İcra başçısı şəhid ailələrini qəbul edib
Bu gün Azərbaycan dövlətinin müstəqilliyinin,
suverenliyinin və ərazi bütövlüyünün təmin edilməsi və qorunub saxlanması üçün
ölkənin hərbi qüdrətinin artırılması, hərbi-sənaye kompleksinin inkişaf
etdirilməsi, silahlı qüvvələrin döyüş qabiliyyətinin gücləndirilməsi və
mənəvi-psixoloji vəziyyətinin daha da yüksəldilməsi dövlətin ən ümdə
vəzifələridir. Son illər ölkəmizdə hərbi sahəyə ayrılan
xərclərin əhəmiyyətli dərəcədə artırılması ölkənin müdafiə potensialının
gücləndirilməsi ilə yanaşı, silahlı qüvvələrdə xidmət edən hərbi qulluqçuların
etibarlı sosial müdafiəsinin təmin edilməsinə, mənzil-məişət problemlərinin
həll olunmasına, onlara verilən imtiyaz və güzəştlərin miqyasının
genişləndirilməsinə də şərait yaratmışdır. Bu gün dövlət siyasətinin mühüm
istiqamətlərindən biri də hərbi qulluqçulara dövlət icbari sığortasının
tətbiqidir. 1997-ci il avqustun 2-də "Hərbi qulluqçuların dövlət icbari şəxsi
sığortası haqqında” Azərbaycan Respublikasının Qanunu qüvvəyə mindikdən sonra
hərbi qulluqçuların həlak olması, itkin düşməsi və ya xəsarət alması zamanı
sığorta ödənişlərinin verilməsinə dair normativ hüquqi baza formalaşdırılmış,
belə ödənişlərlə bağlı maliyyə təminatı məsələsi həll edilmiş və Qanuna uyğun
olaraq sığorta ödənişlərinin verilməsinə başlanılmışdır. Azərbaycan Respublikasının ərazi bütövlüyü uğrunda həlak olmuş, ölmüş və
hərbi əməliyyatlarla əlaqədar xəbərsiz itkin düşdüyünə görə ölmüş elan edilmiş
hərbi qulluqçuların ailə üzvlərinin sosial müdafiəsinin yaxşılaşdırılması ilə
bağlı əlavə tədbirlər haqqında Respublika Prezidenti İlham Əliyevin 19 aprel
2018-ci il tarixli Fərmanı şəhidlərimizə və onların ailə üzvlərinə dövlət tərəfindən
göstərilən diqqət və qayğının bariz nümunəsidir. 1997-ci il avqustun 2-dək Azərbaycan
Respublikasının ərazi bütövlüyü uğrunda həlak olmuş, ölmüş və hərbi
əməliyyatlarla əlaqədar xəbərsiz itkin düşdüyünə görə ölmüş elan edilmiş hərbi
qulluqçuların vərəsələrinə bu Fərmanla müəyyənləşdirilmiş qaydada 11.000 (on
bir min) manat məbləğində birdəfəlik ödəmənin verilməsi şəhid ailələrinin
sosial müdafiəsinin yaxşılaşdırılmasına xidmət edir. Qazax rayonu da Vətən,
torpaq, xalq uğrunda 285 şəhid verib. 7 nəfər igid oğlu Azərbaycanın
Milli Qəhrəmanı adına layiq görülüb. Rayonda Vətənin
müstəqilliyi və ərazi bütövlüyü uğrunda canından keçən şəhidlərimizə, onların
ailə üzvlərinə olan qayğı həmişə yüksək səviyyədə olub. Rayon rəhbərinin
fəaliyyətə başladığı ilk gündən şəhidlərimizin ailə üzvlərinə daim qayğı ilə
yanaşması, şəhidlərimizin uyuduğu qəbiristanlıqların, onların xatirəsinə
ucaldılmış abidələrin, parkların, bulaqların, xiyabanların abadlaşdırılması,
yenilənməsi, əsaslı şəkildə təmir edilməsi bunun əyani sübutudur. Şəhərin
mərkəzində yerləşən Şəhidlər Xiyabanı, orada aparılan abadlıq işləri, ən əsası
da 285 şəhidin adı və şəkli əks olunmuş lövhənin vurulması bu istiqamətdə
görülən işlərin daha bir göstəricisidir. Bu gün
rayonumuza ayrı-ayrı dövlətlərdən gələn qonaqların qürur yerimiz olan bu
müqəddəs məkana baş çəkməsi, memorial önünə tər çiçəklər düzməsi, əziz
xatirələrini ehtiramla yad etmələri şəhidlərə olan ehtiramın daha bir
nümunəsidir. Bundan əlavə, rayonda keçirilən tədbirlərin öncə bu müqəddəs
məkanı ziyarətlə başlaması, məktəblilərin mütəmadi olaraq xiyabanı ziyarət etmələri,
şəhidlərimizin doğum və anım günlərinin qeyd olunması onların daim qəlblərdə
yaşaması deməkdir. Hər kəsə yaxşı
məlumdur ki, rayon rəhbəri fəaliyyətə
başladığı ilk gündən mütamadi olaraq şəhid ailələri ilə görüşlər keçirir. Lazım
gəldikdə isə fərdi şəkildə qəbul edir, qayğıları ilə maraqlanır. İcra başçısı Rəcəb Babaşov bu gün də bir qrup şəhid ailəsini qəbul edib,
arzu və istəklərini dinləyib. Şəhid analarından Surayə Cəbiyevanın, Mərziyyə Qurbanovanın, Həqiqət
Musayevanın, Tamaşa Mustafayevanın, şəhid ailələrindən Gülheyran Əhmədovanın,
Fatma Cəfərovanın, Sakibə Quluyevanın, şəhid atası Mayıl Hacıyevin, şəhid
qardaşı Amil Əhmədovun birdəfəlik ödəmə ilə bağlı müraciətlərini dinləyən icra başçısı onlar tərəfindən qaldırılan hər bir
məsələyə diqqətlə yanaşılacağını bildirib. Vətəndaşlar tərəfindən qaldırılan
məsələ ilə bağlı aidiyyəti üzrə tapşırıqlar verib. Çıxış edən şəhid ailələri bu gün dövlət başçısı və rayon rəhbərliyi
tərəfindən onlara göstərilən diqqət və qayğıdan razı qaldıqlarını bildiriblər.
Onları qəbul etdiyinə və səmimi münasibət göstərdiyinə görə minnətdarlıqlarını
çatdırıblar. GOYEZEN.AZ
Facebook-da paylaş