Dünya
ölkələri arasında sürətlə yayılmaqda davam edən, Ümumdünya Səhiyyə Təşkilatı tərəfindən
qlobal pandemiya elan olunan koronavirus (COVID-19) infeksiyası Azərbaycandan
da yan keçmədi. Bunu nəzərə alaraq virusun yayılmasının qarşısının alınması
istiqamətində bütün dövlətlərlə yanaşı, Azərbaycan dövləti də təxirəsalınmaz tədbirlər
həyata keçirdi. Ölkə başçısı İlham Əliyevin birbaşa rəhbərliyi altında Nazirlər
Kabineti yanında Operativ Qərargah tərəfindən Ümumdünya Səhiyyə Təşkilatının tələb
və tövsiyələrinə uyğun olaraq ölkəmizdə koronavirus infeksiyasının yayılmasının
qarşısının alınması istiqamətində görülən zəruri işlər bu gün də uğurla davam
etdirilir. Azərbaycan koronavirusla mübarizənin başladığı ilk
gündən etibarən bütün mümkün ola biləcək tədbirləri zamanında icra etdi və ölkə
əhalisinin sağlamlığının qorunması istiqamətində mühüm addımlar atdı.
Bütün dünya dövlətlərində olduğu kimi, Azərbaycanda daCOVID-19 pandemiyasına
qarşı vaksinasiya prosesi həyata keçirilir. Yanvar ayından start verilən və qorxulu
pandemiyadan yeganə xilas yolunun vaksinasiya olduğunu nəzərə alaraq bu sahədə
görülmüş işlər uğurla davam etdirilir.
Bu gün hər bir vətəndaş onu bilməlidir ki,
vaksin
etdirmək insanı və ətrafındakıları qorumaq üçün ən yaxşı üsuldur. İnsanı 1 və ya 2 həftə xəstə edən COVID-19
virusu qohumlar, uşaqlar və ya iş yoldaşları üçün ölümcül ola bilər. Dünyada
hər il yüzlərlə insan peyvənd olunmadığı üçün vaksin tövsiyə edilən xəstəliklər
ucbatından həyatını itirir, uşaqlarına, valideynlərinə və məsuliyyət daşıdığı
insanlara qarşı öz öhdəliklərini yerinə yetirə bilmir.
Hər kəs
onu da yaxşı bilməlidir ki, vaksinlər xəstəliyə yoluxma zamanı ağırlaşma və ölüm
hallarının qarşısını alan təhlükəsiz vasitədir. Çünki immun sistemi
vaksini antigen kimi qəbul edir və ona qarşı anticisimlər yaradır. Orqanizm peyvənd vasitəsilə virusla tanış olduğu üçün artıq xəstəliklə
qarşılaşanda hazırlıqlı olur və ağırlaşmanın qarşısı alınır. Vaksin öldürülmüş
və ya zəiflədilmiş mikroblar və onların ifraz etdiyi bəzi antigen xassəli maddələr olduğu üçün xəstəliyə yoluxma zaman
qarşıya çıxan canlı virusla müqayisədə heç bir təhlükəsi yoxdur. Bütün klinik
yoxlamalar 10 minlərlə insana tətbiqi zamanı bəzi hallarda yalnız zəif allergik
reaksiya ilə nəticələnmişdir.
Bu gün
hər bir vətəndaş onu da dərk etməlidir ki, dünyanı cənginə alan bu xəstəlik
yaşa baxmır. Gənc və sağlam insanlar da
xəstələnə bilər və həyatını itirə bilər. Belə nümunələr həm ölkəmizdə, həm də
dünyada yüzlərlədir. Gənclər xəstəliyi simptomsuz və yüngül keçirsələr də,
ətraflarında olan digər insanlara böyük təhlükə yarada bilərlər. Bu səbəbdən
vaksin həyatları xilas etmək üçün yeganə yoldur. Maska taxmaq, sosial məsafə
saxlamaq, gigiyena və s. kimi tədbirlər görmək virusa məruz qalmaq və ya
başqalarına yoluxdurmaq şansını azaldır. Sağlam qidalanmaq, idmanla
məşğul olmaq və sağlamlıq müayinələrindən keçmək kimi vaksinlər də insanların
sağlam olmasında mühüm rol oynayır. Lakin bu tədbirlər kifayət etmir.
