Cəfərli kənd sakinləri ilə səyyar görüş keçirilib
"Azərbaycan
vətəndaşları əmin ola bilərlər ki, ən ağır məqamlarda dövlət onların
yanındadır. Dövlət orqanları, mərkəzi və yerli icra orqanlarının nümayəndələri
daim vətəndaşlara qayğı, diqqət göstərməlidirlər, daim vətəndaşların yanında
olmalıdırlar. Müvafiq icra orqanlarının rəhbərlərinə və məsul şəxslərə göstəriş
verildi ki, onlar daim vətəndaşların problemləri ilə məşğul olmalıdırlar. İcra
başçıları qəsəbələrdə, kəndlərdə olmalıdırlar, vətəndaşların problemlərini
eşitməlidirlər, onlara biganə qalmamalıdırlar, onlara şərait yaratmalıdırlar,
onlara dəstək olmalıdırlar, kömək göstərməlidirlər. Bu sahədə çox ciddi
islahatlar aparılır və aparılacaq”. Respublika
Prezidenti İlham Əliyevin sədrliyi ilə Nazirlər Kabinetinin 2019-cu ilin
birinci rübünün sosial-iqtisadi inkişafının yekunlarına və qarşıda duran vəzifələrə
həsr olunan iclasda ölkə başçısı tərəfindən söylənilən bu fikirlər bir daha
sübut etdi ki, müstəqil Azərbaycan dövlətində vətəndaş amili hər zaman ön
planda olub. Bu gün tam əminliklə deyə bilərik ki, Qazaxda
vətəndaş amili hər zaman diqqət mərkəzində saxlanılır. Son 3 ildə ölkə
başçısının tapşırığına əsasən sakinlərlə keçirilən səyyar görüşlər, fərdi
qəbullar, vətəndaşların müraciətlərinə yerində baxış keçirilməsi dövlət
başçısının siyasətinin əsasını təşkil edən vətəndaş amilinin ön planda
olmasından xəbər verir. Ölkə rəhbərinin tapşırıq və
tövsiyəsinə uyğun olaraq hər həftə aidiyyəti idarə, müəssisə və təşkilat
rəhbərlərinin iştirakı ilə keçirilən növbəti görüş bu gün sərhəddə yerləşən Cəfərli kənd sakinləri ilə olub. Əvvəlki
görüşlərdə olduğu kimi, bu görüşdə də ölkə başçısının yürütdüyü məqsədyönlü
siyasətdən, verdiyi tapşırıq və tövsiyələrdən söhbət açılıb, eləcə də Qazaxda
qazanılan uğur və nailiyyətlərdən, həyata keçirilən işlərdən, qarşıda duran
vəzifələrdən danışılıb. Qazax Rayon İcra
Hakimiyyətinin başçısı Rəcəb Babaşov çıxış edərək bildirib ki, hər bir
görüşdə olduğu kimi, bugünkü görüşün də əsas məqsədi siz sakinləri narahat edən
məsələləri öz dilinizdən eşitmək və həlli istiqamətində əməli işlər
görməkdir. Həlli mümkün olan məsələləri operativ şəkildə yerindəcə həll
etmək, ehtiyac olduğu halda isə aidiyyəti təşkilatlar qarşısında məsələ
qaldırmaqdır. İcra
başçısı bildirib ki, 2019-cu ilin birinci rübünün yekunlarına və qarşıda duran
vəzifələrə həsr olunmuş iclasda ölkə başçısının məmurlarla bağlı söylədiyi
fikirlər bir daha onu göstərdi ki, dövlət hər zaman öz vətəndaşının, xalqının
yanında olmalıdır. Çünki ölkə başçısının hər dəfə çıxışları zamanı söylədiyi
"Xalqa xidmət göstərilməlidir” cümləsi bu gün dövlətimizin siyasətinin
prioritet istiqamətlərindən birini təşkil edir. Odur ki, Prezident İlham
Əliyevin siyasətinin əsasını təşkil edən vətəndaş amilini Qazax rayonunda ön
plana çəkmək, həmin siyasəti olduğu kimi icra etmək, siz vətəndaşlara qayğı ilə
yanaşmaq hər bir dövlət məmurunun vəzifə borcu olmalıdır. Rayon rəhbəri
bildirib ki, bu gün xidmət sahələrində çalışan hər bir idarə, müəssisə və
təşkilat rəhbəri, eləcə də rəhbərlik etdikləri kollektivlər birmənalı şəkildə
bilməlidirlər ki, vətəndaş mövqeyi hər şeydən üstün tutulmalıdır. Onlar öz
davranışları, hərəkətləri, siz sakinlərə olan diqqət və qayğıları ilə nümunə
