Cənab Prezident İlham Əliyevin ölkəmizdə yürütdüyü uğurlu dövlət siyasətinin əsasını vətəndaş amilinin təşkil etməsi, ölkə rəhbərliyinin vətəndaşlara olan qayğısı dövlət məmurlarına örnək olmaqla yanaşı, həm də gələcək fəaliyyətlərində yol xəritəsi olmalıdır. Ölkə başçısının, Birinci vitse-prezident Mehriban xanım Əliyevanın xalqın, vətəndaşların arasında olmaları, onların müraciətlərini, istəklərini dinləmələri, qayğı ilə yanaşmaları bir daha onu sübut edir ki, həyata keçirilən tədbirlərin, atılan bütün addımların arxasında vətəndaş məmnunluğu dayanır.

Dövlət siyasətinin əsasını təşkil edən vətəndaş amili Qazaxda da hər zaman örnək götürülür. Dövlət başçısının rəhbər vəzifəli şəxsləri qəbul edən zaman dövlət məmurlarına daim vətəndaşlarla təmasda olmaları, bütün kəndləri gəzmələri, kənd camaatı ilə görüşmələri, vətəndaşların ərizə və müraciətlərinə, onları narahat edən problemlərə həssaslıqla yanaşılması barədə aidiyyəti üzrə verdiyi tapşırıq və tövsiyələr rayonda olduğu kimi icra edilir. Həyata keçirilən bütün işlərdə vətəndaş məmnunluğunun təmin edilməsinə üstünlük verilir. Rayon rəhbərinin vətəndaşlara göstərdiyi qayğı, sakinlərin qaldırdıqları hər bir məsələyə daim həssaslıqla yanaşması, ən əsası da illər öncə qoyulan ənənənin bu gün də davam etdirilməsi bu dediklərimizin bariz nümunəsidir.

Qazax Rayon İcra Hakimiyyətinin başçısı Rəcəb Babaşovun fəaliyyətə başladığı ilk gündən Qazaxda şəhid ailələri, Qarabağ müharibəsi əlilləri, veteranları, məcburi köçkün ailələri ilə yanaşı, sərhəddə yaşayan sakinlərə də daim qayğı ilə yanaşılır. Rayon rəhbəri mütəmadi olaraq sərhəddə yerləşən kəndlərdə olur, sakinlərlə görüşərək onları hər zaman diqqət mərkəzində saxlayır.

İyunun 9-da Qazax Rayon İcra Hakimiyyətinin başçısı Rəcəb Babaşov icra aparatının məsul şəxsləri və rayonun hüquq-mühafizə orqanlarının rəhbərləri ilə birlikdə sərhəddə yerləşən Məzəm kəndində yaşayan sakinlərin müraciətlərinə əsasən sözügedən kənddə olub.

Kənd sakinləri ilə səmimi söhbət edən rayon rəhbəri dövlətin, ölkə başçısının hər zaman onların yanında olduğunu diqqətə çatdırıb. Bugünkü gəlişin kökündə də vətəndaş məmnunluğunun dayandığını söyləyib. Rayon rəhbəri sakinlərin qayğıları, hansısa çətinliklərinin olub-olmaması ilə maraqlanıb, kənddə qazın və elektrik enerjisinin verilişində olan mövcud vəziyyəti öyrənib. Rayon rəhbərliyinə kənddə istər qaz, istərsə də elektrik enerjisi ilə bağlı hər hansı bir problemin olmadığı bildirilib. Həmçinin, sakinlərə Qazaxın işğaldan azad olunmuş 4 kənddə minatəmizləmə işlərinin hələ də davam etdirildiyini nəzərə alaraq sərhədə yaxın ərazilərdə təhlükəsizlik tədbirlərinə ciddi riayət etmələri tövsiyə edilib.

Sakinlər onlarla görüşə gəldiyinə, qayğıları ilə maraqlandığına və göstərdiyi qayğıya görə rayon rəhbərliyinə razılıqlarını ifadə ediblər. Ölkəmizdə vətəndaşlara, şəhid ailələrinə, qazilərə göstərilən qayğıya görə Prezident İlham Əliyevə, Birinci vitse-prezident Mehriban xanım Əliyevaya, rayon rəhbərliyinə dərin minnətdarlıqlarını bildiriblər.