Peyvəndlər immunitet sistemimizi virusla mübarizə aparmağa hazır edir.
Vaksinasiya
olunan hər kəs başa düşməlidir ki, onlar tək özlərini deyil, ətrafdakı
insanları da qorumuş olurlar. Peyvəndlər digər insanları da qoruyur. Çox az sayda olsa da vaksinasiyaya əks göstərişi olan insanlar da var.
Peyvənd olunanlar qazanılan immunitet sayəsində onları da qorumuş olur. Bu
siyahıya vaksinasiya strategiyasına uyğun olaraq hamilə qadınlar, süd verən
analar, 18 yaşdan kiçik vətəndaşlar da aiddir. COVID-19-a qarşı hazırlanmış
peyvəndlər dünyada təxminən 3,9 milyona yaxın insanın ölümünə səbəb olan
pandemiyanı dayandırmaq üçün həyati əhəmiyyətə malikdir.
Tarixin
bütün dönəmlərində hər zaman məlum olub ki, yoluxucu xəstəliklər zamanı
bəşəriyyətin xilası vaksinlə mümkün olub. Əminliklə demək olar ki, peyvəndlənməyi
seçmək yaşamağı seçmək deməkdir.1990-2017-ci illərdə vərəm, hepatit B, difteriya və s. kimi vaksinlə qarşısı
alına biləcək xəstəliklərdən minlərlə insan həyatını itirdi. Vaksinin olmaması
səbəbindən 1346-1352-ci illərdə Avropa əhalisinin 25‑30%‑i vəba xəstəliyindən
ölüb. 1916-1920-ci illərdə İspaniya qripi 2 milyard dünya əhalisinin 30%-nə
yoluxmuş və 20 ilə 50 milyon insanın ölümünə səbəb olmuşdu. Ən kiçik ehtimalla
müqayisə etsək, bu xəstəlik Birinci Dünya müharibəsində ölənlərdən daha çox
insanı məhv edib. 1618-ci ildə 20
milyon olan Meksikadakı İnka əhalisinin sayı çiçək xəstəliyi səbəbindən 1,6
milyona düşüb. Havay adalarında tifo xəstəliyi səbəbindən 1779-cu ildə əhali
sayı 500 mindən 84 minə düşüb. Son yüz ildə peyvəndlər bir çox xəstəliyin
zərərlərinin və ölüm hallarının azalmasına kömək olub. 1960-cı illərdə qızılca
xəstəliyinə qarşı peyvənd icad olunana qədər hər il bu xəstəlikdən təxminən 2,6
milyon adam ölürdü. ÜST-in məlumatına görə 2000-2017-ci illər ərzində qızılca
xəstəliyi ilə bağlı ölümlərin sayı 80% azalıb.
Bu gün
tibb sahəsində əldə edilmiş uğurlu nəticələr onu söyləməyə əsas verir ki, müasir
peyvəndlər milyonlarla insanın həyatını xilas edib. Peyvəndlər icad olunana qədər dünya bugünkündən daha çox təhlükədə idi.
Cəmi bir neçə on il əvvəl milyonlarla insan poliomielit xəstəliyinin qurbanı
olurdu - bu xəstəliyə yoluxanları ya iflic, ya da ölüm yaxalayırdı. Hazırda
poliomielit tamamilə yox olub.
