2020-ci ilin 27 sentyabrında Ermənistanın təxribatlarına cavab olaraq başlayan 44 günlük Vətən müharibəsində əldə olunan tarixi Zəfər xalqımızın yaddaşına qızıl hərflərlə yazıldı. 2023-cü ilin 19-20 sentyabrında Qarabağ iqtisadi rayonunda keçirilən antiterror əməliyyatında ölkəmizin ərazi bütövlüyü və suverenliyi tam bərpa edildi. Bununla da Konstitusiyanın hüquqi qüvvəsi işğaldan azad olunmuş bütün ərazilərdə təmin olundu və dövlət hakimiyyətinin tam suveren tətbiqi bərqərar edildi. Respublika Prezidentinin 19 sentyabr 2024-cü il tarixli Sərəncamına əsasən hər il 20 sentyabr tarixi ölkəmizdə Dövlət Suverenliyi Günü kimi qeyd olunmaqdadır. Bu gün xalqımızın dövlətçilik iradəsini, suveren hüquqlarımızın bərpasını və tarixi ədalətin təminini simvolizə edir. Bu qərar həmçinin, Konstitusiyanın qəbul edilməsinin 30 illiyi, dövlət suverenliyinin möhkəmləndirilməsi və milli dövlətçilik ənənələrinin geniş təbliği məqsədi daşıyır. 2025-ci ilin “Konstitusiya və Suverenlik İli” elan edilməsi isə dövlətçilik tariximizin mühüm mərhələsi olmaqla, həm Konstitusiyanın 30 illiyini, həm də 44 günlük Zəfərlə bərpa olunmuş ərazi bütövlüyünün və möhkəmlənmiş suverenliyin əhəmiyyətini bir daha vurğulayır.

2025-ci il “Konstitusiya və Suverenlik İli” çərçivəsində ölkəmizin hər yerində olduğu kimi, Qazaxda da müxtəlif səpkili tədbirlər, konfranslar, dəyirmi masalar, müxtəlif maarifləndirici tədbirlər, ağacəkmə aksiyaları keçirilir.

Noyabrın 28-də Qazax Rayon İcra Hakimiyyəti və Bakı Dövlət Universitetinin Qazax filialının birgə təşkilatçılığı ilə 2025-ci il “Konstitusiya və Suverenlik İli”nə həsr olunmuş "Ümummilli Lider Heydər Əliyev Müstəqil Azərbaycan Konstitusiyasının müəllifidir" mövzusunda Respublika Elmi Konfransı keçirilib. 

Bakı Dövlət Universitetinin Qazax filialında Heydər Əliyev auditoriyasında keçirilən tədbirdə Qazax Rayon İcra Hakimiyyətinin başçısı Rəcəb Babaşov, icra aparatının məsul şəxsləri, Bakı Dövlət Universitetinin Qazax filialının direktoru, dosent Arif Rüstəmov, Azərbaycan Dövlət Pedaqoji Universitetinin professoru Elman Quliyev, Bakı Dövlət Universitetinin, Azərbaycan Dövlət Aqrar Universitetinin, Gəncə Dövlət Universitetinin, Mingəçevir Dövlət Universitetinin, Bakı Dövlət Universitetinin Qazax filialının professor və müəllim heyəti, Azərbaycan Milli Elmlər Akademiyasının üzvləri, şəhid ailələri, KİV nümayəndələri iştirak ediblər.

Tədbir iştirakçıları əvvəlcə Ulu Öndərin adını daşıyan parkda abidəsi önünə gül dəstələri düzərək dahi şəxsiyyətin əziz xatirəsini ehtiramla anıblar. Ümummilli Liderin adını daşıyan Mərkəzə baxış keçirərək onun həyat və fəaliyyətini özündə əks etdirən stendlərlə tanış olublar. 

Daha sonra konfrans öncəsi iştirakçılar BDU-nun Qazax filialında məzun şəhidlərin xatirəsini əbədiləşdirən guşəyə baxış keçirib, igid Vətən oğullarını ehtiramla anıblar.

Konfrans öz işinə Heydər Əliyev adına ideoloji zalda start verib. Azərbaycan Respublikasının Dövlət Himni səsləndirilib, Ulu Öndər Heydər Əliyevin və torpaqlarımızın ərazi bütövlüyü uğrunda canlarını fəda etmiş şəhidlərin əziz xatirəsi birdəqiqəlik sükutla yad edilib. Eyni zamanda, mövzuya uyğun videoçarx nümayiş etdirilib. 

