Şanlı Qələbəmizi şərtləndirən amillər

Son illərdə suveren Azərbaycanın siyasi həyatında baş verən ən önəmli hadisə əzəli və tarixi torpaqlarımızın işğaldan azad olunmasıdır. 2003-cü ildən başlayaraq Prezident İlham Əliyev bütün xarici səfərlərində, mötəbər beynəlxalq təşkilatlarda, ölkədə keçirilən beynəlxalq əhəmiyyətli rəsmi görüşlərdə ərazi bütövlüyümüzün bərpasının prinsipial məsələ olduğunu, Azərbaycan xalqının torpaqlarmızın işğalı ilə barışmayacağını, Azərbaycan ərazisində ikinci erməni dövlətinin yaranmasına yol verilməyəcəyini bəyan edirdi. "...Ərazilərin qaytarılması mənim prinsipial mövqeyim olub”. Qarabağda elan olunan separatçı rejimi dəstəkləyən Minsk qrupu həmsədr dövlətlərinə tutarlı cavab olaraq bildirmişdir ki, onların ölkəsində ermənilərin kompakt olaraq yaşadıqları şəhərləri var. Əgər onlar çox istəyirlərsə ikinci erməni dövlətini öz ölkələrində yarada bilərlər.
Ölkə Prezidenti İlham Əliyev son günlərdəki çıxışlarında 17 illik idarəçilik dövrünü torpaqlarımızın geri qaytarılması prosesinə hazırlıq dövrü adlandırmışdır. Bu hazırlıq bir çox istiqamətləri əhatə edirdi.
Mənəvi hazırlıq əsas amillərdən biri kimi haqlı mübarizəyə inama, tarixə və milli köklərə bağlılığa, gənc nəslin vətənpərvərlik ruhunda tərbiyəsinə əsaslanırdı. "Vətən sevgisi, vətənpərvərlik Qələbəmizin əsas amilinə çevrildi”.
İqtisadi hazırlıq siyasi uğurun, qələbəmizin əsas şərti idi. Bu gün Azərbaycan iqtisadi sahədə istənilən meyar üzrə qabaqcıl yerlərdədir. İqtisadi güc siyasi müstəqilliyimizə əsas verir, eyni zamanda ölkənin müdafiə qabiliyyətinin yüksəldilməsinə zəmin yaradır. İqtisadi inkişafın əsas şərti ölkədaxili sabitlikdir. Sabitlik yeni investisiyaların cəlb olunmasına və etibarlılığına təminat verir. Azərbaycanın etibarlı tərəfdaş imici imkan yaratdı ki, müharibədən dərhal sonra Qarabağda bərpa və quruculuq işlərinə xarici şirkətlər tərəfindən investisiyalar cəlb olunsun.
Digər hazırlıq istiqaməti beynəlxalq münasibətlərin müsbət məcrada axarı idi. Həmçinin, qarşıda duran mübarizə üçün hüquqi bazanın yaradılması idi. BMT Təhlükəsizlik Şurasının qətnamələri, BMT Baş Assambleyasının qərar və qətnamələri, Avropa Şurası Parlament Assambleyası, Avropa Parlamenti, İslam Əməkdaşlıq Təşkilatı, Qoşulmama Hərəkatı kimi beynəlxalq qurumların qərarları və qətnamələri Azərbaycan üçün bu müharibədə hüquqi baza oldu. Bu illər ərzində Azərbaycan işğalçı dövlət Ermənistan istisna olmaqla digər qonşu və xarici dövlətlərlə dostluq və əməkdaşlıq şəraitində, regional, beynəlxalq enerji və nəqliyyat layihələrini reallaşdırdı. Uzun illərdir ki, Azərbaycan mötəbər beynəlxalq təşkilatlarla əməkdaşlıq edir. Dövlətimiz "Şərq Tərəfdaşlığı” ölkələrindən biri olaraq Avropa İttifaqına (Aİ) üzv olan 9 dövlət ilə əməkdaşlıq edir, Aİ ilə bərabərhüquqlu saziş üzərində işləyir və bu sazişin əsas hissəsi artıq razılaşdırılmışdır. Bu illər ərzində dünya ictimaiyyətinin diqqətini ərazilərimizin işğal olunmasına, maddi-mənəvi irsimizin talan olunmasına yönəltmək məqsədilə Prezident İlham Əliyev bütün beynəlxalq qurumlara çağırışlar edirdi ki, onlar bu münaqişənin həlli üçün təsirli addımlar atsınlar.
