Qazaxda Ulu Öndər Heydər Əliyevin Azərbaycanda ilk dəfə siyasi hakimiyyətə gəlməsinin 56 illiyinə həsr olunmuş “Böyük tarixi missiyanın başlandığı gün” adlı tədbir keçirilib

İyulun 9-da Qazax Rayon Heydər Əliyev Mərkəzinin və Qazax rayon Mədəniyyət müəssisələrinin birgə təşkilatçılığı ilə xalqımızın Ümummilli Lideri Heydər Əliyevin Azərbaycanda ilk dəfə siyasi hakimiyyətə gəlməsinin 56 illiyi ilə əlaqədar “Böyük tarixi missiyanın başlandığı gün” başlıqlı tədbir keçirilib.

Qazax Rayon Heydər Əliyev Mərkəzində təşkil olunmuş tədbirdə Mərkəzin və Qazax rayon mədəniyyət müəssisələrinin direktor və əməkdaşları iştirak ediblər.

Tədbir Azərbaycan Respublikasının Dövlət Himninin səsləndirilməsi ilə başlanıb. Ulu Öndər Heydər Əliyevin və torpaqlarımızın ərazi bütövlüyü uğrunda canlarını fəda etmiş şəhidlərin əziz xatirəsi birdəqiqəlik sükutla yad edilib. Ulu Öndərin həyat və siyasi fəaliyyətini özündə əks etdirən kitablardan ibarət sərgi nümayiş etdirilib. “Müstəqil dövlətçilik ənənələrimizin təməlində Ulu Öndər Heydər Əliyev dayanır” adlı filmin nümayiş olunub. 

Qazax Rayon Heydər Əliyev Mərkəzinin direktoru Ceyhunə Hüseynova tədbiri giriş sözü ilə açaraq iştirakçıları salamlayıb, tədbirin əhəmiyyətindən söz açıb. C.Hüseynova bildirib ki, dahi siyasi liderimiz öz müdrik fəaliyyəti ilə müasir tariximizin ən şanlı və parlaq salnaməsini yaradıb. Məhz buna görə Ümummilli Liderin xalqa xidmətdə keçən mənalı və ibrətamiz ömrünün hər anı siyasi təqvimimizdə özünəməxsus yerə malikdir. Bugünkü tədbir də siyasi əhəmiyyəti ilə önəmli tarixi hadisələrdən olan 14 iyul 1969-cu ildə Heydər Əliyevin Azərbaycanda rəhbərliyə başlamasının 56-cı ildönümünə həsr edilib. Müasir Azərbaycanın bugünkü sosial-iqtisadi inkişafının əsası məhz elə həmin tarixdən başlanır. Ulu Öndər özü 2001-ci ildə yeni əsr və III minilllik münasibətilə Azərbaycan xalqına müraciətində deyirdi: “Azərbaycanın müasir tarixində 1969-cu ildə dönüş mərhələsinin təməli qoyuldu. Respublikanın dinamik inkişafı üçün kompleks proqramların işlənib hazırlanmasında yorulmaz fəaliyyət, misilsiz təşəbbüskarlıq və nəhəng enerji bütün 70-ci illərin bariz əlamətinə çevrildi. 1970-85-ci illər Azərbaycanın quruculuq salnaməsinə ən parlaq səhifələr kimi daxil olmuşdur. Bu gün tam əminliklə söyləmək olar ki, Azərbaycanın dövlət suverenliyi və iqtisadi müstəqilliyi, sistemli şəkildə artan xarici iqtisadi əlaqələri, dünya iqtisadiyyatına get-gedə daha dərindən inteqrasiya olunması hələ 1970-85-ci illərdə təməli qoyulmuş xalq təsərrüfatı potensialına əsaslanır. SSRİ dövlətinin dağılması ərəfəsində bir çox mütəxəssislər hansı müttəfiq respublikaların iqtisadiyyatının müstəqillik şəraitində özünü təmin etməyə qadir olduğunu müəyyən etməyə cəhd göstərirdilər. Aparılan təhlillər göstərirdi ki, keçmiş SSRİ-də iki respublika tam müstəqil olaraq öz iqtisadiyyatını idarə edə bilər. Bu respublikalardan biri məhz Azərbaycan idi”. Bəli, bu öz həqiqətini tarixi faktlarda da əks etdirir. Doğrudan da xalqımızın böyük oğlu Heydər Əliyevin rəhbərliyi ilə 1969-82-ci illərdə respublikada 250-dən çox zavod, fabrik və digər istehsal müəssisələri istifadəyə verildi, yeni yaşayış binaları, yüzlərlə məktəb, klub, xəstəxana, istirahət evləri tikildi. Bakının ətrafında yeni mikrorayonlar, yaşayış massivləri salındı, rayonlarda tikinti, quruculuq və abadlıq işləri aparıldı, məktəblər, səhiyyə ocaqları, mədəniyyət mərkəzləri, binalar tikilib istifadəyə verildi, istehsal sahələri, sənaye müəssisələri yaradıldı. Azərbaycan aqrar ölkədən, aqrar-sənaye ölkəsinə çevrildi. Azərbaycan elm və təhsilin inkişaf dövrünü yaşadı, ana dilimizin inkişafı xüsusi diqqət mərkəzində oldu. Azərbaycan dünya səviyyəsində tanındı. Heydər Əliyevin nəsillərə nümunə olan həyat yolu xalqa təmənnasız xidmətdə keçib. O, təkcə müstəqil Azərbaycan dövlətçiliyinin əbədiliyini təmin etmədi, həm də müstəqil milli dövlətçiliyin əsasını qoydu, yeni idarəçilik formalaşdırdı. Özünün qurub yaratdığı, şah əsəri olan müstəqil Azərbaycanın taleyini bu məktəbin layiqli davamçısı olan cənab İlham Əliyevə əmanət etdi. 

