rayon Mərkəzi Xəstəxanasının baş həkim əvəzi Sevda Məmmədova çıxış edərək
səhiyyə sahəsinə dövlət səviyyəsində göstərilən diqqət və qayğıdan söz açıb. Bu
cür aksiyaların təşkil olunmasını onlara göstərilən qayğıya bir töhfə olduğunu
qeyd edib. Müsəlman olan bütün uşaqları və onların valideynlərini təbrik edib,
xoş arzularını çatdırıb. "Azərbaycan Qarabağ Müharibəsi Əlilləri, Veteranları və Şəhid Ailələri”
İctimai Birliyinin Qazax rayon şöbəsinin sədr müavini, I qrup Qarabağ müharibəsi
əlili Namiq Alıyev, şəhid ailəsi Kifayət Mustafayeva çıxışı zamanı şəhid ailələrinə,
Qarabağ müharibəsi əlillərinə və veteranlarına göstərilən qayğıya görə ölkə
başçısı İlham Əliyevə, Birinci vitse-prezident Mehriban xanım Əliyevaya və
rayon rəhbərliyinə minnətdarlıqlarını bildiriblər. İstər şəhid ailələrinin, istərsə
də Qarabağ müharibəsi əlilləri və veteranlarının dövlətin və onun rəhbərinin
qayğısını hər an hiss etdiklərini vurğulayıblar. Heydər Əliyev Fondunun təşkilatçılığı
ilə açılan iftar süfrəsinin, eləcə də bu cür aksiyanın təşkil olunmasını yüksək
qiymətləndiriblər. Tədbirdə iştirak edən Azərbaycan
Respublikasının Əməkdar mədəniyyət işçisi Zəminə Xınalı çıxış edərək müqəddəs
bir ayda təşkil olunan aksiyanı yüksək qiymətləndirdiyini söyləyib və aksiyanın
təşkilatçılarına, xüsusilə də cərrahiyyə şöbəsinin kollektivinə təşəkkürlərini
çatdırıb. Gələcəyin əsgəri olan bu uşaqların əsl müsəlman olmaları üçün
atdıqları addımı ən xeyirxah əməl kimi dəyərləndirib. Sonra Qazax Rayon İcra Hakimiyyətinin
başçısı Rəcəb Babaşov sünnət olunacaq uşaqlara hədiyyələr təqdim edib. Daha sonra rayon rəhbərliyi sünnət olunmuş uşaqlara baş çəkib, hədiyyələr təqdim
edərək valideynlərinə bir daha gözaydınlığı verib. Valideynlərdən Cəfərli
kəndində yaşayan məcburi köçkün Gülbəniz Quliyeva çıxış edərək bildirib ki, hər bir müsəlman oğlan övladını sünnət etdirməlidir. Bu, çox vacibdir.
Bu gün rayonun bütün aztəminatlı ailələrinə belə bir imkan yaradılıb. Mən də bu
imkandan yararlandım. O, xeyriyyə aksiyasının bütün iştirakçılarına təşəkkür
edib. GOYEZEN.AZ
Qazax Rayon Mərkəzi Xəstəxanasının Cərrahiyyə şöbəsinin cərrahı Binyamin
Abbasəliyev çıxış edərək 2001-ci ildən bu cür aksiyaları həyata keçirdiyini
bildirib. Ramazan bayramı münasibətilə təşkil olunan bu aksiyada artıq 201 nəfər
uşağın sünnət olunduğunu, bu gün isə daha 38 uşağın olunacağını qeyd edib.
B.Abbasəliyev bildirib ki, həkim kollektivimizin
məqsədi hər zaman xalqımıza yüksək xidmət göstərmək və bizə müraciət edən hər
bir kəsin alınan nəticələrdən razı qalmasını təmin etməkdir. O, bu cür xeyriyyə
aksiyalarının il ərzində növbəti bayramlarda da həyata keçiriləcəyini
vurğulayıb və bütün cərrah həkimlərə bu cür addımlar atmağı tövsiyə edib.
Bugünkü tədbirin təşkilinə görə rayon rəhbərliyinə və əməyi keçən insanlara
minnətdarlığını bildirib.
Facebook-da paylaş