Bu gün hər kəsə yaxşı məlumdur ki, son illər Qazaxda bütün sahələrlə yanaşı, təhsil sahəsi də özünün intibah dövrünü yaşayır. Rayonda bu sahədə əldə olunan uğurlar, qazanılan nailiyyətlər ildən-ilə artmaqda davam edir. Heç şübhəsiz ki, bu uğurların kökündə təhsil sahəsinə, həmin sahədə çalışan insanlara olan səmimi münasibət, verilən dəyər və göstərilən qayğı dayanır. Qazax Rayon İcra Hakimiyyətinin başçısı Rəcəb Babaşovun fəaliyyətə başladığı ilk gündən rayonda daim diqqət mərkəzində saxladığı sahələrdən biri də məhz təhsil sahəsidir. İstər müəllimlər, istərsə də şagirdlər rayon rəhbərliyi tərəfindən göstərilən qayğını elə ilk gündən hiss edirlər. Rayon rəhbərinin mütəmadi olaraq təhsildə fərqlənən müəllim və şagirdləri qəbul etməsi, onları Fəxri Fərmanla təltif etməsi, məktəblərdə müəllim və şagirdlər üçün yaradılan şəraitlə tanış olması, onların qayğıları ilə yaxından maraqlanması bunun bariz nümunəsidir.

Sevindirici haldır ki, ölkə Prezidenti İlham Əliyevin və Birinci vitse-prezident Mehriban xanım Əliyevanın respublikamızda təhsil sahəsinə göstərdikləri qayğını təhsil işçiləri əməli işləri ilə doğruldurlar. 

2023-2024-cü tədris ilində Qazax rayon Səlamət Həsənov adına Bala Çaylı kənd tam orta məktəbin qəbul imtahanlarındakı göstəriciləri də ürəkaçandır. Məhz bu səbəbdən Qazax Rayon İcra Hakimiyyətinin başçısı Rəcəb Babaşov 2023-2024-cü tədris ilində rəhbərlik etdiyi məktəbin 11-ci sinfini bitirmiş 9 nəfər şagirddən 4 nəfərin ali və 4 nəfərin orta ixtisas təhsili müəssisələrinə qəbul olduqlarına görə Qazax rayon Səlamət Həsənov adına Bala Çaylı kənd tam orta məktəbin direktoru Məmmədov Möhsüm Tanrıverdi oğlunu Fəxri Fərmanla təltif edib.

Dekabrın 17-də Qazax Rayon İcra Hakimiyyəti başçısının müavini, İctimai-siyasi və humanitar məsələlər şöbəsinin müdiri Gulaya Həsənova, icra aparatının digər məsul əməkdaşları adı çəkilən məktəbdə olub, məktəbin müəllim kollektivi ilə görüşərək Fəxri Fərmanı sahibinə təqdim ediblər. 

Müavin Gulaya Həsənova müəllimləri rayon rəhbərliyinin adından salamlayıb, səmimi ürək sözlərini çatdırıb. Builki tədris ilində də daha böyük nailiyyətlər qazanmalarını arzu edib. 

Fəxri Fərmanla təltif edilən məktəb direktoru Möhsüm Məmmədov onlara göstərilən diqqətə, səmimi münasibətə, əməklərinə verilən qiymətə görə rayon rəhbərliyinə razılığını ifadə edib. Təqdim olunan Fəxri Fərmanı özünün timsalında məktəbin bütün müəllimlərinin əməyinə verilən qiymət kimi dəyərləndirib. Məktəb direktoru onlara göstərilən etimadı bundan sonra da əməli işləri ilə doğruldacaqlarını söyləyib.