Qazax rayonunda yeni avtovağzal istifadəyə verilib. Gürcüstanla sərhəddə yerləşən İkinci Şıxlı kəndində tikilmiş, beynəlxalq və şəhərlərarası daşımaları həyata keçirəcək avtovağzal kompleksində 120-dən çox insanın işlə təmin olunmasına şərait yaradılıb.

GÖYƏZƏN.AZ-ın AZƏRTAC-a istinadən verdiyi məlumata görə avtovağzalın tikilməsinin əsas məqsədi əhaliyə müasir standartlara cavab verən xidmətin göstərilməsi, nəqliyyat vasitələrinin qeyri-qanuni daşımaları həyata keçirməsinin qarşısının alınmasıdır.

Ölkə ərazisində hazırda 58 avtovağzal və avtostansiyanın fəaliyyət göstərdiyini deyən Nəqliyyat Nazirliyinin Dövlət Avtomobil Nəqliyyatı Xidmətinin rəis müavini İbrahim Əliyev son dövrlər 20-yə yaxın avtovağzalın fəaliyyətinin yenidən təşkil olunduğunu, 11-də isə yenidənqurma işlərinin həyata keçirildiyini bildirib.

O, yaxın vaxtlarda tikintisi yekunlaşmaq üzrə olan 3 böyük avtovağzalın da açılışının nəzərdə tutulduğunu qeyd edib.