Hər
il mayın 18-i dünya ölkələrində Beynəlxalq Muzeylər Günü kimi geniş qeyd
edilir. Beynəlxalq Muzeylər Şurası (ICOM) tərəfindən xalqlar arasında mədəni
mübadilə və əməkdaşlığın inkişafına kömək məqsədilə təsis olunmuş bu bayram hər
il müxtəlif deviz altında keçirilir. Bu il Beynəlxalq Muzeylər Günü "Muzeylərin
gücü” mövzusuna həsr olunub. Beynəlxalq Muzeylər Günü ICOM-un təşəbbüsü ilə
1977-ci ildə təsis edilib. Bu günün məqsədi muzeylərin cəmiyyətin həyatında nə
dərəcədə mühüm rol oynadığını göstərməkdir. Bu bayram qədim tarixə və zəngin
mədəniyyətə malik Azərbaycanda da geniş miqyasda qeyd edilir.
Respublikamızın
hər yerində olduğu kimi, Qazaxda da 18 May - Beynəlxalq Muzeylər Günü qeyd
olunub.
Əlamətdar gün münasibətilə Qazax Tarix-Diyarşünaslıq
və M.P.Vaqif və M.V.Vidadinin Xatirə Muzeylərində "Muzeylər gələcəyə
bələdçidirlər" adlı tədbir keçirilib.
Tədbir M.P.Vaqif və M.V.Vidadinin Xatirə Muzeyindən
start götürüb. "Çadır" otağında muzeyin əməkdaşları, qocaman şair
Bilal Qoca, şairə Tamella Poladlı, Daş Salahlı kənd 1 nömrəli kitabxana
filialının əməkdaşı Hicranə Məmmədova, Ürkməzli kənd sənətkarlıq evinin müdiri,
şairə Gülsənəm Cəlilova, Qaymaqlı kənd folklor evinin müdiri Kazım Kazımlı
şair, mütəfəkkir M.P.Vaqifin şeir və qoşmalarını sazın müşayiəti ilə səsləndiriblər.
Məktəblilərin ifasında Xan qızı Xurşudbanu Nətavan və M.P.Vaqifin
obrazları canlandırılıb.
"Zindan" otağında Qazax Dövlət Dram
Teatrının aktyorlarının ifasında Xalq şairi Səməd Vurğunun "Vaqif"
dramından "Qacarla Vaqifin görüşü" səhnəsi ziyarətçilərə təqdim
olunub.
Sonra tədbir Qazax Tarix-Diyarşünaslıq Muzeyində
davam edib. Muzeyin direktoru Gülnaz Alişanova, Ağstafa
Regional Mədəniyyət İdarəsinin Qazax rayonu üzrə nümayəndəsi Valeh Vəliyev, Mədəniyyət İşçiləri Həmkarlar İttifaqı Qazax Rayon
Komitəsinin sədri İsgəndər Qurbanov çıxış edərək tədbir iştirakçılarını və
qonaqları salamlayıb, Muzeylər Gününün əhəmiyyətindən söz açıblar.
Daha sonra ziyarətçilərə "Şuşa-virtual səyahət"
adlı sənədli film nümayiş etdirilib.
Filmin nümayişindən sonra Qazax şəhər 2 saylı Musiqi
Məktəbinin müəllim və şagirdləri "Könlüm keçir Qarabağdan" adlı
konsert proqramı ilə çıxış ediblər.
Qazax Dövlət Rəsm Qalereyasının dərnək üzvlərinin
Şuşaya həsr olunmuş rəsm əsərlərinə və Qazax Tarix-Diyarşünaslıq Muzeyinin
hazırladığı "Mədəniyyətimizin paytaxtı - Şuşa" adlı fotostendə baxış
keçirilib.
Tədbirdə bizlərə Zəfər tarixini yaşadan şəhidlərimizin
əziz xatirəsi də yad olunub, Muzeyin 2-ci mərtəbəsində 339 nəfər igid Vətən
oğlunun xatirəsinə həsr olunmuş guşə ziyarət olunub. Müzəffər Ali Baş Komandan
İlham Əliyevə, Azərbaycan Ordusuna, torpaqlarımızın azadlığı uğrunda canlarından
keçən şəhidlərimizə, sağlamlığını itirən qazilərimizə sonsuz minnətdarlıq ifadə
olunub.
Onu
da qeyd edək ki, 18 May - Beynəlxalq Muzeylər Günü münasibətilə dünəndən
rayonda fəaliyyət göstərən bütün muzeylərdə, o cümlədən də Qazax Tarix-Diyarşünaslıq Muzeyində "Açıq qapı”
günü elan olunub.
Bu
gün Yeni Azərbaycan Partiyası Qazax Rayon Təşkilatının əməkdaşları, Qazax
Uşaq-Gənclər İnkişaf Mərkəzinin dərnək rəhbərləri və üzvləri, Gənclərin İnkişaf və Karyera Mərkəzinin Qazax nümayəndəliyiningənc könüllüləri, "Qarabağ əlillərinə qayğı" İctimai Birliyinin Qazax
filialının veteran və qaziləri, Qazax şəhər Səlim Əfəndiyev adına 1 nömrəli tam
orta məktəbin, Qazax şəhər Səməd Vurğun adına 2 nömrəli tam orta məktəbin,
Qazax şəhər Namiq Vəliyev adına 5 nömrəli tam orta məktəbin, Qazax
rayon Şəmistan Şahvələdov adına Xanlıqlar kənd tam orta məktəbin, Qazax
rayon İsmayıl Şıxlı adına Kosalar kənd tam orta məktəbin, Qazax
rayon Nizami Hüseynov adına Aşağı Salahlı kənd tam orta məktəbin
şagirdləri muzeyi ekskursiya edib, Qazaxın tarixini, keçmişini, dünənini, bu
gününü özündə yaşadan muzeylə yaxından tanış olublar.
GOYEZEN.AZ
Geri qayıt
|