Əsas Səhifə > Manşet / Mədəniyyət > Şuşasız Qarabağ, Qarabağsız Azərbaycan ola bilməz

Şuşasız Qarabağ, Qarabağsız Azərbaycan ola bilməz


27-03-2021, 13:40


8 noyabr 2020-cil il. Azərbaycanın son 200 ildə ilk dəfə, 44 günlük Vətən müharibəsində əldə etdiyi Zəfərin ən qüdrətli, ən şanlı-şöhrətli günü - Qarabağın döyünən ürəyi  Şuşanın erməni vandallarından azad edildiyi gün. Təkcə Azərbaycanın deyil, bütün dünyanın hərb tarixinə qızıl hərflərlə yazılacaq strateji əməliyyatla Şuşanın igid oğullarımızın şücaəti, canı, qanı bahasına düşməndən azad edildiyi gün.
XVIII əsrdə Pənahəli xan tərəfindən əsası qoyulmuş Şuşa Qarabağın əsas mədəni–iqtisadi mərkəzi olub. Azərbaycanın musiqi beşiyi, Qafqazın konservatoriyası olan Şuşanın təbiəti də sanki cənnətin bir guşəsini xatırladırdı. Təkcə gözəlliklər diyarı deyil, həm də poeziya, musiqi, mədəniyyət beşiyimiz sayılan Şuşa, Qarabağ hələ Heydər Əliyevin Azərbaycana rəhbərliyinin birinci dövrlərində rəhbərliyin diqqət mərkəzində olmuş, bu bölgənin inkişafı, tərəqqisi üçün genişmiqyaslı planlar tərtib edilmiş, tikinti- quruculuq, abadlıq işləri aparılmışdır. Heydər Əliyev Sovet dövründə Qarabağa çox böyük diqqət göstərirdi. O, hakimiyyətdə olduğu dövrlərdə ermənilər Azərbaycana qarşı ərazi iddialarını həyata keçirə bilmədilər, saxtalaşdırılmış xəritələrlə ortalığa çıxan ermənilər Heydər Əliyevin nüfuzu və o bölgənin tarixini, coğrafiyasını dərindən bilməsi sayəsində bir qarış belə torpaq əldə edə bilmədilər. Heydər Əliyev hakimiyyətdən zorla uzaqlaşdırıldıqdan cəmi 15 gün sonra ermənilər öz məkrli niyyətlərini həyata keçirmək üçün fəaliyyətə keçdilər, Azərbaycana qarşı elan edilməmiş müharibəyə başladılar, ərazi iddiaları və havadarlarının dəstəyi ilə başladıqları hərbi əməliyyatlar nəticəsində Azərbaycan ərazilərini, o cümlədən Şuşanı 1992-ci il mayın 8-də işğal etdilər. Düz 28 ilə yaxın bir müddətdə Şuşa da daxil olmaqla, Qarabağ və onun hüdudlarından kənarda olan yeddi rayon düşmən əsarətində qaldı.
”Şuşasız Qarabağ, Qarabağsız Azərbaycan ola bilməz” - deyən Azərbaycan xalqının Ümummilli Lideri Heydər Əliyevin xalqın təkidi ilə hakimiyyətə qayıdışının elə ilk günlərindən siyasətinin əsasında məhz işğalda olan torpaqların azad edilməsi, qaçqın və məcburi köçkünlərin öz doğma yurd-yuvalarına qaytarılması məsələsi dururdu. Bunun üçün isə güclü iqtisadiyyat, səmərəli energetika layihələri həyata keçirməklə güclü ordu quruculuğunun əsasını qoydu, ilk növbədə atəşkəsə nail oldu, ölkənin sabitliyini təmin etdi.
