Bu gün 19-20 sentyabr 2023-cü il tarixində Azərbaycan Respublikasının Silahlı Qüvvələri tərəfindən Qarabağ iqtisadi rayonunda keçirilən lokal xarakterli antiterror tədbirləri zamanı qəhrəmancasına şəhid olmuş Bakı Dövlət Universitetinin Qazax filialının məzunu Orucov Niftalı Qəfər oğlunun Şəhidlik zirvəsinə ucaldığı gündən 40 gün ötür. 

Bakı Dövlət Universitetinin Qazax filialının əməkdaşları şəhid Niftalı Orucovun qırx mərasimində iştirak etmək üçün Tovuz rayonunun Qaraxanlı kəndinə gələrək şəhidin ata ocağında ailəsinə baş çəkiblər. Şəhidin atası Qəfər Orucov və ailə üzvləri ilə görüşüb, şəhid Niftalı Orucova Allahdan rəhmət diləyərək bir daha başsağlığı veriblər.

Orucov Niftalı Qəfər oğlu 12 mart 1995-ci ildə Tovuz rayonunun Qaraxanlı kəndində anadan olmuşdur. 2001-2012-ci illərdə Tovuz rayon M.Musayev adına Əlimərdanlı kənd tam orta məktəbində təhsil almışdır. 

Niftalı Orucov 2012-ci ildə Bakı Dövlət Universitetinin Qazax filialına daxil olmuş və 2016-cı ildə həmin təhsil ocağını bitirmişdir. 2016-cı ildə Səfərbərlik və Hərbi Xidmətə Çağırış üzrə Dövlət Xidmətinin Tovuz Rayon Şöbəsi tərəfindən hərbi  xidmətə   çağırılmışdır. O, 2017-ci ildə hərbi xidmətini başa vurmuşdur.

Niftalı Orucov hərbi xidmətdə olan zaman Müdafiə Nazirliyinin Təlim-Tədris Mərkəzində kurs keçərək zabit rütbəsi almışdır. Həmin ildən N saylı hərbi hissədə leytenant kimi xidmətə başlamışdır. O, 2022-ci ildən komanda hərbi birliklərində komandir müavini vəzifəsində xidmətini davam etdirmişdir. 

Niftalı Orucov 19-20 sentyabr 2023-cü il tarixində Qarabağ iqtisadi rayonunda keçirilən lokal xarakterli antiterror tədbirləri zamanı qəhrəmancasına şəhid olmuşdur.

Onu da qeyd edək ki, Niftalı Orucovun tələbə yoldaşı leytenant Məmmədov Məhəmməd Zakir oğlu 44 günlük Vətən müharibəsində Şəhidlik zirvəsinə ucalmışdır. Niftalı öz şəhid tələbə yoldaşının doğulduğu Qazax rayonunun Alpout kəndində olmuş, qəhrəman şəhidin məzarını ziyarət etmişdir. 

Elçin İSMAYIL,

Filialın Mətbuat Xidmətinin rəhbəri