Qazax Dövlət Rəsm Qalereyasının direktoru Münəvvər Xəlilova çıxış edərək 14 iyul 1969-cu il tarixinin Azərbaycanın yeni həyatında müstəsna yeri olduğunu bildirib. O, qeyd edib ki, respublikamızın mədəni, iqtisadi yüksəlişində, xalqımızın rifah halının yaxşılaşdırılmasında, indiki müstəqil dövlətimizin təməlinin qoyulmasında həmin günün böyük əhəmiyyəti olmuşdur. Azərbaycan KP MK-nın 1969-cu il iyul plenumunda Heydər Əliyevin Azərbaycan Kommunist Partiyası Mərkəzi Komitəsinin birinci katibi vəzifəsinə seçilməsi ilə ölkənin həyatında yeni dövr başlandı. Məhz həmin tarixdən respublika bütün sahələr üzrə köklü islahatlar və sürətli inkişaf yoluna qədəm qoydu. Nəticədə ən geridə qalmış respublikadan ən qabaqcıllar səviyyəsinə qalxan və sürətli inkişaf yolu keçən Azərbaycan keçmiş ittifaqın inkişaf etmiş respublikasına çevrildi. Ölkənin hər yerində infrastruktur layihələr həyata keçirildi ki, bu layihələr bu gün müstəqil Azərbaycanın inkişafına xidmət edir. Ümummilli Lider Heydər Əliyevin təməlini qoyduğu inkişaf strategiyası bu gün Azərbaycan Respublikasının Prezidenti İlham Əliyev tərəfindən çox uğurla davam etdirilir. Ən başlıcası isə ərazi bütövlüyümüz və suverenliyimiz təmin olunub. 