Tədbirin aparıcısı, Bakı Dövlət Universitetinin Qazax filialının Tədris və elmi işlər üzrə direktor müavini, fizika-riyaziyyat üzrə fəlsəfə doktoru, dosent Məmməd Yusifov tədbiri açıq elan edərək iştirakçıları salamlayıb, səmimi ürək sözlərini bölüşüb. 

Bakı Dövlət Universitetinin Qazax filialının direktoru, dosent Arif Rüstəmov giriş sözü ilə çıxış edərək konfrans iştirakçılarını salamlayıb, keçirilən tədbirin əhəmiyyətindən söz açıb. A.Rüstımov Azərbaycan xalqının keşməkeşli yol keçdiyini, tarixin ağır sınaqlarından hər zaman üzüağ, alnıaçıq çıxdığını qeyd edib. Bu illər ərzində öz milli kimliyini, adət-ənənələrini qoruyub saxladığını söyləyib. Prezident, Silahlı Qüvvələrin Müzəffər Ali Baş Komandanı İlham Əliyevin rəhbərliyi altında 2020-ci ilin 27 sentyabrında başlayan 44 günlük Vətən müharibəsində şanlı ordumuzun Azərbaycan xalqına zəfər sevincini bəxş etməklə yanaşı, xalqımızın qəhrəman oğullarını da bir daha öz xalqına tanıtdığını vurğulayıb. 44 günlük müharibədə döyüş meydanında misilsiz igidlik nümunələri göstərən qəhrəman ordumuzun Müzəffər Ali Baş Komandanın rəhbərliyi altında şəhidlərimizin qisasını aldığını, onların qanının yerdə qalmadığını vurğulayıb. 2023-cü il sentyabrın 19-20-də Azərbaycan Ordusunun Qarabağda keçirdiyi lokal xarakterli antiterror tədbirləri zamanı qanları ilə tarix yazan qəhrəman oğullarımızın sayəsində Xankəndi və Xocalı şəhərinin separatçılardan təmizləndiyini, Azərbaycan dövlətinin suverenliyini tam bərpa etdiyini, bu gün doğma Qarabağda, Şuşada, Xankəndidə, Xocalıda, işğaldan azad olunmuş digər torpaqlarımızda üçrəngli Azərbaycan Bayrağının dalğalandığını qeyd edib. Bu gün qalib Azərbaycan xalqının işğaldan azad olunmuş şəhərlərin azad olunduğu tarixləri xüsusi gün olaraq qürurla qeyd etdiyini, artıq xalqımızın ölkə başçısının müvafiq sərəncamlarına əsasən hər il sentyabrın 20-sini Azərbaycan Respublikasında Dövlət Suverenliyi Günü, Xankəndi, Xocalı, Xocavənd və Ağdərə şəhərləri günü kimi də qeyd etdiklərini söyləyib. Ölkə Prezidentinin müvafiq sərəncamı ilə 2025-ci ilin “Konstitusiya və Suverenlik İli” elan olunmasını yüksək qiymətləndirən A.Rüstəmov bu ilin təntənə ilə qeyd olunduğunu, filial olaraq bu ilə həsr olunmuş silsilə tədbirlər, inşa müsabiqələri, konfranslar keçirildiyini qeyd edib. 

