Qazaxda təmir olunan çoxmənzilli binaların sayı gündən-günə artır
Xəbər verdiyimiz kimi,
Qazaxda bu gün həlli vacib olan məsələlərdən və görülən işlərdən biri də
rayonda mövcud olan çoxmənzilli binaların təmiridir. Son 3 ildə ölkə
prezidentinin müvafiq Sərəncamlarına əsasən rayondakı 163 çoxmənzilli yaşayış
binasından artıq 100-dən çoxunun təmir olunaraq sakinlərin istifadəsinə
verilməsi bu sahənin diqqət mərkəzində olmasından xəbər verir. Şəhərin Heydər Əliyev
prospektində yerləşən hər biri 4 blokdan, 5 mərtəbədən ibarət olan 173 və 175
saylı, eləcə də 9 mərtəbəli, 2 bloklu 179 saylı, Azadlıq küçəsi 107 saylı
binalarda təmir işlərinin aparılması, Azadlıq küçəsində yerləşən 206A saylı
binanın qarşısında isə sakinlərin istəyi nəzərə alınaraq xeyir-şər evinin
tikilməsi, Bakı küçəsi 1 ünvanında yerləşən 3 bloklu, 5 mərtəbəli, 30 mənzilli
binada isə suvaq işlərinin yekunlaşması bu istiqamətdə görülən işlərin əyani
sübutudur. Çoxmənzilli binaların
təmiri ilə bağlı görülən məqsədyönlü işlərin nəticəsidir ki, bu gün rayonda
təmir olunan binaların sayı gündən-günə artır. Qazax Rayon İcra
Hakimiyyətinin başçısı Rəcəb Babaşov bu gün təmir olunması nəzərdə tutulan şəhərin
Heydər Əliyev prospektində yerləşən 127 saylı binadan sonra daha bir neçə
binada olub, sakinlərlə görüşüb. Şəhərin Ələddin Qədirov küçəsində yerləşən 2 mərtəbəli 2 və 3
bloklu 2,3,4 saylı binalarda mövcud vəziyyətlə tanış olan rayon rəhbəri digər
binalar kimi, bu binaların da yaxın günlərdə təmir olunacağını bildirib. Yaşadıqları binaların təmir
olunması xəbərini böyük sevinc hissi ilə qarşılayan sakinlər buna görə ölkə
başçısı İlham Əliyevə minnətdarlıqlarını bildiriblər. Vətəndaşların yaşayış
şəraitinin yaxşılaşdırılması istiqamətində Qazaxda görülən genişmiqyaslı işləri,
həyata keçirilən tədbirləri, xüsusilə də çoxmənzilli binaların təmirini yüksək
qiymətləndirdiklərini vurğulayıblar. GOYEZEN.AZ
Facebook-da paylaş