Əsas amillərdən biri Ordu quruculuğu hazırlığı, strateji və hərbi-texniki əməkdaşlığın inkişaf etdirilməsi idi. Vətən müharibəsində qardaş Türkiyədən və digər tərəfdaş dövlətlərin müdafiə sənayesinə məxsus müasir silahlardan istifadə edildi. Bu müharibəni XXI əsrin müharibəsi adlandırmağa əsas verən texnologiyanın son nailiyyətlərinə uyğun silahların tətbiqi, həm də yüksək peşəkarlıqla hazırlanmış döyüş taktikası idi.
Bütün bu istiqamətlər sonda bir nöqtədə birləşərək Şanlı Qələbəmizə apardı.
Bizi güclü edən bir cəhət də xalqımızın mübarizliyi, arxa cəbhənin dəyanəti, informasiya müharibəsinin vətəndaşlar tərəfindən də qətiyyətlə aparılması idi. Qələbəni qazandıran dövlət başçımızın güclü siyasi iradəsi, sarsılmaz Xalq-Prezident, Müzəffər Ali Baş Komandan-Rəşadətli Ordumuzun Dəmir Yumruq kimi birliyi idi.
Bu müharibə ordumuza təcrübə qazandırdı və digər dövlətlər üçün təcrübə mənbəyi olaraq öyrənilir. İnkişaf etmiş ölkələrin hərbi mütəxəssisləri Vətən müharibəsinin hər bir gününü təhlil edirlər. Bu qələbə həm də Azərbaycan gəncliyinin qələbəsi idi.
Dövlət başçımızın 17 illik idarəçilik dövründə milli dəyərlərə bağlı, vətənpərvərlik ruhunda yetişmiş gənclər qanları və canları bahasına torpaqlarımızı işğaldan azad etdilər. "Döyüşdə qəhrəmanlıq göstərən, öz şücaətləri ilə dünya hərbi ekspertlərini heyrətə salan, 2003-cü ildə 10 yaşı, 15 yaşı olan, bu illər ərzində vətənpərvərlik tərbiyəsi almış 18-35 yaşlı gənclər idi. Onlar bu torpaqları azad etdilər... Əllərində silahlar, əllərində bayraqlar, ürəklərində Vətən sevgisi”.
Prezident seçkilərindən sonra ərazi bütövlüyümüzün bərpası birinci dərəcəli vəzifə olaraq müəyyən olunmuşdu və bu vəzifə uğurla icra olundu. Tarixi ədalət bərpa olundu. Bakıda Bayraq Meydanının açılışında Prezident İlham Əliyev "Gün gələcək Azərbaycan Bayrağı işğal edilmiş torpaqlarda, o cümlədən Şuşada qaldırılacaq” - demişdi.
Qələbəmizin təsdiqi günü kimi yaddaşımızda qalan 14 yanvar tarixində ölkə Prezidenti Şuşa şəhərinə səfəri zamanı müqəddəs bayrağımızı qaldırdı. Bu söz və əməlin vəhdəti idi. Bu, bir daha sübut etdi ki, Azərbaycan Prezidenti İlham Əliyev dediyini edir. Və bir də demədiyini də edir, çünki, deməyi lazım bilmir!
Yeganə GÖYÜŞLÜ,
Yeni Azərbaycan Partiyası Qazax Rayon
Təşkilatı Qadınlar Şurasının sədri