Qazax Tarix-Diyarşünaslıq Muzeyində “Mülki müdafiə və hər bir evdə ilk yardım edən” mövzusunda dəyirmi masa keçirilib
Ümumdünya
Mülki Müdafiə Günü 1 mart 1972-ci ildə Beynəlxalq Mülki Müdafiə Təşkilatının
yaradılması şərəfinə qeyd edilən xüsusi bir gündür. Hər il Mülki Müdafiə Günü
bütün qitələrdə kütləvi humanitar tədbir kimi qeyd olunur. Azərbaycan bu nüfuzlu beynəlxalq təşkilatın
tərkibinə 1993-cü ildə daxil olub. 1 Mart - Ümumdünya Mülki
Müdafiə Günü respublikamızın hər yerində olduğu kimi, Qazaxda da silsilə
tədbirlərlə qeyd edilir. Qazax Tarix-Diyarşünaslıq Muzeyində də 1 Mart - Ümümdünya
Mülki Müdafiə Gününə həsr olunmuş "Mülki müdafiə və hər bir evdə ilk yardım
edən” mövzusunda dəyirmi masa keçirilib. Tədbirdə Gəncə
Regional Dövlət Yanğın Nəzarət İdarəsinin Dövlət Yanğın nəzarəti şöbəsinin inspektoru Arzuman Həsənov, Mədəniyyət
İşçiləri Həmkarlar İttifaqı Qazax rayon Komitəsinin sədri İsgəndər Qurbanov
və mədəniyyət işçiləri iştirak ediblər. Əvvəlcə Mülkü Müdafiə Gününün yaranmasına həsr olunmuş filmə
baxılıb.
Muzeyin direktoru Gülnaz Alişanova çıxış edərək bildirib
ki, 1993-cü ildən
ÜMMT-nin üzvü olan Azərbaycan onun keçirdiyi bütün tədbirlərdə fəal iştirak
edir. Təşkilatın vəzifələri
həm müasir dövrdə müharibələrin, həm də əmin–amanlıq dövründə güclü istehsalat
qəzalarının və təbii fəlakətlərin nəticələrinin ehtimal olunan xarakterindən irəli
gəlir. Belə ki, əhalinin mühafizəsi mülki müdafiənin başlıca vəzifəsidir.
Mühafizənin əsas üsul və vasitələri isə adamların mühafizə qurğularında yerləşdirilməsi,
təhlükəsiz yaşayış məntəqələrinə təxliyəsi, fərdi mühafizə vasitələrindən
hamının istifadə etməsidir. Havadan basqın, zəhərlənmə və digər təhlükələr barədə
vaxtında xəbərdarlıq, mühafizə üsul və qaydalarının əhaliyə öyrədilməsi də bu vəzifənin
yerinə yetirilməsində vacib şərtdir. Qeyd edib ki, hər bir işçi təbii və texnogen xarakterli
fövqəladə hadisələr zamanı təlimatda nəzərdə tutulmuş davranış qaydalarını
bilməli və ona riayət etməlidir.
Gəncə
Regional Dövlət Yanğın Nəzarət İdarəsinin Dövlət Yanğın nəzarəti şöbəsinin inspektoru Arzuman Həsənov çıxış edərək bildirib ki, bu günün hər il keçirilməsində
məqsəd ictimaiyyətin diqqətini bu təşkilatın vacibliyinə və həyati əhəmiyyətinə
cəlb etmək, mülki müdafiə işçilərinin isə işini və fədakarlıqlarını lazımınca
qiymətləndirməkdir. Azərbaycanda da mülki müdafiə ilə bağlı genişmiqyaslı işlər
görülüb. Bu baxımdan Fövqəladə Hallar Nazirliyinin yaranması ölkəmizin həyatında
çox əlamətdar hadisədir. Nazirlik ölkəmizdə mülki müdafiə sisteminin
yaradılmasına böyük diqqət göstərir. Bu məqsədlə Mülki Müdafiə Qoşunlarının
balansında olan binalarda, bu sahədə ixtisaslaşan hərbi hissələrdə dünya
standartları səviyyəsində əsaslı təmir və yenidənqurma işləri aparılır. Məhz
bunun nəticəsində nazirliyin fövqəladə hallarda cavab tədbirlərinin görülməsində,
təbii və texnogen fəlakətlərin nəticələrinin aradan qaldırılmasında, hadisələrə
çevik və operativ reaksiya verilməsində göstərdiyi səylər xarici tərəfdaşlar tərəfindən
də yüksək qiymətləndirilir. A.Həsənov hər hansı zədə almış və qəfildən xəstələnmiş şəxsin
həyatını xilas etmək və sağlamlığını bərpa etmək üçün ona göstərilmiş ilk həkiməqədər yardımın böyük əhəmiyyət
daşıdığını vurğulayıb. Hadisə
yerində (işdə, küçədə, evdə və s.) bir sıra sadə tədbirləri yubanmadan həyata keçirməklə
ağır fəsadların və xoşagəlməz nəticələrin qarşısını almağın mümkün olduğunu söyləyib.
MİHİ Qazax rayon Komitəsinin sədri İsgəndər Qurbanov
çıxış edərək qeyd edib ki, bütün işçilər sülh və müharibə dövrlərində
fövqəladə hadisə təhlükəsi yaranarsa və ya baş verərsə müəyyən olunmuş
fəaliyyət qaydalarını dəqiq bilməli və yerinə yetirməli, həyat və
sağlamlığına zərər gətirə biləcək hərəkətlərə yol verməməlidir.
GOYEZEN.AZ
Facebook-da paylaş