Sözügedən xəstəliklərin qısa tarixcəsinə nəzər
salanda bir daha əmin oluruq ki, vaksinasiya cəmiyyətimiz və ölkəmiz üçün olduqca
önəmlidir. Ən əsası da uşaqların
gələcəyi üçün vaksin vacibdir. COVID-19 səbəbindən dünyanın hər yerində
şagird və tələbələrin təhsili məhdudlaşıb. Dünyada 1 milyarda yaxın şagird
təhsilini davam etdirə bilmədi. Pandemiya "müasir dövrdə təhsilə vurulan ən
böyük zərbə” hesab edilə bilər. Bu səbəbdən vaksinasiya təhsildəki itkiləri bərpa etmək və uşaqlara
etibarlı bir gələcək yaratmaq üçün çox vacibdir.
Bütün
sahələrdə olduğu kimi, peyvənd olunmaqla iqtisadiyyata vurulan ziyanın qarşısı da
alın bilər. COVID-19 səbəbindən turizm,
iaşə obyektləri, hava yolu, səyahət və s. sahələrdə böyük iqtisadi itkilər
yaşandı və dünyada milyonlarla insan iş yerini itirdi. Dünyada iqtisadi
itkilərin bərpa olunması üçün vaksinasiya yeganə yoldur. Vaksinasiya ilə mədəni
həyat canlanacaq (konsertlər, kino, teatr, sərgilər və s.) insanların gündəlik
həyatında sosial aktivlik artacaq. Peyvənd milyonlarla insanın ölümünün
qarşısının alınması, səhiyyə sisteminin rahatlaması və xəstəliyə xərclənən
iqtisadi itkilərin azaldılması üçün yeganə üsuldur. Vaksinasiya ilə səhiyyəyə
düşən yük azalacaq. Həkimlər öz gücünü və səylərini digər xəstəliklərin
müalicəsinə yönəldə biləcəklər. Nəticədə səhiyyə xidmətlərinin keyfiyyəti
artmış olacaq. Müasir dövrdə yoluxucu xəstəliklərə qarşı mübarizə üsullarından
ən effektli və iqtisadi cəhətdən ən əlverişlisi vaksinasiyadır.
Bu gün
hər bir ölkə vətəndaşı fəxrlə söyləyə bilər ki, Azərbaycan dövləti əhalinin
sağlamlığının qorunmasını özünün əsas vəzifəsi hesab edir. Bunu vətəndaşlar pandemiya
təhlükəsi başlayanda dövlətin atdığı vacib addımlardan da bir daha aydın
şəkildə gördülər. Prezident İlham Əliyevin göstərişi əsasında Nazirlər Kabinetinin Sərəncamı ilə
2020-ci il 30 yanvar tarixində "Azərbaycan Respublikasında yeni koronavirus xəstəliyinin
yayılmasının qarşısının alınmasına dair Fəaliyyət Planı” təsdiq edildi, 2020-ci
il 27 fevral tarixində koronavirus xəstəliyinin Azərbaycan ərazisində yarada
biləcəyi təhlükənin qarşısının alınması, profilaktik və təxirəsalınmaz tədbirlərin
operativ həyata keçirilməsi məqsədilə Nazirlər Kabinetinin yanında aidiyyəti
dövlət orqanlarının və qurumlarının rəhbər şəxslərindən ibarət Operativ Qərargah
yaradıldı və bütün bu tədbirlər pandemiya ilə mübarizədə öz müsbət təsirini
göstərdi.
Bütün bunların kökündə isə Prezident İlham
Əliyevin pandemiya ilə mübarizədə təyin etdiyi dəqiq yol xəritəsi dayanır. Prezident İlham Əliyevin 2020-ci ilin aprel ayında
nazirlərin iştirakı ilə keçirdiyi iclasda söylədiyi: "Bizim üçün prioritet məsələ,
- mən bunu qeyd etmişəm, bir daha demək istəyirəm, - insanların sağlamlığıdır,
insanların həyatıdır və insanların sosial müdafiəsidir” fikri hər birimiz üçün
örnək və nümunədir. Hər kəs bilməlidir ki, bu aydın hədəflər nəticəsində Azərbaycanın
səhiyyə sistemi tez bir zamanda COVID-19-la mübarizəyə səfərbər edildi və
pandemiya səbəbindən işsiz qalan əhalinin sosial müdafiəsi gücləndirildi.