Son 17 ildə Azərbaycan Respublikasının Prezidenti İlham Əliyev Ulu Öndərin siyasi kursuna sadiqlik nümayiş etdirərək bu siyasətin davamı kimi iqtisadiyyatı daha da inkişaf etdirdi, ölkədə sabitliyi qoruyub saxladı, xalq-iqtidar birliyini daha da möhkəmləndirdi, beynəlxalq səviyyədə nüfuzun yüksəlməsi, strateji tərəfdaşlığın inkişafı sahəsində böyük işlər gördü. Azərbaycan beynəlxalq tədbirlər məkanına çevrildi, regionlar modernləşdi, güclü nizam-intizamlı ordu, müasir texnika, hərbi sursatla təmin edilmiş silahlı qüvvələr yaradıldı.
Və "Azərbaycanın ərazi bütövlüyü danışıqlar mövzusu ola bilməz” prinsipi ilə sentyabrın 27-də Ermənistan Silahlı Qüvvələrinin təxribatlarına qarşı başlanılan haqq-ədalət savaşında düşmən diz çökdürüldü, Zəfərə nail olduq. Düşmən əsarətindəki torpaqlarımızı azad etdik və bu gün Füzuliyə, Laçına, Zəngilana, Cəbrayıla, Şuşaya qalib liderin qalib xalqı kimi "Böyük qayıdışı”ın ilk addımlarını atırıq.
Şuşaya səfəri zamanı İlham Əliyev digər işğaldan azad edilmiş ərazilərimiz kimi Şuşanın da bərpa edilməsi ilə bağlı layihələrdən danışaraq bildirdi ki, "Şuşa əzəli Azərbaycan şəhəridir. Şuşa regionun ən gözəl istirahət bölgəsinə çevriləcəkdir. Şuşanın bərpası zamanı bəzi layihələr Heydər Əliyev Fondu tərəfindən icra olunacaq, ermənilər tərəfindən tamamilə dağıdılmış Molla Pənah Vaqifin məqbərəsinin bərpası işlərinə artıq başlanılıb”. Bu məqbərənin 1982-ci il yanvarın 14-də Üzeyir Hacıbəylinin "Koroğlu” uvertürasının sədaları altında Ümummilli Lider Heydər Əliyevin iştirakı ilə açılışı olmuşdu. Heydər Əliyev açılış zamanı geniş nitq ilə çıxış etmiş və bildirmişdi ki, "Şuşa Azərbaycanın tarix və memarlıq abidəsidir, bu cür ənənələr hər il davam etdirilməlidir”. Bu gün Ulu Öndərin ruhu şaddır. Azərbaycanın tarix və memarlıq abidəsi onun siyasi varisi tərəfindən azad edildi və həmin ənənə davam etdirilir. Şuşa bərpa edilir, Şuşa yenidən Qarabağın "Zirvə tacı”na çevrilir. Şuşada əbədi işıqların yanması üçün enerji təminatı ilə bağlı layihələr başlanılır, Şuşanın yenidən qonaqlarını qəbul etməsi üçün "beş”, "dörd”, "üç” ulduzlu otellər tikilir, tarixi abidələr bərpa edilir, yollar çəkilir.
Bütün bunlar xalqın böyük sevgisini, inamını qazanmış güclü, qətiyyətli liderin əzmkarlığı, Vətən, xalq sevgisi, öz milli-mənəvi dəyərlərinə sahibliyi sayəsində reallığa çevrilir. Üzeyir, Natəvan, Bülbül artıq öz doğma torpaqlarındadırlar. Şuşa Azərbaycanın mədəniyyət mərkəzi elan edilib. Şuşada Novruz tonqalları yenidən alovlandırılıb.
Dağıdılsa da, məhv edilsə də Şuşanın əzəməti, qüruru bizi ruhlandırır. Güclü siyasi liderimizin əzmkarlığı bizi ruhlandırır. Rəşadətli ordumuzun gücü bizi ruhlandırır.
Əziz Şuşa biz qayıtmışıq!
Əziz Şuşa sən azadsan!
Əziz Şuşa biz səni dirçəldəcəyik! – deyən cənab Prezident yaşa! Var ol! Şuşanı bizə qaytardığın üçün.
Qazax Rayon Heydər Əliyev Mərkəzi


Geri qayıt