Qazaxda suvarma arx və kanallarının təmizlənməsi uğurla davam edir
Bu gün Qazax
rayonu istər aparılan tikinti-quruculuq işlərinə, istərsə də kənd təsərrüfatı
sahəsində qazanılan uğurların ildən-ilə artmasına görə bütün bölgələr arasında
seçilir. Bunu rəqəmlərin
müqayisəsindən də aydın şəkildə görmək olar. Belə ki, 2016-cı ildə 16520,6
hektarda, 2017-ci ildə 18694,37 hektarda, 2018-ci ildə 20633 hektarda əkin
aparılmışdır. 2016-cı illə 2017-ci ili müqayisə edərkən yaranan fərq 2173,77
hektar, 2017-ci illə 2018-ci ili müayisə etdikdə isə bu rəqəm 1938,63 hektar
olmuşdur. 2019-cu ildə isə 21476,30 hektarda əkin işlərinin aparılması nəzərdə
tutulmuşdur. Əgər 2019-cu ili 2018-ci illə müqayisə etsək görərik ki, 843,3
hektar artırılaraq ümumi əkin sahəsi 21476,30 hektara çatdırılmışdır. Məhsuldarlığın artırılmasının əsas şərtlərindən biri
də bitkilərin vaxtlı-vaxtında suvarma suyu ilə təmin olunmasıdır. Bu məqsədlə
Qazax Rayon İcra Hakimiyyətinin başçısı Rəcəb Babaşovun tapşırığına əsasən hər
il suvarma arxları və kanalları təmir olunur, kol-kosdan və lildən təmizlənir. 2017-ci ildə 269,71 km arx və kanalların təmizlənməsi
nəzərdə tutulduğu halda 274,78 km məsafədə təmizlənmə işi aparılmışdır.
2018-ci ildə də 261,19 km məsafəyə qarşı 302,44 km arx və kanallarda təmizlik
işləri görülmüşdür. 2019-cu ildə də 266,58 km məsafədə arx və kanallarda
təmizlik işlərinin aparılması nəzərdə tutulmuşdur. Lakin əvvəlki illərdə olduğu
kimi, 2019-cu ildə də bu rəqəmin artacağı gözlənilir. Payızlıq əkin sahələrinin vaxtında suvarılması,
kəndlilərin suvarma suyu ilə yüksək səviyyədə təmin olunması məqsədilə suvarma
arx və kanallarının təmizlənməsinə başlanılıb. Bütün kəndlər üzrə aparılan təmizlik
işləri uğurla davam etdirilir. Belə ki, bu gün ümumi rayon üzrə təmizlənməsi nəzərdə
tutulan 266,58 km-in 9,61 km-i təmizlənib. Qazax Rayon İcra Hakimiyyətinin başçısı Rəcəb
Babaşov Prezident Administrasiyasının məsul işçisi Orxan Mürsəlovla birlikdə bu
gün arxlarda təmizlik işləri aparılan bir neçə kənddə olub, görülən işlərlə
yaxından maraqlanıblar. Yuxarı Salahlı kəndində görülən işlərlə
tanışlıq zamanı bildirilib ki, kənd üzrə 26,6 km məsafədə arx və kanallarda təmizlik
işlərinin aparılması nəzərdə tutulub. Bunun da 16,10 km-nin texnika, 8,50
km-nin isə əl əməyi ilə təmizləndiyi qeyd olunub. Artıq bu günə kimi qeyd
olunan məsafədən 100 metrin texnika və əl əməyi vasitəsilə təmizləndiyi
bildirilib. Bu gün rayon rəhbəri və administrasiya nümayəndəsi Daş
Salahlı kəndində arxlarda aparılan təmizlik işləri ilə də tanış olub. "Daş Salahlı” SİB-in
icraçı direktoru Almara Abdullayeva arxlarda aparılan təmizlik işləri barədə məlumat
verərək bildirib ki, ötən il olduğu kimi, bu il də işlərə böyük sürətlə start
verilib. Qeyd edib ki, kənd üzrə
17,25 km məsafədə arx və kanallarda təmizlik işlərinin aparılması nəzərdə
tutulub. 12,80 km-in texnika, 4,45 km-in isə əl əməyi ilə təmizlənəcəyini
çatdırıb. Texnikanın işləyə bilmədiyi yerlərdə kənd sakinlərinin iştirakı ilə əl
əməyinin gücündən istifadə edildiyini bildirib. SİB direktoru istər ötən il, istərsə də bu ilin yazında aparılan bu
təmizlik işləri nəticəsində həm suyun ötürücülük gücünün artdığını, həm də su
itkisinin qarşısının alındığını qeyd edib. Ümumilikdə, kənd təsərrüfatının su
ilə təmin olunması istiqamətində həyata keçirilən bu ümumrayon işinin sadə
kəndlilər və təsərrüfatla məşğul olan insanlar tərəfindən yüksək
qiymətləndirildiyini bildirib. Rayon rəhbərliyinin təşəbbüsü ilə həyata
keçirilən bu işin rayonda kənd təsərrüfatının inkişafı istiqamətində atılan ən
uğurlu addımlardan biri olduğunu bildirərək bütün kənd sakinləri adından
minnətdarlığını çatdırıb. GOYEZEN.AZ
Facebook-da paylaş