Uzaqgörən və çevik qərarlar Azərbaycanın dünyada vaksinasiya prosesinə başlayan
ölkələr sırasında ilk cərgədə qərarlaşmasına səbəb oldu.
Bir daha
əminliklə söyləyə bilərik ki, Azərbaycan dövləti daim əhalinin sağlamlığını
düşünür. Nazirlər Kabinetinin 2021-ci il 16 yanvar
tarixli Sərəncamı ilə "Azərbaycan Respublikasında COVID-19 xəstəliyi əleyhinə
2021-2022-ci illər üçün Vaksinasiya Strategiyası”nın qəbul olunması da bu sahədə
atılan ən uğurlu addımlardandır. Prezident İlham Əliyevin böyük uzaqgörənliklə
ölkəmizi daxil etdiyi vaksinasiya platformaları öz bəhrəsini verir. Bunun nəticəsidir
ki, bu gün ölkəmizdə artıq əhalinin 4 növ vaksin seçimi var.
Onların hər biri effektiv və təhlükəsizdir.
"Sağlam
və firavan gələcək öz əlimizdədir!”. Bu gün hər birimizin ən böyük şüarı bu
olmalıdır. Əhalidə kütləvi immunitet xəstəliyə yoluxub sağalanlar və vaksin
etdirənlər hesabına yaranır. Hazırda ölkəmizdə 2,9 milyon vaksinasiya olunan,
330 min nəfər isə xəstəliyə yoluxub sağalan şəxs vardır. Yalnız ölkə əhalisinin
70‑80%-dən çoxunda kütləvi immunitetin yaranması epidemioloji sabitlik yarada
bilər.
Son aylarda COVID-19 infeksiyasına
yoluxma hallarının sayında əhəmiyyətli azalma və ümumi epidemioloji vəziyyətin
müsbətə doğru dəyişməsi də məhz həyata keçirilən səmərəli tədbirlərin təzahürüdür.
2021-ci ilin əvvəlindən həyata keçirilməsinə başlanmış vaksinasiya prosesinin
uğurla davam etdirilməsinin nəticəsidir ki, xüsusi karantin rejimi çərçivəsində
tətbiq olunmuş bir sıra məhdudiyyətlərin aradan qaldırılmasına əlavə imkanlar
yaranır. Nazirlər Kabineti yanında Operativ Qərargahın 2021-ci il
iyulun 1-dən bir sıra şərtlər nəzərə alınmaqla şənlik mərasimlərinin (toy,
nişan, ad günləri və s.) keçirilməsinə icazə verilməsi haqqında qərar qəbul etməsi
də bu dediklərimizin bariz nümunəsidir.
Respublikamızın hər yerində olduğu
kimi, Qazax rayonunda da əhalinin peyvənd olunması prosesi
uğurla davam etdirilir. Vaksinasiya prosesi başlandığı gündən indiyədək rayon
üzrə vətəndaşlara 72
min 237 doza vaksin vurulub ki, birinci
doza vaksin vurulmuş şəxslərin sayının 40
min 538 nəfər, ikinci doza vaksin vurulmuş şəxslərin sayı isə 31 min 699 nəfərdir.
Əminik ki, Azərbaycan xalqı pandemiya ilə mübarizədə də, Vətən
müharibəsində də "Biz birlikdə güclüyük!” düşüncəsi ilə qalib oldu. Vaksinasiya
prosesində də bu şüarı əldə rəhbər tutaraq qalib gələcək.
GOYEZEN.AZ
Geri qayıt
|