Qazaxda kənd təsərrüfatında uçotun dürüstləşdirilməsi və şəffaflaşdırılması ilə bağlı zona müşavirəsi keçirilib
Bu gün Qazaxda kənd təsərrüfatı sahəsində
uçotun dürüstləşdirilməsi və şəffaflaşdırılması işlərinin təşkili məsələlərinə
həsr olunmuş zona müşavirəsi keçirilib. Tədbirdə ölkəmizin qərb bölgəsində yerləşən rayonların
icra hakimiyyətlərinin rəhbər vəzifəli şəxsləri, Kənd Təsərrüfatı Nazirliyinin,
Dövlət Aqrar İnkişaf Mərkəzlərinin əməkdaşları, Vergilər Nazirliyinin, Əmək və
Əhalinin Sosial Müdafiəsi Nazirliyinin, Dövlət Statistika Komitəsinin, Əmlak Məsələləri
Dövlət Komitəsinin yerli qurumlarının, qəsəbə, kənd icra nümayəndəliklərinin və
bələdiyyələrin rəhbərləri iştirak ediblər. Qazax, Ağstafa, Tovuz, Şəmkir, Gədəbəy, Göyçay,
Yevlax, Şəki, Bərdə, Tərtər, Daşkəsən, Goranboy, Samux, Göygöl və Naftalan rayonlarından
olan nümayəndələr müşavirəyə qatılıblar. Müşavirədən öncə Vergilər nazirinin müavini Sahib Ələkbərov Qazax Rayon
İcra Hakimiyyətinin başçısı Rəcəb Babaşovla birlikdə Ulu Öndər Heydər
Əliyevin Qazax şəhərinin mərkəzində ucaldılmış abidəsini ziyarət edərək önünə
gül dəstəsi qoyub. Sonra Ümummilli Liderin adını daşıyan Heydər Əliyev
Mərkəzində dahi şəxsiyyətin həyat və fəaliyyətini əks etdirən stendlərlə tanış
olub. Daha sonra müşavirə Qazax Gənclər
Mərkəzində öz işinə başlayıb. Qazax Rayon İcra Hakmiyyətinin başçısı Rəcəb
Babaşov giriş sözü ilə çıxış edərək qonaqları və müşavirə iştirakçılarını
salamlayıb. Keçirilən müşavirənin məqsəd və əhəmiyyətindən söz açan icra
başçısı respublika səviyyəsində olan tədbirin Qazax rayonunda keçirilməsinə görə
Vergilər Naziri cənab Mikayıl Cabbarova öz adından və Qazax ictimaiyyəti
adından dərin minnətdarlığını bildirib. İcra başçısı Qazax rayonunda kənd təsərrüfatı
sahəsində aparılan islahatların müsbət nəticələri barədə məlumat verib, bütün
sahələrdə olduğu kimi, burada da uçotun düzgün aparılmasının vacibliyini qeyd
edib. Vergilər nazirinin müavini Sahib Ələkbərov çıxış
edərək müşavirə iştirakçılarını nazirliyin rəhbərliyi adından salamlayıb və tədbirdə
iştiraklarına görə təşəkkürlərini çatdırıb. Müşavirənin əhəmiyyətini vurğulayan
nazir müavini kənd təsərrüfatında uçotun dürüstləşdirilməsini və şəffaflaşdırılmasını
zəruri edən səbəblər, mövcud problemlərin aradan qaldırılması üçün vergi
orqanları və aidiyyəti dövlət qurumlarının birgə əməkdaşlığı və digər vacib məsələlər
barədə məlumat verib. Bildirilib ki, kənd təsərrüfatı sahəsində uçotun və
hesabatlılığın səviyyəsi qənaətbəxş hesab oluna bilməz və kənd təsərrüfatı məhsullarının
istehsalçıları tərəfindən müxtəlif dövlət orqanlarına və bələdiyyələrə təqdim
olunan hesabatlardakı rəqəmlər arasında ciddi uyğunsuzluqların olması bu sahənin
daha sürətlə inkişaf etdirilməsinə əngəl törədən əsas amillərdən biridir.
Xüsusi olaraq vurğulanıb ki, görüləcək işlərin məqsədi kənd təsərrüfatı sahəsində
fəaliyyət göstərən şəxslərin vergiyə cəlb edilməsi yox, digər aidiyyatı dövlət
qurumları və bələdiyyələrlə birlikdə real vəziyyəti düzgün əks etdirən uçotun
qurulmasının təmin edilməsidir. Qeyd olunub ki, kənd təsərrüfatı məhsulları
istehsalçıları uçot aparmamaqla və hesabat təqdim etməməklə, 3-cü şəxslərin
vergidən yayınmasına şərait yaratmış olurlar ki, bu da yolverilməzdir. Digər tərəfdən,
uçota alınmadan fəaliyyət göstərənlər, uçotda olub öz fəaliyyətlərini şəffaf şəkildə
quranlara nisbətən müvəqqəti də olsa, bəzi üstünlüklər əldə edir, qeyri-sağlam
rəqabət mühitinin formalaşmasına səbəb olurlar.
S.Ələkbərov bildirib ki, avqust ayından
etibarən bütün ölkə ərazisində ilkin olaraq kənd təsərrüfatı məhsulları
istehsalçıları və kənd təsərrüfatı təyinatlı torpaqların mülkiyyətçilərinin
uçota alınması prosesinə start verilib və ötən müddət ərzində 11 minə yaxın şəxsin
vergi uçotuna alınması təmin edilib. 3500-ə yaxın vergi ödəyicisinin fəaliyyət sahəsi
dəqiqləşdirilib, onlardan 1539-nun mükəlləfiyyəti dəyişdirilib. Fəaliyyəti
passiv göstərilmiş 200-ə yaxın vergi ödəyicisinin fəaliyyəti aktivləşdirilib. Vergilər Nazirliyinin Yerli qurumların fəaliyyətinin
əlaqələndirilməsi baş idarəsinin rəisi Elçin Bəylərov kənd təsərrüfatı sahəsində
uçot və hesabatlılığın təşkili və tətbiqi sahəsindəki mövcud vəziyyət, Ərazi
vergi orqanlarının aidiyyəti dövlət qurumları ilə birlikdə görəcəkləri işlərlə
bağlı hazırlanmış proseslər xəritəsi barədə təqdimatla çıxış edib. Vergilər Nazirliyinin 14 saylı Ərazi Vergilər
İdarəsinin rəisi Səməd Vəliyev idarənin nəzarət dairəsinə aid olan rayonlarda kənd
təsərrüfatında uçotun dürüstləşdirilməsi və şəffaflaşdırılması ilə bağlı görülən
işlər, qarşıya çıxan suallar və problemlər barədə məlumat verib. Sonda görüş iştirakçılarını maraqlandıran
suallar cavablandırılıb. GOYEZEN.AZ
Facebook-da paylaş