Şəhidlərimizin keçdiyi döyüş yolu gənclərimiz üçün bir örnəkdir
Şəhidlərimizi
tanıyaq və tanıdaq----------------------------------------------- "Hamımızın ümumi vəzifəmiz
xalqımızda vətənpərvərlik, Vətən torpağına, millətə sədaqət, Vətən uğrunda şəhidliyə
hazır olmaq hisslərini formalaşdırmaq, inkişaf etdirmək və təbliğ etməkdir"
- deyən ulu öndər Heydər Əliyevin bu dəyərli sözləri bu gün hər bir azərbaycanlı,
xüsusilə də gənc nəsil üçün əsl şüardır. Çünki Azərbaycan
xalqı gələcəyimiz olan gənc nəslin Vətənə məhəbbət, xalqa, elinə və obasına
hörmət, soykökünə, öz ata-babalarının ənənələrinə sədaqət ruhunda tərbiyə
olunmasına həmişə böyük məsuliyyətlə yanaşmış və ona həyati əhəmiyyətli məsələ
kimi baxmışdır. Azərbaycan xalqı qəhrəman xalqdır və bu xalq öz Vətənini göz bəbəyi
kimi qorumağa hazır olan mətin gənclər yetirmişdir. Vətəni qorumaq
kimi müqəddəs bir amal uğrunda döyüşə atılan və
düşmənə sinə gərən qeyrətli Vətən oğullarını yad etmək, bütün şəhidlərimizin
əziz xatirəsinə ehtiramla yanaşmaq, onların adlarını əbədiləşdirmək və
ruhlarını şad etmək isə bizim hər birimizin ən müqəddəs vəzifəsi və borcu
olmalıdır. Vətən torpaqlarının ərazi bütövlüyü uğrunda 285 şəhid verən, 7 nəfər igid
oğlu Azərbaycanın Milli Qəhrəmanı adına layiq görülən, 168 km məsafədə düşmənlə
sərhəddi olan, Bağanıs Ayrım, Xeyrımlı, Barxudarlı, Sofulu, Qızılhacılı, Yuxarı
Əskipara və Aşağı Əskipara kimi 7 kəndi hələ də düşmən tapdağı altında qalan Qazax
rayonunda da Vətənin müstəqilliyi hər şeydən üstün tutulur. Vətən sevgisi, vətənpərvərlik duyğusu, şəhidlərimizə, onların ailə
üzvlərinə olan qayğı həmişə yüksək səviyyədədir. Fəaliyyətə başladığı ilk
gündən rayon rəhbərinin şəhidlərimizin ailə üzvlərinə daim qayğı ilə yanaşması,
şəhidlərimizin uyuduğu qəbiristanlıqların, onların xatirəsinə ucaldılmış
abidələrin, parkların, bulaqların, xiyabanların abadlaşdırılması, yenilənməsi,
əsaslı şəkildə təmir edilməsi bunun əyani sübutudur. Rayonumuzda torpaqlarımızın azadlığı uğrunda canlarından keçmiş
şəhidlərimizin doğum və anım günlərinin qeyd olunması, əziz xatirələrinin yad
edilməsi də artıq bir ənənə halını alıb. Ənənəsinə sadiq qalan GOYEZEN.AZ saytı
Vətən uğrunda canından keçmiş, doğum və anım günü olan şəhidlərimizdən – Elvin Namazovun, Xəyyam Yaqubovun, İlqar
Cəfərovun, Məhəmməd Qəhrəmanovun, Vasif Mehtiyevin, Eyvaz Nağıyevin, Yusif
Ayvazovun və Şahvələd Qocayevin əziz
xatirələrini yad edir. Namazov Elvin Məmməd oğlu Namazov Elvin Məmməd
oğlu 7 sentyabr 1990-cı ildə Qazax rayonunun
Yuxarı Salahlı kəndində anadan olmuşdur. 2007-ci ildə
Zahid Mahmudov adına Yuxarı Salahlı kənd tam orta məktəbini bitirmişdir.
2008-ci ildə Heydər Əliyev adına Azərbaycan Ali Hərbi Məktəbinə daxil olmuş,
2012-ci ildə həmin ali məktəbi leytenant hərbi rütbəsində bitirmişdir. 2013-cü ildə
Silahlı Qüvvələrin Təlim və Tədris Mərkəzində bir illik kursda olmuşdur. 2014-cü ildən
Müdafiə Nazirliyinin Xüsusi təyinatlılardan ibarət "N” saylı hərbi hissəsində
kəşfiyyat komandiri vəzifəsinə təyin olunmuşdur. 2016-cı ildə baş
leytenant hərbi rütbəsi verilmişdir. Elvin Namazov 3 aprel 2016-cı il tarixdə Tərtər istiqamətində gedən
döyüşlərdə Azərbaycan-Ermənistan təmas xəttində erməni ordusunun hücumunun qarşısının alınması zamanı baş verən şiddətli atışmada qəhrəmancasına şəhid olmuşdur. Elvin Namazov ölümündən sonra göstərdiyi qəhrəmanlığa görə Azərbaycan Respublikasının Prezidenti İlham Əliyevin 19 aprel 2016-cı il tarixli Sərəncamına əsasən "Vətən uğrunda" medalı ilə təltif olunmuşdur. 2016-cı ildə Qazax şəhərinin mərkəzində
adına bulaq kompleksi tikilmişdir. Azərbaycan
Respublikasının Prezidenti yanında Qeyri-Hökumət Təşkilatlarına Dövlət Dəstəyi
Şurasının maliyyə yardımı və "Öyrədərək Öyrənirik" Gənclərin
İntellektual İnkişafına Dəstək İctimai Birliyinin təşkilatçılığı ilə icra
olunan "Vətən üçün hazır ol!" layihəsi çərçivəsində çəkilmiş
"Qarabağa doğru" sənədli filmi baş leytenant Elvin Namazov, kapitan
Mühüd Orucov və əsgər Orxan Əliyevin əziz xatirəsinə həsr olunmuşdur. Yaqubov Xəyyam Şəmistan oğlu Yaqubov Xəyyam Şəmistan oğlu 27 iyul 1973-cü ildə Qazax rayonunun
Qarapapaq kəndində anadan olmuşdur. 1980-ci ildə Qazax şəhər 3 saylı tam orta məktəbin
birinci sinfinə daxil olmuş, 1988-ci ildə həmin məktəbin səkkizinci sinfini
bitirmişdir. Həmin ildən 1990-cı ilə kimi Qazax 117 saylı peşə məktəbində
qaynaqçı ixtisasına yiyələnmişdir. 1991-ci ildə Qazax Hərbi Komissarlığından hərbi xidmətə çağırılmışdır.