Qazax Rayon İcra Hakimiyyətinin başçısı Rəcəb Babaşov çıxış edərək tədbir iştirakçılarını salamlayıb, səmimi ürək sözlərini çatdırıb. İcra başçısı 2025-ci il “Konstitusiya və Suverenlik İli” çərçivəsində "Ümummilli Lider Heydər Əliyev Müstəqil Azərbaycan Konstitusiyasının müəllifidir" mövzusunda keçirilən Respublika Elmi Konfransın əhəmiyyətini qeyd edərək tədbirin keçirilməsində əziyyəti olan insanlara razılığını ifadə edib. İcra başçısı Ulu Öndər Heydər Əliyevin səsləndirdiyi “Azərbaycanın müstəqil dövlət olması, xalqımızın azadlığa çıxması tarixi hadisələrdir və biz bunları qiymətləndirməli, əldə edilmiş nailiyyətləri əbədiləşdirməliyik. Bu, istər bizim, istərsə də gələcək nəsillərin qarşısında duran strateji vəzifədir” müdrik fikrini səsləndirərək bugünkü konfransın bu baxımdan mühüm əhəmiyyət daşıdığını bildirib. Azərbaycan dövlətçiliyinin, milli müstəqilliyinin daimi və dönməz xarekter alması, müstəqil və uğurlu daxili-xarici siyasət, beynəlxalq aləmdə nüfuzunun artması və dünya birliyində sivil ölkə kimi tanınması məhz Heydər Əliyevin böyük zəhmətlərinin nəticəsidir. 2025-ci il Respublika Prezidenti İlham Əliyevin müvafiq Sərəncamı ilə “Konstitusiya və Suverenlik İli” elan edilmişdir. Məhz bu il 1995-ci il noyabrın 12-də qəbul olunmuş müstəqil Azərbaycan Respublikasının Əsas Qanunu olan ilk Konstitusiyasının qəbul edilməsinin 30 illiyi və 2020-ci il sentyabrın 27-də Ermənistanın təxribatlarına cavab olaraq başlanmış Vətən müharibəsində tarixi Zəfərin 5-ci ildönümüdür. Bu Sərəncam dövlətçilik tariximizin daha da dərindən öyrənilməsi baxımından xüsusi əhəmiyyət daşıyır. Dövlət başçısı İlham Əliyev tərəfindən imzalanan Sərəncam ölkəmizin keçmişi, bu günü və gələcəyi üçün xüsusi məna ifadə edərək, hüquqi dövlətçilik və suverenlik dəyərlərinin yeni qlobal çağırışlar əsasında formalaşdırılması üçün bir fürsət kimi dəyərləndirilə bilər. “Konstitusiya və Suverenlik İli” dövlətin hüquqi əsaslarının möhkəmləndirilməsi, dövlət suverenliyinin daha da gücləndirilməsi məqsədi daşıyır. Suverenlik istənilən dövlətin mövcudluğunun və davamlı inkişafının ilkin və əsas şərti qismində çıxış edir. Tam qətiyyətlə və cəsarətlə demək olar ki, Heydər Əliyevin Azərbaycana rəhbərlik etdiyi dövr onun tarixinin xüsusi, ən intensiv inkişaf mərhələsini təşkil edir. Bu mənada həmin dövrü tariximizin nəinki sürətli və hərtərəfli yüksəliş illəri, bəlkə də yeni tarix adlandırmaq daha dəqiq qiymətləndirmə nümunəsi olardı. Tarixi şəxsiyyətlər xalqların talelərinə mühüm təsir göstərmək qüdrətinə malik olduğundan, onların ideyaları, enerjiləri, fəaliyyətləri ayrı - ayrı dövrlərin inkişaf meyillərini müəyyən edir, tarixin təkanverici qüvvəsi missiyasını yerinə yetirir. Azərbaycan xalqının taleyinə müxtəlif dövrlərdə müstəsna təsir göstərmiş dahi şəxsiyyətlər sırasında Heydər Əliyevin misilsiz yeri olduğu danılmaz həqiqətdir. Azərbaycan xalqının Ümummilli Lideri müasir tariximizə dahi xilaskar, böyük qurucu kimi daxil olmuşdur. Heydər Əliyevin respublikaya rəhbərliyinin bütün fəlsəfəsi xalqın milli dirçəlişi, milli qürur hisslərinin oyanışı məramına hesablanmışdı. Heydər Əliyevin fəaliyyətinin təhlili göstərir ki, Ulu Öndər sanki gələcəyi görür, Azərbaycanın gələcək müstəqilliyi üçün hələ sovet dövründə mütəmadi iş aparmışdır. Bu ideyanın əsasında, ilk növbədə, yüksəkixtisaslı milli kadr potensialının yaradılması dayanırdı. Bildiyimiz kimi 1991-ci ildə dövlət müstəqilliyini yenicə bərpa etmiş ölkəmiz onu itirmək təhlükəsi qarşısında qalmışdı. Ölkədə müharibə gedirdi. İdarəçilik isə yox dərəcəsində idi. Respublikada xaos, anarxiya hökm sürürdü. Yeganə nicat yolunu Heydər Əliyevin qayıdışında görən Azərbaycan xalqı onu təkidlə hakimiyyətə çağırırdı. Xalqımız inanırdı ki, Azərbaycanı düşdüyü bu ağır vəziyyətdən, sosial-iqtisadi, hərbi-siyasi böhrandan yalnız Heydər Əliyev xilas edə bilər. Belə ağır bir dövrdə xalqın təkidi ilə hakimiyyətə qayıdan Heydər Əliyev doğma Vətənin xilası naminə misilsiz fədakarlıq nümayiş etdirdi, ölkəmizi xaos və anarxiyadan qurtardı. Bütün sahələrdə müşahidə olunan dərin tənəzzülün qarşısı alındı və ölkəmiz dayanıqlı inkişaf yoluna qədəm qoydu. Heydər Əliyevin Azərbaycan xalqının yaddaşında qurucu və xilaskar dövlət xadimi, milli lider və xalq məhəbbətini qazanan öndər kimi əbədilik qazanması göründüyü kimi heç də təsadüfi deyil. Ümummilli Liderin ölkə rəhbərliyinə qayıdışı ilə bir çox sahələrdə genişmiqyaslı islahatların, o cümlədən qanunvericilik islahatlarının həyata keçirilməsinə başlanıldı. 