olmalıdırlar. Göstərdikləri xidmətlərdə çalışmalıdırlar ki, vətəndaş razı
qalsın. Çünki ölkə başçısının siyasətinin əsasında xalqa xidmət dayanır. Bütün
xidmət sahələrinin rəhbərləri dövlət başçısının istəyinə uyğun xidmət
göstərməlidirlər. Rayon rəhbəri ötən ilin
axırları və bu ilin əvvəlində ölkə rəhbəri tərəfindən imzalanan fərman və
sərəncamlardan, həyata keçirilən uğurlu layihələrdən də söz açıb. Qeyd edib ki,
əmək haqqının, təqaüdlərin, şəhid ailələrinə, müharibə əlillərinə, veteranlarına,
tələbələrə verilən təqaüdlərin artırılması, eyni zamanda, ödənişli əsaslarla
təhsil alan tələbələrə belə təqaüdlərin verilməsi, problemli kreditlərin həll
olunması və bunun kimi onlarla işlər bir daha göstərdi ki, bütün işlərin
təməlində vətəndaşların rifah halının yaxşılaşdırılması dayanır. İmzalanmış
mühüm sərəncamlar onu sübut etdi ki, ölkə vətəndaşını narahat edən ən kiçik
məsələyə belə xüsusi həssaslıqla yanaşılır. Hər bir ölkə vətəndaşına heç bir
fərq qoyulmadan eyni diqqət və qayğı göstərilir. Son illər Azərbaycanda,
eləcə də bütün bölgələrimizdə genişmiqyaslı quruculuq işlərinin aparıldığını
qeyd edən rayon rəhbəri 3 il ərzində Qazaxda da xeyli sayda işlərin
görüldüyünü bildirib. İcra başçısı qeyd edib ki, bu illər ərzində görülən
işlərə nəzər salsaq aydın şəkildə görərik ki, rayonumuzda bütün sahələrdə -
kənd təsərrüatında, sosial obyektlərin inşasında, yeni iş yerlərinin
yaradılmasında, sənayeləşmədə uğurlu nəticələr əldə edilib. Rayonda təhsil,
səhiyyə, mədəniyyət, eləcə də digər sahələrdə əldə olunan nailiyyətlərdən danışan
rayon rəhbəri bu sahələr üzrə qazanılan uğurların ildən-ilə artdığını qeyd
edib. Kənd təsərrüfatında əldə
olunan uğurlardan danışan rayon rəhbəri ötən bu müddət ərzində əkin sahələrinin
artırılaraq 16 mindən 22 min hektara çatdırıldığını vurğulayıb. Bundan əlavə,
kartof sahəsinin 433 hektardan 1200 hektara, tütün sahəsinin 10 hektardan 65
hektara çatdırıldığını bildirib. Qeyd edib ki, əgər 2016-cı ildə 7800 hektar
sahədə taxıl əkilmişdisə, 2019-cu ildə bu rəqəm artırılaraq 13180 hektara
çatdırıldı. Baramaçılıqda da uğurlu göstəricilərin əldə olunduğunu qeyd edən
rayon rəhbəri qeyd edib ki, bu il artıq 4 il olacaq ki,
rayonda barama yetişdiriləcək. Bu sahədə görülən məqsədyönlü işlərin nəticəsidir
ki, rayonumuzda barama istehsalı da ildən-ilə artmaqdadır. 2016-cı ildə
1502 kq, 2017-ci ildə 4623 kq olmuşdur. Ötən il isə rayon üzrə qazaxlı kümçülər
tərəfindən 5000 kq yaş baramanın yetişdirilməsi nəzərdə tutulduğu
halda, 6260 kq yaş barama istehsal olunaraq Şəki şəhərində "Azəripək”
ASC-yə təhvil verilmişdir. Rayon rəhbəri bu il də barama
istehsalında artımın olacağını bildirib. İcra başçısı bildirib ki, bütün bunlar
isə əkin sahəsinin artımı ilə yanaşı, həm də yeni iş yerlərinin açılması, işçi
qüvvəsinin artırılması deməkdir. Yeni iş yerlərinin açılması istiqamətində görülən işlərdən
danışan icra başçısı ölkə prezidentinin təşəbbüsü ilə yaradılmış "DOST İş
Mərkəzi” MMC tərəfindən Qazax rayonu üzrə 420 yeni iş yeri verildiyini
bildirib. Səhiyyə sahəsində qazanılan
uğurlardan danışan icra başçısı rayonda inşa olunan mərkəzi xəstəxana binasının
tikintisini bu sahənin inkişafı istiqamətində atılan ən uğurlu addım kimi
qiymətləndirib. Qeyd edib ki, "Azərbaycan Respublikası regionlarının
