Qazax rayonunda bərpa olunmuş kəhriz və içməli su bölgüsü infrastrukturu bərpa edilərək yerli icmaya təhvil verilib
Birləşmiş
Millətlər Təşkilatının Miqrasiya Agentliyi olan Beynəlxalq Miqrasiya
Təşkilatının Azərbaycandakı nümayəndəliyi (BmqT Azərbaycan) Koreya Beynəlxalq
Əməkdaşlıq Agentliyinin (KOICA) maliyyə dəstəyi ilə həyata keçirdiyi
"Azərbaycanda kəhriz su sistemlərinin bərpası vasitəsilə məcburi köçkünlərin
məskunlaşdığı ərazilərdə kənd yerlərinin kompleks inkişafı” layihəsi
çərçivəsində Qazax
rayonunun Çaylı kəndi ərazisində "Çaylı”
kəhrizini və içməli su bölgüsü infrastrukturunu bərpa edərək yerli icmanın
istifadəsinə verib. Məlumat
üçün bildirək ki, qeyd edilən layihə çərçivəsində "Çaylı” kəhrizində bərpa işlərinə
15.10.2021-ci il tarixdə başlanılıb, 01.05.2022-ci il tarixdə başa çatdırılıb. "Çaylı”
kəhrizinin bərpası Beynəlxalq Miqrasiya Təşkilatının Azərbaycan nümayəndəliyi və
Qazax rayonunun Çaylı kəndində yaradılmış "Çaylı” Sudan İstifadə Edənlər Komitəsi
(SİEK) tərəfindən imzalanmış müqavilə və Beynəlxalq Miqrasiya Təşkilatının Azərbaycan
nümayəndəliyi ilə 4 nömrəli Kəhriz Bərpa Qrupu arasında imzalanmış müqavilə əsasında
həyata keçirilib. Ümumi uzunluğu 2877 metr,
quyuların sayı 46 ədəd olan "Çaylı” kəhrizində Kəhriz Bərpa Qrupu tərəfindən 17
ədəd quyuda və 837,3 metr uzunluğunda tunellərdə bərpa işləri aparılıb. Bərpadan
sonrakı su sərfi 125 litr/saniyə (bərpadan əvvəlki su sərfi isə 10 litr/saniyə)
olub. İyunun
20-də "Çaylı” kəhrizinin təhvilvermə mərasimində Qazax Rayon İcra Hakimiyyəti başçısı
aparatında Sosial-iqtisadi inkişafın təhlili və proqnozlaşdırılması şöbəsinin
müdir müavini Azad Hümbətov, Beynəlxalq Miqrasiya Təşkilatının Azərbaycanda
Missiya rəhbəri Vladimir Gjorgjiev, baş mühəndis Arzu Musayev və ictimaiyyətlə əlaqələr
üzrə məsul şəxs Elnarə Qafarova, RİH başçısının Çaylı kənd İƏD-si üzrə nümayəndəsi
Mehman Eyvazov, Çaylı bələdiyyəsinin sədri Müqabil Pirverdiyev, "Çaylı” Sudan İstifadə Edənlər Komitəsinin üzvləri və digər kənd sakinləri iştirak ediblər. Onu da
qeyd edək ki, layihə ənənəvi və dayanıqlı su təchizatı sistemi olan kəhrizlərin
bərpası vasitəsilə region əhalisini təhlükəsiz və davamlı su ilə təminatı
məqsədini daşıyır. Bununla yanaşı, məqsəd Azərbaycanda kənd təsərrüfatı
icmalarının enerjisiz su təchizatını təmin etməklə kənd təsərrüfatı
məhsuldarlığını və yaşayış imkanlarını artırmaqla məcburi iqtisadi miqrasiyanın
qarşısının alınmasına töhfə verməkdir. Kəhrizlərin bərpası ilə yanaşı, layihə
gender, idarəetmə və ətraf mühitin davamlılığı kimi məsələlərə xüsusi diqqət
yetirərək icma tərəfindən idarə olunan bir yanaşmanı tətbiq etməyə davam edir.
GOYEZEN.AZ
Facebook-da paylaş