1995-ci il noyabrın 12-də referendum yolu ilə müstəqil Azərbaycanın ilk Konstitusiyası qəbul edildi. Bununla da Azərbaycan demokratik inkişafın yeni mərhələsinə qədəm qoydu. Müzəffər Ali Baş Komandan İlham Əliyevin rəhbərliyi ilə rəşadətli Azərbaycan Ordusunun 2020-ci il sentyabrın 27-də Ermənistanın təxribatlarına cavab olaraq başlanmış Vətən müharibəsində tarixi qələbəsi və 2023-cü il sentyabrın 19–20-də həyata keçirilmiş uğurlu antiterror əməliyyatı nəticəsində ölkəmizin ərazi bütövlüyü və suverenliyi tam bərpa edilmiş, Azərbaycan Konstitusiyasının hüquqi qüvvəsi işğalın aradan qaldırıldığı bütün ərazilərdə bərqərar olmuşdur. Respublika Prezidentinin 2024-cü il 19 sentyabr tarixli 294 nömrəli Sərəncamına əsasən, sentyabrın 20-si Azərbaycan Respublikasında Dövlət Suverenliyi Günü elan edilmişdir. Bu gün Azərbaycan dünyada ən sürətli və dinamik inkişaf edən dövlətlərdən biridir. Ölkənin iqtisadi qüdrətinin artması onun müstəqil siyasət yeritməsinə, əhalinin rifah halının ildən-ilə yüksəlməsinə imkan yaradır. İkinci Qarabağ müharibəsində qazanılmış parlaq Qələbə güclü dövlət-güclü ordu konsepsiyasının təntənəsidir. Otuz il işğal altında qalan torpaqlarımız məhz bu konsepsiyanın nəticəsində hərbi-siyasi yolla azad olundu, ərazi bütövlüyümüz təmin edildi. Regionun gündəliyini bu gün Azərbaycan diktə edir. Dünya gücləri Azərbaycanın yaratdığı yeni reallıqlarla hesablaşırlar. Ulu Öndər Heydər Əliyevin müəyyənləşdirdiyi inkişaf strategiyasına uyğun olaraq, nəhəng transmilli nəqliyyat və enerji layihələri həyata keçirən Azərbaycanın bu təşəbbüsləri dünyanın aparıcı dövlətləri tərəfindən dəstəklənir, ölkəmizə iqtisadi-siyasi dividentlər qazandırır. Azad olunmuş torpaqlarımızda genişmiqyaslı bərpa-quruculuq işləri heç kəsdən yardım alınmadan Azərbaycanın öz imkanları hesabına sürətlə davam etdirilir, Böyük Qayıdış Proqramı çərçivəsində ilk uğurlu addımlar atılır. Bu gün Ulu Öndərin siyasi kursunun layiqli davamçısı olan Prezident, Müzəffər Ali Baş Komandan İlham Əliyevin elmə əsaslanan iqtisadi siyasəti respublikanın sosial-iqtisadi inkişafı prosesində dinamizmi və məqsədyönlülüyü təmin etmiş, qarşıda duran vəzifələrin həllinə real imkanlar açmış, cəmiyyətin ümumi potensialının milli məqsədlər naminə səfərbər olunmasına etibarlı zəmin formalaşdırmışdır. Cənab Prezidentin müəyyən etdiyi strateji xəttə əsaslanaraq dayanıqlı iqtisadi inkişafın təmin olunması məqsədilə çevik, adekvat addımlar atılıb, kompleks islahatların həyata keçirilməsi nəticəsində makroiqtisadi sabitlik möhkəmləndirilib, biznes və investisiya mühiti daha da yaxşılaşdırılıb. Aparılan genişmiqyaslı iqtisadi islahatların nəticəsində Azərbaycan iqtisadiyyatı dünya miqyasında rekord templərlə inkişaf etmiş və etməkdədir. Bu iqtisadi inkişaf müstəqilliyimizi möhkəmləndirir, beynəlxalq aləmdə Azərbaycanın rolunu və nüfuzunu gündən-günə artırır. Beynəlxalq aləmdə qüdrətli ölkə kimi tanınan Azərbaycanın əldə etdiyi hər bir uğur Ulu Öndər Heydər Əliyevin adı ilə bağlıdır. Xalqımız Ulu Öndər Heydər Əliyevin əziz xatirəsini həmişə uca tutur və minnətdarlıqla anır. Müstəqil Azərbaycan Ulu Öndərin indiki və gələcək nəsillərə əmanəti, onun zəngin və çoxşaxəli irsi bizlər üçün qiymətli bir xəzinədir. Biz Ulu Öndərin Azərbaycan xalqı və dövləti qarşısında xidmətlərinin miqyasını, dəyər və əhəmiyyətini zaman ötdükcə daha aydın hiss edirik. Heydər Əliyev dühası, onun siyasi məktəbi və dövlətçilik kursu tarximizin bundan sonrakı mərhələlərində də özünü daim göstərəcək. Azərbaycan dövləti hələ uzun illər öz inkişafında o liderdən bəhrələnəcəkdir. Əminik ki, Heydər Əliyev yolu Azərbaycana daha böyük uğurlar qazandıracaqdır.

