Qazaxlı ziyalıların əməyinə verilən qiymətə görə ölkə başçısına minnətdarıq

İyulun 22-si Azərbaycanda Milli Mətbuat Günü kimi qeyd olundu. Mətbuat sahəsində çalışan insanlar 145 il əvvəl - 1875-ci il iyulun 22-də görkəmli ziyalı və maarifçi-publisist Həsən bəy Zərdabi tərəfindən Azərbaycan dilində nəşr olunmağa başlamış "Əkinçi” qəzetinin milli mətbuatımızın ilk nümunəsi və həmin dövr Azərbaycanın ictimai-siyasi həyatının mühüm hadisəsi kimi tarixə düşdüyü günü şərəf və qürurla qeyd etdilər. "Azərbaycan milli mətbuatının 145 illik yubileyinin keçirilməsi haqqında” Azərbaycan Respublikasının Prezidenti İlham Əliyevin 30 iyun 2020-ci il tarixli sərəncamını minnətdarlıq və razılıq hissi ilə qarşılayan mətbuat işçiləri, qələm sahibləri dünən daha bir neçə sərəncamın sevincini yaşadılar.
Ölkə başçısı tərəfindən "Azərbaycan Respublikasında mətbuata əlavə maliyyə yardımının ayrılması haqqında”, "Kütləvi informasiya vasitələrinin nümayəndələrinə Azərbaycan Respublikası Prezidentinin fərdi təqaüdünün verilməsi haqqında”, "Azərbaycan Respublikasının kütləvi informasiya vasitələri nümayəndələrinin təltif edilməsi haqqında”, "Azərbaycan Respublikasının kütləvi informasiya vasitələrinin əməkdaşlarına fəxri adların verilməsi haqqında”, "Kütləvi informasiya vasitələri əməkdaşlarının "Azərbaycan Respublikası Prezidentinin fəxri diplomu” ilə təltif edilməsi haqqında” 22 iyul 2020-ci il tarixli sərəncamların imzalanması bir daha onu sübut etdi ki, Azərbaycanda mətbuat sahəsinə, bu sahədə çalışan insanlara verilən qiymət, göstərilən qayğı hər zaman yüksək səviyyədə olub.
Sevindirici haldır ki, ordenə layiq görülənlər və fəxri ad alanlar arasında Qazaxın iki dəyərli oğlu, ziyalısı da yer aldı.

"Ayna", "Zerkalo" qəzetlərinin təsisçisi və baş redaktoru, Azərbaycan Jurnalistlər Birliyinin sədri Şıxlinskiy Elçin İsmayıl oğlu (Elçin Şıxlı) 3-cü dərəcəli "Vətənə xidmətə görə” ordeni ilə təltif olundu.
Qazaxımızın daha bir ziyalı oğlu "Şərq" qəzetinin təsisçisi və baş redaktoru, "Tərəqqi" medalı laureatı Vəliyev Akif Abduləzim oğlu (Akif Aşırlı) isə "Əməkdar Jurnalist” fəxri adına layiq görüldü.
Bu, ölkə Prezidenti İlham Əliyev tərəfindən təkcə iki qazaxlı ziyalının əməyinə verilən qiymət deyil, eyni zamanda, bütün qazaxlı ziyalılara verilən böyük qiymət və dəyərdir.
Biz də öz növbəmizdə hər iki ziyalımızı orden və fəxri ad almaları münasibətilə təbrik edir, gələcək işlərində yeni-yeni uğur və nailiyyətlər arzulayırıq. Ölkə başçısına qazaxlı ziyalılara verilən yüksək dəyərə görə ziyalılar adından minnətdarlığımızı bildiririk.
GOYEZEN.AZ