2019–2023-cü illərdə sosial-iqtisadi inkişafı Dövlət Proqramı”nın həyata
keçirilməsi üzrə hazırlanmış tədbirlər planında 145 çarpayılıq rayon
mərkəzi xəstəxanasının qalan 5 korpusunun inşasının öz əksini tapması dövlətin
və dövlət başçısının bu sahəyə olan diqqət və qayğısı deməkdir. Eyni zamanda,
bu gün qalan 5 korpusun tikintisinin davam etdirilməsi həm də rayon
sakinlərinin işlə təmin olunması baxımından böyük əhəmiyyət kəsb edir. Təhsil sahəsində qazanılan
uğurlardan danışan rayon rəhbəri ötən il qəbul imtahanlarının nəticələrinə görə
rayonumuzun 3-cü yerdə olduğunu vurğulayıb. Ölkə prezidenti İlham
Əliyev tərəfindən imzalanan fərman və sərəncamlardan söz açan icra başçısı qeyd
edib ki, 2018-ci ilin axırı, 2019-cu ilin əvvəli Qazax rayonu üçün də əlamətdar
hadisələrlə zəngin oldu. Sevindirici hal isə odur ki, hər iki sərəncam
ziyalılarımızla bağlı oldu. 3 noyabr 2018-ci il tarixli sərəncamda Qazax
müəllimlər seminariyasının, 28 yanvar 2019-cu il tarixli sərəncamda Xalq
yazıçısı İsmayıl Şıxlının 100 illik yubileylərinin respublika səviyyəsində qeyd
olunması öz əksini tapdı. Bu, dövlət başçısının qazaxlı ziyalılara verdiyi
dəyərin ən bariz nümunəsidir. İcra başçısı bu gün həmin ali sərəncama əsasən
yubiley tədbirlərinə xüsusi hazırlıq işlərinin getdiyini və silsiləli şəkildə
davam etdiyini diqqətə çatdırıb. İcra başçısı qeyd edib ki,
hər birinizə yaxşı məlumdur ki, Qazaxda uzun illərdən bəri həlli vacib olan
məsələlərdən biri rayonun su-kanalizasiya sisteminin çəkilməsi idi. Artıq bu
məsələ də ölkə başçısının diqqət və qayğısı sayəsində öz müsbət həllini tapıb
və çəkilişlər davam edir. Rayon rəhbəri bu sahədə işlərin keyfiyyətlə
aparılması üçün rayon ziyalılarından, idarə, müəssisə və təşkilat
rəhbərlərindən, aidiyyəti şəxslərdən ibarət işçi qrupunun yaradıldığını və
həmin işlərə nəzarət edildiyini də diqqətə çatdırıb. İcra başçısı bildirib ki,
fəaliyyətə başladığım ilk gündən fərqli yanaşdığım sahələrdən biri də rayonda
azyaşlı körpələrə göstərilən diqqət və qayğıdır. Hər kəsə yaxşı məlumdur ki,
uşaqların sağlam, hərtərəfli və düzgün böyüməsi, təlim-tərbiyə olunması üçün
hər cür şərait yaradılır. Bu sahədə məqsədyönlü işlər həyata keçirilir. Yeni
uşaq bağçaları tikilir və yaxud da əsaslı şəkildə təmir olunaraq yenidən
qurulur. Müasir inventar və avadanlıqlarla təmin edilir. Rayonda olan 25
uşaq bağçasından 17-nin tam müasir standartlara cavab verən səviyyəyə
çatdırılması bu dediklərimizin bariz nümunəsidir. Həmin təmirli bağçalardan
biri də Cəfərli kənd uşaq bağçasıdır. Rayon rəhbəri hazırda Qazaxbəyli kənd
uşaq bağçasının da əsaslı şəkildə təmir olunduğunu bildirib. İcra başçısı vurğulayıb ki,
bu gün rayonda bütün sahələrlə yanaşı, çoxmənzilli yaşayış binalarının təmiri
də diqqət mərkəzində saxlanılır. Dövlət başçısı İlham Əliyevin imzaladığı
çoxsaylı sərəncamlara əsasən rayonda mövcud olan 163 çoxmənzilli yaşayış
binasından artıq 100-dən çoxunun təmir olunaraq sakinlərin istifadəsinə
verilməsi də bu istiqamətdə görülən işlərin əyani sübutudur. Rayon rəhbəri
dövlət başçısının respublika və yerli əhəmiyyətli yolların yenidən qurulması,
ən ucqar dağ kəndlərinə belə yeni yolların çəkilməsi ilə bağlı imzaladığı
çoxsaylı sərəncamlara əsasən Qazaxda görülən məqsədyönlü işlərdən də söz açıb.
