“Həmrəylik kuboku” uğrunda basketbol turniri keçirilib
Azərbaycan
Respublikasının Gənclər Fondunun elan etdiyi XI qrant müsabiqəsində qaliblərdən
biri olan Elmar Rzalının icra etdiyi "Həmrəylik kuboku” məktəblilər arasında
basketbol turniri” layihəsi uğurla icra olunub. 12-14 fevral tarixlərində baş
tutan turnirə rayon məktəbliləri qatılıb. Qazax Olimpiya İdman Kompleksində
keçirilən turnirdə rayonun 8 orta ümumtəhsil məktəbinin VII-XI sinif
şagirdlərindən təşkil olunmuş komandalar iştirak edib. Layihə rəhbəri
Elmar Rzalı layihə haqqında ətraflı məlumat verərək qeyd edib ki, layihənin
icrasının başlıca məqsədi basketbol idman növünü təbliğ etmək, yeniyetmə və
gənclərin sağlam həyat tərzinə yiyələnməsinə töhfə vermək, məktəblilərin asudə
vaxtlarının səmərəli təşkilinə nail olmaqdan ibarətdir.
Yarışın ilk
matçında S.Nəsirov adına Ürkməzli kənd tam orta məktəbin basketbolçuları
E.Cəfərov adına Çaylı kənd 2 nömrəli tam orta məktəbin komandasına qalib gəlib.
Turnirin ikinci oyununda şəhər M.Hüseyn adına məktəb-liseyin komandası gərgin
idman mübarizəsində keçən görüşdə M.Həsənov adına Birinci Şıxlı kənd tam
orta məktəbindən olan basketbolçu həmyaşıdlarını üstələyib. Qazax şəhər
S.Əfəndiyev adına 1 nömrəli tam orta məktəbin basketbolçuları da ilk
qarşılaşmadan qələbə ilə ayrılıb. Onlar Ş.Cəbiyev adına Daş Salahlı kənd 2 nömrəli
tam orta məktəbin komandasından güclü olub. Adını növbəti
mərhələyə yazdıran sonuncu komanda İ.Nəsibov adına Aşağı Əskipara kənd tam
orta məktəbi üzərində texniki qələbə qazanan A.Mustafayev adına Qazaxbəyli kənd
tam orta məktəbin basketbolçuları olub. Yarışın
yarımfinal mərhələsində Ürkməzli kənd tam orta məktəbin komandası ilə şəhər
M.Hüseyn adına məktəb-liseyin idmançıları, eləcə də, şəhər 1 nömrəli tam orta
məktəbin kollektivi ilə Qazaxbəyli kənd tam orta məktəbin basketbolçuları
üz-üzə gəliblər. Bürünc medallar uğrunda görüşdə Qazaxbəyli
kənd tam orta məktəbin komandası ilə Ürkməzli kənd tam orta məktəbin
idmançıları qarşılaşıb. Gərgin mübarizə şəraitində keçən matç Qazaxbəyli basketbolçularının
9:6 hesablı qələbəsi ilə başa çatıb və onlar yarışın bürünc medallarına
yiyələniblər. "Həmrəylik kuboku” məktəblilər arasında
basketbol turniri” layihəsinin həlledici qarşılaşması 14 fevralda baş tutub.
Finalda şəhər M.Hüseyn adına məktəb-liseyin komandası ilə şəhər 1 nömrəli tam
orta məktəbin şagirdləri üz-üzə gəlib. Oyun boyu üstünlük əldə edən məktəb-liseyin
yeniyetmə basketbolçuları 13:4 hesabı ilə qalib gələrək çempion olublar. Yekunda ilk 3 yeri tutan kollektiv
diplom və medallarla təltif olunub. Yarışın qalibi olan komanda isə "Həmrəylik
kuboku” ilə mükafatlandırılıb. GOYEZEN.AZ
Facebook-da paylaş