Qazax teatrı beynəlxalq festivaldan əliboş qayıtmadı
Dünən, 09:54
Respublika mətbuatı Qazax haqqında
Qazax Dövlət Dram Teatrı hazırda özünün yeni yaradıcılıq dövrünü yaşayır. Aparılan islahatlar teatr kollektivinin beynəlxalq festivallara da yolunu açıb. Teatr 2 ildir müxtəlif festival və qastrollarda uğurla iştirak edir.
Bu ilin sentyabr ayında Qazaxıstandan Qazax teatrına məktub gəldi. Məktubda bildirilirdi ki, Qazaxıstanın Astana şəhərində tanınmış yazıçı-dramaturq Roza Mukanovanın 60 illiyinə həsr olunmuş "Teatr-ALL" III Beynəlxalq Teatr Festivalı keçiriləcək və Qazax teatrı da həmin festivala dəvət olunur. Dəvəti böyük məmnuniyyətlə qəbul edən Qazax Dövlət Dram Teatrı həmin festivala qatılmış və uğurla çıxış etmişdir.
Tənqidçilər və münsiflər heyəti Qazax teatrının hazırladığı tamaşaya və aktyorların ifasına yüksək qiymət vermişlər. Festivalın bağlanış mərasimində 8 nominasiya üzrə mükafatlandırma olmuşdur. 12 müxtəlif teatr aktyorları arasında Qazax Dövlət Dram Teatrının rejissoru, Azərbaycanın Əməkdar artisti, sənətşünaslıq üzrə fəlsəfə doktoru Xəzər Gəncəli "Ən yaxşı kişi rolu" nominasiyasında qalib olaraq 500.000 təngə (Qazaxıstan valyutası) pul mükafatına layiq görülmüşdür.
Vətənə dönən teatrın əməkdaşları rayon icra hakimiyyətinin başçısı Rəcəb Babaşovla görüşmüşlər. O, kollektivi əldə etdiyi nailiyyətə görə təbrik etmiş, onlara gələcək fəaliyyətində uğurlar arzulamışdır.
Teatrın direktor səlahiyyətlərini müvəqqəti icra edən Allahverdi Musayev, Əməkdar artist Xəzər Gəncəli onlara yaradılan şəraitdə əməyi olan hər kəsə minnətdarlıqlarını bildirmişlər.
“Azərbaycan” qəzeti, səhifə 9
3 dekabr 2024-cü il
Geri qayıt