Bakı Dövlət Universitetinin Qazax filialında İctimai və təbiət fənləri kafedrasında baş müəllim, pedaqogika üzrə fəlsəfə doktoru Mübariz Süleymanov, Bakı Dövlət Universitetindən R.e.d Habil Fəttayev, Gəncə Dövlət Universitetinin dosentləri Cavid Bağırzadə, Etibar Musayev, Mingəçevir Dövlət Universitetinin F.e.d Flora Namazova, Bakı Dövlət Universitetinin Qazax filialının Baş müəllimi Ülviyyə Bayramova, Əməkdar müəllim İndira Vəliyeva, filialın müəllimi Cəvahir Mustafayeva mövzu ətrafında çıxış ediblər. Konfransda çıxış edən natiqlər bildiriblər ki, Azərbaycan Respublikasının Konstitusiyası ölkəmizin dövlət müstəqilliyinin, suverenliyinin və vətəndaş azadlıqlarının ən ali təminatıdır. Bu sənəd yalnız hüquqi sistemin əsasını deyil, həm də milli dövlətçiliyin rəmzini təşkil edir. Konstitusiyanın qəbul edilməsi Ulu Öndər Heydər Əliyevin Azərbaycan dövlətçiliyi qarşısındakı ən böyük xidmətlərindən biri kimi dəyərləndirilir. Bu sənəd müstəqil dövlət quruculuğu prosesini tənzimləyən, demokratik inkişafın hüquqi bazasını formalaşdıran və insan hüquqlarını qoruyan mükəmməl hüquqi əsas oldu. 30 il bundan əvvəl Ulu Öndər Heydər Əliyevin təşəbbüsü, bilavasitə rəhbərliyi ilə referendum yolu ilə Azərbaycan Respublikası Konstitusiyası qəbul edildi. İlk milli Konstitusiya xalqın dövlətçilik iradəsinin suverenliyinin, təcəssümünə çevrilən fundamental hüquqi sənəd oldu. Cəmiyyətin ictimai siyasi institutlarının fəaliyyətini, dövlətin idarəçilik sistemini tənzimlədi. Konstitusiya təkcə müstəqil yaşamaq haqqını təmin etmiş ölkənin dövlətçiliyinin hüquqi bazası deyil, həm də xalqın inkişaf prioritetlərini müəyyənləşdirən, hökumətin fəaliyyətini nizamlayan, insanların cəmiyyətdə və bir-birinə münasibətdə əxlaqi davranışlarını qaydaya salan hüquqi sənəddir. Ölkəmiz də 1991-ci il 18 oktyabrda dövlət müstəqilliyini elan etdi, sonra beynəlxalq birliyin tam üzvü oldu, demokratik cəmiyyətin atributu, xalqın iradəsinin ifadəsi kimi Konstitusiya qəbulunu qarşıya məqsəd qoydu. Yəni bu Konstitusiyanın qəbul edilməsi bir xalqın totalitar rejimdən liberal cəmiyyətə transfer olunmaq istəyərək demokratik cəmiyyət formalaşdırmaq istəyi idi. Müasir demokratik dövlətdə suverenliyin daşıyıcısı xalq olduğu üçün, hakimiyyətin mənbəyi xalq olduğu üçün konstitusiya da xalq tərəfindən qəbul edilir.

Plenar iclasın sonunda “Konstitusiya və Suverenlik İli”nə həsr olunmuş tələbələr arasında İnşa müsabiqəsinin qalibləri mükafatlandırılıb. Konfrans öz işini bölmələr üzrə davam etdirib.