“QAZAX AQROPARK"da YAZ-TARLA İŞLƏRİ
Respublika mətbuatı Qazax haqqında Dövlət başçısı İlham Əliyevin rəhbərliyi ilə aparılan
düzgün iqtisadi siyasətdə aqrar sahənin inkişaf etdirilməsi üçün bir sıra vacib
tədbirlər həyata keçirilir. Respublikada sahibkarlığın yüksək təşəkkül tapması
üçün tam münbit şərait yaradılmışdır. Dövlət tərəfindən uzunmüddətli güzəştli kreditlər
verilməsi, fermerlərə kənd təsərrüfatı texnikalarının lizinqlə güzəştli
qiymətlərlə satılması davamlı hal almışdır. Eyni zamanda, aqrar sahənin
innovativ metodlarla idarə olunması üçün bölgələrdə müasir standartlara cavab
verən aqroparklar yaradılır. Qeyd etmək lazımdır ki, statistik məlumatlara görə, bu
günədək aqroparklara 1,3 milyard manatdan artıq investisiya qoyulmuşdur.
Yaradılan bu növ müasir müəssisələr ölkədə ərzaq təhlükəsizliyinin təmin
olunmasına töhfə verməklə yanaşı, bölgələrdə yeni iş yerlərinin açılmasında da
mühüm əhəmiyyət kəsb edir. Hər il aqroparklarda yüzlərlə ton ekoloji təmiz,
rəqabətədavamlı, ixracyönümlü kənd təsərrüfatı məhsulları istehsal olunaraq
daxili bazarlarda bolluq yaradır, eləcə də xarici ölkələrə ixrac olunur. Qazax rayonunda da son illərdə özəl sektorun
inkişafına əlverişli və münbit şərait yaradılmışdır. Məhz bunun nəticəsidir ki,
son illərdə rayonda bir sıra yeni özəl müəssisələr yaradılmışdır. Bu günlərdə
nümunəvi bir təsərrüfatla - "İnvestel GROUP" MMC tərəfindən rayonun
İkinci Şıxlı kəndində yaradılmış "Qazax Aqropark"ın vəziyyəti ilə
tanış olmaq üçün bölgəyə yollandıq. Aqropark 2018-ci ildən fəaliyyətə
başlamışdır. Müəssisənin balansında 800 hektar torpaq sahəsi mövcuddur. Əlavə
olaraq 200 hektar torpaq sahəsi vətəndaşlardan icarəyə götürülərək əkin-biçin
aparılır. Keçən təsərrüfat ilində 350 hektar kartof, 650 hektar
sahədə taxıl (500 hektar buğda, 150 hektar arpa) becərilmişdir və yüksək
məhsuldarlığa nail olunmuşdur. Bu ilin məhsulu üçün əkilən sahələrdə əsasən
"Qarabağ 22" arpa toxumu, "Zirvə 85", "Qırmızı
gül" yerli məhsuldar taxıl toxum sortları səpilmişdir ki, bu da yüksək
məhsuldarlığın əldə olunmasına zəmin yaradır. Cari ilin məhsulu üçün yenə də
qeyd olunan qədər sahəyə toxum səpilmişdir. Artıq 350 hektar sahədə kartof
səpini yekunlaşmışdır. Əldə olunan ekoloji təmiz məhsullar əsasən daxili
bazarlarda realizə olunur. Bir məsələni xüsusilə vurğulamaq lazımdır ki,
əvvəllər bu sahələrdə məhsul dəmyə şəraitində yetişdirilmişdir. Son illərdə havaların əsasən isti keçməsi səbəbindən
bu sahədə demək olar ki, məhsuldarlıq heç də ürəkaçan olmamışdır. Lakin hazırda
sahələr suvarma suyu ilə təmin olunmuşdur ki, bu da yüksək məhsuldarlığa zəmin
yaratmışdır. Sahələrin suvarılması Xram çayından götürülmüş su
hesabına həyata keçirilir. Çayın üzərində üçpilləli nasos quraşdırılmışdır.
Uzunluğu 13,5 kilometr olan 530 mm-lik yeraltı dəmir su xətti çəkilmişdir. İki
ədəd hər birinin tutumu 4500 kubmetr olan su hovuzu inşa olunmuşdur. 30 kilometr
sahədaxili 315 mm-lik su xətti çəkilmişdir. Xətlər vasitəsilə su sahələrə
normal paylanılır. Suvarmada mütərəqqi üsullardan (çiləmə, tambur və damcılama)
istifadə olunur ki, bu da su itkisini tamamilə minimuma endirir. Müəssisədə 1600 kvadratmetr sahəsi olan quru anbar
mövcuddur. Burada mineral gübrələr və
istehsal olunan məhsullar saxlanılır. Kartof saxlamaq üçün müasir standartlara
cavab verən tutumu 2300 ton olan 2200 kvadratmetrlik soyuducu anbar fəaliyyət
göstərir. Bundan başqa, müasir avadanlıqlarla təchiz olunmuş laboratoriya, ofis
binası, texnika təmiri parkı mövcuddur. "Qazax
Aqropark" kənd təsərrüfatı texnikaları ilə təmin olunmuşdur. Müəssisənin
balansında 6 ədəd "Claas" tipli əkin traktoru, kartofsəpən,
gübrəsəpən, dərmançiləyən, 2 ədəd kartofyığan (çox funksiyalı) aqreqatlar
mövcuddur. Qeyd etmək lazımdır ki, Azərbaycan dövləti tərəfindən taxıl əkilən
hər hektar üçün 200, kartof üçün isə 220 AZN subsidiya ödənilir. "Qazax
Aqropark" eyni zamanda kartof toxumu istehsal edərək fermerlərə güzəştli
qiymətlərlə satışını həyata keçirirlər. Əsasən elit məhsuldar toxumu
yetişdirilir. Bu toxumlar xaricdən idxal olunur və rayonlaşdırılır. "Qazax
Aqropark"da hazırda 43 nəfər daimi işlə təmin olunmuşdur. Eyni zamanda,
əlavə olaraq 50-60 nəfər mövsümi işlərə, kartof yığımı zamanı isə 200-250 nəfər
yığım işlərinə cəlb olunurlar. Mütəxəssislərin
fikrincə, havaların qışda qarlı-şaxtalı keçməsi bol məhsulun əldə olunmasına
zəmin yaradıb. Göründüyü kimi, yaradılan yeni müəssisələr ərzaq bolluğuna töhfə
verməklə yanaşı, əhalinin məşğulluğunun təmin olunmasında da mühüm rol oynayır. Vəli VƏLİYEV, "Respublika" qəzetinin bölgə müxbiri 3 aprel 2022-ci il
Facebook-da paylaş