Qazaxda 10 Mart - Milli Teatr Gününə həsr olunmuş onlayn görüş keçirilib
10 Mart - Milli Teatr Günüdür. Bu gün milli teatrımız 148 illiyini qeyd edir. Azərbaycan teatr sənəti qədim
və zəngin tarixi yol keçib. 1873-cü il martın 10-da Bakı realnı
məktəbinin teatr həvəskarları truppası tərəfindən M.F.Axundzadənin
"Sərgüzəşti-vəziri-xani Lənkəran” komediyası nümayiş etdirilib. Bu tamaşa ilə
Azərbaycanda milli teatrın əsası qoyulub. Bu şərəfli işdə Həsən bəy Zərdabi və
Nəcəf bəy Vəzirov mühüm rol oynayıb. Milli teatrın inkişafında məşhur
xeyriyyəçi-mesenat Hacı Zeynalabdin Tağıyevin böyük xidməti olub. O, Bakı
şəhərində ilk teatr binası inşa etdirib. Nəticədə Azərbaycan səhnəsinin
Cahangir bəy Zeynalov, Hüseynqulu Sarabski, Mirzağa Əliyev, Hüseyn Ərəblinski,
Ülvi Rəcəb, Abbas Mirzə Şərifzadə, Mustafa Mərdanov, Məmmədrza Şeyxzamanov,
Ağasadıq Gəraybəyli, Əliağa Ağayev, Lütfəli Abdullayev, Nəsibə xanım Zeynalova,
Mərziyə xanım Davudova kimi yüzlərlə siması yetişib. Uzun və şərəfli tarixi yol keçmiş Azərbaycan teatrının inkişafında son
illərdə yeni mərhələ başlayıb. Bu inkişaf özünü, ilk
növbədə, teatrların maddi-texniki bazasının müasir dünya standartlarına uyğun
möhkəmləndirilməsində, kollektivlərin yaradıcılıq axtarışlarının bəhrəsi olaraq
yeni maraqlı tamaşaların hazırlanmasında, nüfuzlu Qərb, o cümlədən Avropa
teatrları ilə təcrübə mübadiləsinin genişləndirilməsində və s. göstərir. Şübhəsiz, teatrlarımızın yeni inkişaf
yoluna çıxmasında ölkəmizə rəhbərliyinin bütün dövrlərində daim mədəniyyət və
incəsənətin böyük hamisi kimi bu sahədə çalışanların sonsuz rəğbətini qazanmış
Azərbaycan xalqının Ümummilli Lideri Heydər Əliyevin xidmətləri misilsizdir. Ulu
Öndərin bu siyasəti hazırda Azərbaycan Prezidenti İlham Əliyev tərəfindən
uğurla davam etdirilir. Məhz Prezident İlham Əliyevin bilavasitə təşəbbüsü ilə
son illərdə ölkədə teatr sənətinin inkişafı ilə bağlı bir sıra fundamental
dövlət sənədləri qəbul olunub. Hər
zaman sənət adamlarına diqqət və qayğı ilə yanaşan Prezident İlham Əliyevin
2013-cü il 1 mart tarixli Sərəncamı ilə ölkəmizdə "Milli Teatr Günü” təsis
edilib. Sərəncama əsasən milli mədəniyyətin inkişafında və ölkənin mədəni həyatında
milli teatrın əhəmiyyəti və rolu nəzərə alınaraq hər il martın 10-u Azərbaycan
Respublikasında "Milli Teatr Günü” kimi qeyd edilməsi qərara alınıb. Həmin
tarix ölkəmizin hər yerində silsilə tədbirlərlə qeyd olunur. Bu gün Gənclərin İnkişaf və Karyera Mərkəzinin Qazax
nümayəndəliyinin "Səhnəni qur" layihəsi çərçivəsində 10 Mart - Milli
Teatr Günü ilə bağlı Qazax Dövlət Dram Teatrının əməkdaşları ilə onlayn görüş
keçirilib. Tədbirdə teatrın baş rejissoru, Əməkdar artist Musa Eyyubov, rejissor
Allahverdi Musayev, aktyorlar Yusif Qoca və Zəmanə Dərviş iştirak edib. Görüşdə teatrın tarixi və repertuarı barədə gənclərə
ətraflı məlumat verilib. Sonda gəncləri maraqlandıran suallar cavablandırılıb. GOYEZEN.AZ
Facebook-da paylaş