Qazax Rayon Gənclər və İdman İdarəsinin kollektivi və bir qrup könüllü 2 Fevral - Gənclər Günündə Ulu Öndər Heydər Əliyevin abidəsini ziyarət ediblər
Bu gün
Azərbaycanda Gənclər Günü qeyd olunur. Gənclər Gününün tarixi məhz Ulu Öndər
Heydər Əliyevin adı ilə bağlıdır. Ulu Öndər 1995-ci ildə gənclər forumunun
keçirilməsi təşəbbüsünü irəli sürdü və 1996-cı ilin 2 fevral tarixində birinci
Gənclər Forumu baş tutdu. 1997-ci ildə Ümummilli Lider Heydər Əliyevin
imzaladığı müvafiq Sərəncamla isə Azərbaycan Gənclərinin Forumunun keçirildiyi
tarix - 2 fevral ölkəmizdə Gənclər Günü kimi qeyd olunmağa başladı. Ondan sonra
keçən dövrdə Azərbaycanda hər 3 ildən bir gənclər forumları keçirilir.
Forumlarda gənclərimizi maraqlandıran məsələlər müzakirə olunur, qərarlar qəbul
edilir. 2 Fevral -
Gənclər Günü respublikamızın hər yerində olduğu kimi, Qazax rayonunda da silsilə
tədbirlərlə qeyd edilib. Əlamətdar gün münasibətilə onlayn videokonfranslar,
toplantılar, vebinarlar keçirilib. Bu gün
Qazax Rayon Gənclər və İdman İdarəsinin kollektivi və bir qrup könüllü 2 Fevral
- Gənclər Gününün müəllifi olan Ulu Öndər Heydər Əliyevin abidəsini ziyarət
edərək heykəli önünə gül dəstələri qoyub, əziz xatirəsini böyük ehtiramla yad
ediblər.
Gənclər Ulu Öndər Heydər
Əliyev tərəfindən onlara hər zaman böyük diqqət və qayğı göstərildiyini bir
daha minnətdarlıq hissi ilə qeyd ediblər. Ümummilli Liderin 1994-cü illin
iyulunda Azərbaycanda Gənclər və İdman Nazirliyini yaratmasını, gəncləri bir
araya toplamasını, 1996-cı il fevralın 2-də isə ilk dəfə müstəqil dövlətimizin
gənclər Forumunun keçirilməsini gənclərə olan qayğının bariz nümunəsi kimi qeyd
ediblər. 1997-ci il fevral ayının 1-də Azərbaycan
Respublikası Prezidentinin Forum nümayəndələrinin bir qrupu ilə görüşündə
Forumdan keçən 1 il ərzində görülmüş işləri təhlil etməsini, gəncliklə bağlı
əsas problemlərin həlli yollarını müəyyən etməsini Azərbaycan gəncliyinə
verdiyi böyük dəyər kimi qiymətləndiriblər. Ulu Öndərin elə həmin gün
imzaladığı Sərəncamla 2 fevral tarixinin Azərbaycanda Gəncləri Günü elan edilməsini
gənclərə,
gələcək nəslə verilən daha bir qiymət kimi dəyərləndiriblər. Gənclər Ümummilli Liderin
onlara olan diqqət və qayğısını bu gün də hiss etdiklərini, cənab Prezident
İlham Əliyev tərəfindən hər zaman qayğı ilə əhatə olunduqlarını vurğulayıblar. Ölkə
başçısı tərəfindən 2007-ci ilin "Gənclər ili” elan edilməsini, "Azərbaycan
Gəncliyi Dövlət Proqramı”nın təsdiqini, 2011-ci ildə Gənclər Fondunun yaradılmasını, gənclərin sosial
müdafiəsi ilə bağlı müxtəlif Sərəncamların verilməsini, eyni zamanda ölkə
başçısının 30 dekabr 2019-cu il tarixli Sərəncamı ilə yola saldığımız 2020-ci
ilin "Könüllülər ili” elan olunmasını gənclərə olan qayğının əyani sübutu kimi
bir daha dilə gətiriblər.
Azərbaycan gəncliyi olaraq
onlara göstərilən etimadı öz əməli işləri ilə doğruldacaqlarını söyləyiblər. 44
günlük Vətən müharibəsində olduğu kimi, bundan sonra da Silahlı Qüvvələrin Ali
Baş Komandanı, gənclərin yaxın dostu cənab İlham Əliyevin və hər zaman onlara
qayğı ilə yanaşan Birinci vitse-prezident Mehriban Əliyevanın ətrafında yumruq
tək birləşəcəklərini, müstəqil Azərbaycanın daha da çiçəklənməsi naminə var
qüvvələri ilə çalışacaqlarını bildiriblər.
GOYEZEN.AZ
Facebook-da paylaş