Son illər rayonun Qazaxbəyli-Orta Salahlı-Aşağı Salahlı, Yuxarı
Salahlı-Kəmərli, Kosalar, Quşçu Ayrım, Canalı, Çaylı, Bala Çaylı, Hüseynbəyli,
Cəfərli kəndlərinə yeni asfalt yolların çəkilməsini bu sahədə
görülən işlərin əyani sübutu olduğunu bildirib. 2018-ci ildə yol
infrastrukturu ilə bağlı görülən işlərin 2019-cu ildə də uğurla davam
etdirildiyini və Dövlət Proqramında da öz əksini tapdığını qeyd edib. Hazırda
uzunluğu 16 km olan Daş Salahlı-Ürkməzli-Dəmirçilər kənd
yolunun yenidən qurulmasını bu dediklərimizin əyani sübutu olduğunu bildirib.
Rayon rəhbəri qeyd edib ki, Qazax rayonunun Daş Salahlı–Ürkməzli–Dəmirçilər
avtomobil yolunun tikintisi ilə bağlı tədbirlər haqqında Respublika Prezidentinin 22 aprel 2019-cu il tarixli sərəncamı bir daha sübut etdi ki, yol infrastrukturunun yenidən qurulması istiqamətində
görülən işlər bundan sonra da uğurla davam etdiriləcəkdir. İcra başçısı Gəncə-Qazax-Gürcüstan dövlət sərhəddi avtomobil
yolunun çəkilişi ilə bağlı görülən işlərdən də danışıb. Rayon
rəhbəri uzun illərdən bəri mövcud olan su probleminin də zaman-zaman
aradan qaldırıldığını bildirib. Ölkə başçısının bu sahəyə olan qayğısı sayəsində son
illər rayonun Qazaxbəyli, Ürkməzli, Xanlıqlar, Alpout, Kəmərli, Orta
Salahlı, Daş Salahlı, Bala Cəfərli, Ağköynək, Qarapapaq, Çaylı, Bala Çaylı kəndlərinə
içməli su çəkildiyini qeyd edib. Əvvəlki illərdə rayonda suvarma ilə bağlı
görülən işləri, xüsusilə də subartezian quyularının qazılması sahəsində atılan
uğurlu addımları qeyd edən rayon rəhbəri həmin işlərin 2019-cu ildə də davam
etdiriləcəyini bildirib. Əkin sahələrinin suvarma suyu ilə təminatının
yaxşılaşdırılmasına və əhalinin içməli suya tələbatının ödənilməsinə dair əlavə
tədbirlər haqqında Respublika Prezidentinin 12 fevral 2019-cu il tarixli sərəncamını
həmin məqsədyönlü işlərin əyani sübutu kimi dəyərləndirib. İcra başçısı
həmin sərəncama əsasən rayonun Cəfərli,
Xanlıqlar, Canalı, Kosalar, Dəmirçilər, Bala Çaylı, Kəmərli, Qaymaqlı,
Aslanbəyli, Aşağı Salahlı və Çaylı kəndlərinin
hər birində 1 ədəd subartezian quyularının qazılacağını bildirib. Rayon rəhbəri
həmin kəndlərdən birinin məhz Cəfərli kəndi olduğunu qeyd edərək yeni
subartezian quyusunun qazılmasını suvarma ilə bağlı problemin aradan
qaldırılması kimi qiymətləndirib. Son 3 ildə rayonda 41 ədəd subartezian
quyusunun qazıldığını qeyd edib. Rayonda, eləcə
də kəndlərdə elektrik enerjisi və mavi yanacaqla bağlı heç bir problemin olmadığını
qeyd edən rayon rəhbəri bu istiqamətdə görülən işlərdən də söz açıb. Bu gün
rayonun sərhəd kəndləri olan Məzəm, Quşçu
Ayrım, Fərəhli, Cəfərli və Bala Cəfərli kəndlərində
SİP kabelləşmə işinin başa çatdığını qeyd edib. Bu işlərin bundan sonra da
davam etdiriləcəyini bildirib. Rayon rəhbəri qeyd edib ki,
respublikamızın bütün bölgələri, o cümlədən də Qazax ölkə başçısının uğurlu və
məqsədyönlü siyasəti nəticəsində gündən-günə inkişaf edir. Bütün sahələr üzrə
uğurlu nəticələr əldə olunur. Bütün bu uğurları isə nəinki biz ölkə