Hərbi xidmətini N saylı Hərbi Hissənin 1-ci taborunda başlamışdır. 3
sentyabr 1994-cü ildə Bala Cəfərlidə gedən döyüşlərdə itkin düşmüşdür. Subay
idi. Cəfərov İlqar Dursun oğlu Cəfərov İlqar Dursun oğlu 27
fevral 1976-cı ildə Qazax rayonunun Quşçu Ayrım kəndində anadan olmuşdur.
1983-cü ildə Quşçu Ayrım kənd tam orta məktəbinin birinci sinfinə daxil olmuş,
1994-cü ildə məktəbi bitirərək Vətənin müdafiəsinə yollanmışdır. Cəfərov İlqar
Dursun oğlu 3 sentyabr 1995-ci ildə Ağdam rayonunun Əfətli kəndi ərazisində gedən
döyüş zamanı şəhid olmuşdur. Subay idi. Qəhrəmanov
Məhəmməd Maksim oğlu Qəhrəmanov Məhəmməd Maksim
oğlu 3 sentyabr 1966-cı ildə Qazax rayonunun Kəmərli kəndində anadan olmuşdur.
1972-ci ildə Kəmərli kənd tam orta məktəbinin I sinfinə daxil olmuşdur. 1982-ci
ildə məktəbi bitirmiş, 1983-cü ildə SSRİ-nin Xabarovski şəhərinə hərbi xidmətə
yola salınmışdır. 1985-ci ildə hərbi xidmətdən tərxis olunmuşdur. Hərbidən gəldikdən sonra kənddə müxtəlif işlərdə
işləmişdir. 1991-ci ildə Azərbaycan Milli Ordusuna yola salınmışdır. 1993-cü
ilin 18 iyulunda Kəmərli kəndində torpaqlarımız uğrunda gedən döyüşdə şəhid
olmuşdur. Ailəli idi, bir qızı var. Mehtiyev Vasif Əhməd oğlu Mehtiyev Vasif Əhməd oğlu 10
aprel 1973-cü ildə Qazax rayonunun Kəmərli kəndində anadan olmuşdur.
1980-1990-ci illərdə Kəmərli kənd Xanbağı orta məktəbində təhsil almışdır.
1992-ci ildə hərbi xidmətə yola düşmüşdür. 3 sentyabr 1993-cü ildə Kəlbəcərdə
gedən döyüşlərdə şəhid olmuşdur. Nağıyev Eyvaz Alı oğlu Nağıyev
Eyvaz Alı oğlu 3 sentyabr 1960-cı ildə Gürcüstan Respublikasının Marneuli
rayonunun Kürdlər kəndində anadan olmuşdur. 1968-ci ildə yaşadığı kənddə
birinci sinfə daxil olmuş, 1978-ci ildə həmin orta məktəbi bitirmişdir.
1979-1981-ci illərdə sovet ordusunda hərbi xidmətdə olmuşdur. 1990-cı ildə
Qazax rayonunun Birinci Şıxlı kəndinə gəlmişdir. 1991-ci ildə könüllü olaraq
Milli Orduda gizir kimi xidmət etməyə başlamışdır. 18 avqust 1993-cü ildə döyüş
zamanı şəhid olmuşdur. Gürcüstan Respublikasının Marneuli rayonunun Kürdlər kəndində
dəfn olunmuşdur. Ailəlidir. Bir oğlu, bir qızı var. Hal-hazırda həyat yoldaşı və
uşaqları Bakı şəhərində yaşayırlar. Ayvazov
Yusif Süleyman oğlu Ayvazov Yusif Süleyman oğlu 4 sentyabr 1968-ci ildə Qazax rayonunun
Çaylı kəndində anadan olmuşdur. 1974-cü
il ildə Çaylı kənd 1 saylı tam orta məktəbin birinci sinfinə daxil olmuş, 1985-ci ildə həmin orta məktəbi
bitirmişdir. 1986-1988-ci illərdə SSRİ-nin silahlı qüvvələrində hərbi xidmət etmişdir. 825-ci Hərbi
Hissənin II batalyonunda Vətən uğrunda gedən döyüşlərdə iştirak edən Yusif Ayvazov
22 iyul 1993-cü ildə Fərəhli kəndində minaya düşərək şəhid olmuşdur. Qocayev
Şahvələd Məhəmməd oğlu Qocayev Şahvələd Məhəmməd oğlu 5 sentyabr 1937-ci ildə Qazax rayonunun
İkinci Şıxlı kəndində andan olmuşdur. Şahnabad
Nəsibova adına Sarıvəlli kənd tam orta məktəbində təhsil
almışdır. 10 aprel 1993–cü ildə Qazax rayonunun İkinci Şıxlı kəndində şəhid
olmuşdur. Ailəli idi.
Facebook-da paylaş