Qazaxda Cəfərli kəndində keçirilən səyyar görüşdə müraciət edən şəhid anasının istəyi də müsbət həllini tapıb

Bu gün ölkəmizdə dövlət siyasətinin əsasında vətəndaş amili, vətəndaş məmnunluğu dayanır ki, bu, hər bir dövlət məmurunun iş fəaliyyətinin tərkib hissəsidir. Ölkə Prezidenti cənab İlham Əliyevin, Birinci vitse-prezident Mehriban xanım Əliyevanın xalqın, vətəndaşların arasında olmaları, onların müraciətlərini, istəklərini dinləmələri bütün dövlət məmurlarına bir nümunədir.

Vətəndaş amili, ölkə başçısının rəhbər vəzifəli şəxsləri qəbul edən zaman dövlət məmurlarına daim vətəndaşlarla təmasda olmaları, bütün kəndləri gəzmələri, kənd camaatı ilə görüşmələri, vətəndaşların ərizə və müraciətlərinə, onları narahat edən problemlərə həssaslıqla yanaşılması barədə aidiyyəti üzrə verdiyi tapşırıq və tövsiyələr Qazax rayonunda da hər zaman örnək götürülür. Rayonda həyata keçirilən bütün işlərdə vətəndaş məmnunluğunun təmin edilməsinə üstünlük verilir. Rayon rəhbərinin vətəndaşlara göstərdiyi qayğı, sakinlərin qaldırdıqları hər bir məsələyə daim həssaslıqla yanaşması bu dediklərimizin əyani sübutudur. 

Noyabrın 20-də Qazax Rayon İcra Hakimiyyətinin başçısı Rəcəb Babaşovun rayonun Cəfərli kəndində yaşayan sakinlərlə keçirilən səyyar görüşü barədə ötən yazımızda məlumat vermişdik. Kənd sakinlərini, eləcə də Vətən müharibəsi şəhidi, ölümündən sonra "Vətən uğrunda”, "Füzulinin azad olunmasına görə”, "Xocavəndin azad olunmasına görə”, “İgidliyə görə”, “Cəbrayılın azad olunmasına görə” medalları ilə təltif olunmuş, Cəfərli kəndinin igid oğlu leytenant Nəsibov Nicat Qəşəm oğlunun anası İlhamə Əhmədovanın etdiyi müraciəti dinləyən rayon rəhbəri səslənən məsələlərə həssaslıqla yanaşılacağını, həlli istiqamətində lazımi addımlar atılacağını söyləmişdi. 

Şəhid anasının evlərinə gedən kənd yolunun xırlanması ilə bağlı müraciətinin bu gün öz müsbət həllini tapması, yolun qreyderlə hamarlanması və 9 maşın şeben danışnaraq tökülməsi dövlətin vətəndaşlara olan növbəti qayğısının, şəhid ailələrinə olan ehtiramın bariz nümunəsidir. Ən əsası da bu onu göstərir ki, səyyar görüşlərin keçirilməsinin arxasında vətəndaş məmnunluğu dayanır və bu, bundan sonra da belə olacaq. 

Sakinlər onlara göstərilən qayğıya və müraciətlərinə baxılmasına görə ölkə Prezidenti İlham Əliyevə, rayon rəhbərliyinə minnətdarlıqlarını bildirirlər. Şəhid anası İlhamə Əhmədova övladının timsalında şəhidlərimizə olan sonsuz ehtirama, şəhid ailələrinə göstərilən qayğıya görə ölkə başçısına, dövlətimizə razılığını ifadə edir. Qazaxda şəhid ailələrinə olan dövlət qayğısını hər zaman hiss etdiyini və buna görə minnətdar olduğunu dilə gətirir.