vətəndaşları, həm də ölkəmizdə fəaliyyət göstərən diplomatik nümayəndəliklər də
əyani şəkildə görür. İcra başçısı qeyd edib ki, Prezident Administrasiyasının
və Xarici İşlər Nazirliyinin təşkilatçılığı ilə aprelin 30-da rayonumuza təşkil
edilən səfərin məqsədi də ölkəmizin regionlarının inkişafını və bu xüsusda,
bölgələrdə həyata keçirilən sosial və iqtisadi layihələri göstərmək, habelə
turizmin inkişafı ilə yerində tanış etmək idi. Ölkəmizin qərb qapısı sayılan Qazaxda
qonaq olan, 40-dan çox ölkəni və beynəlxalq təşkilatları təmsil edən diplomatlar
və onların xanımları Qazaxın timsalında bir daha əmin oldular ki, Azərbaycanın
bütün bölgələri özünün intibah dövrünü yaşayır. Bu inkişafın təməlində də ölkə
başçısının uzaqgörən siyasəti və gərgin əməyi dayanır. Kənd ağsaqqallarından Sabir Vəliyev, Seyfəddin
Vəliyev, sakinlərdən Ələkbər Heydərov, Məzahir Mustafayev, Ramin Məmmədov,
Fərhad Məmmədrzayev, Elməddin Allahverdiyev, Murad Musayev, Almaz Məmmədova,
İlham Aşırov, Ədalət Qarasaqqalov, Əfqan Vəliyev, Ruslan Tağıyev və başqaları
çıxış edərək onlarla mütəmadi olaraq görüşə gəldiyinə, kənd sakinlərinə diqqət
və qayğı göstərdiyinə görə rayon rəhbərliyinə təşəkkürlərini çatdırıblar.
Kənddə son 3 il ərzində görülən işlərdən danışan kənd sakinləri qeyd ediblər
ki, kəndimizdə yerləşən 20 yerlik uşaq bağçası neçə illər idi ki, çox bərbad
vəziyyətə düşmüşdü, otaqlar darısqal və təmirsiz idi. Sizin tapşırığınıza
əsasən bağça binası əsaslı şəkildə təmir edilərək yenidən quruldu, hər cür
avadanlıqlarla təmin olunaraq uşaqların istifadəsinə verildi. Bundan əlavə, kənd
əhalisinin uzun illərdən bəri həsrətində olduğu yol problemi ölkə başçısının
qayğısı nəticəsində öz müsbət həllini tapdı. Ölkə başçısı İlham Əliyevin
qayğısı sayəsində kəndə yüksək keyfiyyətli asfalt yol çəkildi. Bu, ölkə başçısının
sərhəd kəndində yaşayan biz sakinlərə ən böyük töhfəsidir. Bundan əlavə,
qaldırdığımız ən kiçik məsələyə belə xüsusi həssaslıqla yanaşılması onu sübut
edir ki, doğrudan da ölkəmizdə vətəndaş amili, xalqa olan qayğı ön planda saxlanılır.
Biz sakinlər ölkə başçısının çıxışları zamanı söylədiyi fikirlərdən də aydın
şəkildə görürük, şahidi oluruq. Çıxış edənlər sərhəd kəndinin sakinlərinə
göstərdiyi böyük diqqət və qayğıya görə Prezident İlham Əliyevə bütün kənd
sakinləri adından öz dərin minnətdarlıqlarını bildiriblər. Görüşdə minnətdarlıqla
yanaşı, sakinlər onları narahat edən bir sıra məsələlərdən də söz açıblar.
Sakinlər tərəfindən səsləndirilən internetin sürətinin zəif olması, qəzalı
vəziyyətdə olan telefon dirəyinin dəyişdirilməsi, kənddə əlavə artezian
quyusunun qazılması, güzəştli gübrə ilə təmin olunma və s. məsələ ilə bağlı
müraciətləri dinləyən rayon rəhbəri hər bir məsələyə diqqətlə baxılacağını
bildirib. Sonra Rayon İcra Hakimiyyətinin başçısı Rəcəb
Babaşov kənd uşaq bağçasında olub, körpələrə göstərilən xidmətlə, diqqət və
qayğı ilə maraqlanıb.
GOYEZEN.AZ
Facebook-da paylaş