Molla Pənah Vaqifin və Molla Vəli Vidadinin Xatirə Muzeyinin elmi işçisi Esmira Qəribova çıxış edərək 70-ci illərdə və 80-ci illərin birinci yarısında Heydər Əliyevin çoxcəhətli partiya və dövlət idarəçiliyi sayəsində Azərbaycanın ictimai-siyasi həyatı olduqca zənginləşdirməsindən danışıb. Bildirib ki, Heydər Əliyev kimi fitri istedadlı, uzaqgörən, xalqını sonsuz məhəbbətlə sevən, mütəfəkkir bir şəxsiyyətin, praqmatik siyasətçinin Azərbaycana rəhbərlik etməsi respublikanın ictimai-siyasi, iqtisadi və mədəni həyatında sürətli yüksəlişə səbəb oldu. Dahi öndər Heydər Əliyev bütün ömrünü canından artıq sevdiyi xalqına, ölkəsinə həsr edib, tariximizdə müstəqilliyimizin Memarı və Qurucusu olaraq adını əbədiləşdirib. Ulu Öndər Heydər Əliyevin düşünülmüş siyasəti dövlətin gələcək həyatının inkişafına hesablanmışdır. Belə ki, Ulu Öndər Azərbaycan dövlətini və xalqını dövrün ən çətin sınaqlarından çıxararaq, ölkənin ictimai-siyasi, iqtisadi və mədəni-mənəvi tərəqqisinə nail olmuşdur. O, Azərbaycanın dövlət müstəqilliyinin qorunmasında və möhkəmləndirilməsində titanik fəaliyyət göstərərək fundamental uğurlara imza atıb. Ulu Öndər Heydər Əliyevin xalqın təkidli tələbi ilə hakimiyyətə qayıdışından sonra Azərbaycan dövlətinin dirçəlməsində, onun mövqeyinin, təməlinin möhkəmlənməsində əvəzsiz rolu olmuşdur. 

Qazax Rayon Mərkəzləşdirilmiş Kitabxana Sisteminin Komplektləşdirmə və Kitabişləmə şöbəsinin baş biblioqrafı İlahə Məmmədova çıxış edərək bildirib ki, bu gün Azərbaycanın bütün sahələrində Ulu Öndər Heydər Əliyevin böyüklüyü görünür. Onun Şəxsiyyəti, məhz əməllərini yaşadan Azərbaycanda,  bütövlükdə bugünkü inkişafımızda və tərəqqimizdə özünü göstərir. Azərbaycana marağın artması, beynəlxalq aləmdə dövlətimizin tanınması Ulu Öndər Heydər Əliyevin düzgün müəyyənləşdirdiyi siyasət nəticəsində mümkün olub. Ulu Öndər Heydər Əliyevin siyasi kursunun layiqli davamçısı  Prezident İlham Əliyevin yürütdüyü siyasət Azərbaycanın böyük nailiyyətlər əldə etməsinə səbəb olub. Müasir dövrümüzdə Azərbaycan Prezidenti İlham Əliyevin rəhbərliyi ilə ölkədə uğurlu islahatlar aparılır, Azərbaycan regionun lider dövlətinə çevrilib, diplomatiya sahəsində uğurlar əldə edilib. Prezident İlham Əliyevin imzaladığı məqsədyönlü fərman və sərəncamlarla, qəbul etdiyi praqmatik qərarlarla, habelə, obyektiv reallıqdan irəli gələn addımları ilə ölkəmizin dinamik yüksəlişini və insanların rifahının yüksəlməsini təmin edib. 

Canalı kənd Diyarşünaslıq klubunun müdiri Reyhan Omarova çıxış edərək vurğulayıb ki, müstəqil dövlətimizin qurulmasında və möhkəmlənməsində Ümummilli Lider Heydər Əliyevin 14 iyul tarixində Azərbaycanda rəhbərliyə gəlməsi ilə Azərbaycanın intibah dövrü başladı. Ulu Öndər böyük uzaqgörənliklə Azərbaycanın gələcək müstəqilliyinə hərtərəfli zəmin yaratdı və respublikanın dirçəlməsi naminə fəaliyyətə başladı. 1969- 1982-ci illər ərzində Azərbaycanın bugünkü müstəqilliyinin əsasını təşkil edən siyasi, elmi, mədəni potensialı yaranmışdır. Həmin dövrdə Azərbaycan tarixinin, ədəbiyyatının, mədəniyyətinin öyrənilməsinə və təbliğ olunmasına, Azərbaycanın bütün dünyada tanıdılmasına xüsusi diqqət verilirdi. Bu illər ərzində Azərbaycanda minlərlə kitabxana, məktəb, muzey, səhiyyə ocağı istifadəyə verilmişdir. Təhsilin inkişafına böyük əhəmiyyət verilirdi. Azərbaycanda yeni ali məktəblər açılır, hər il yüzlərlə azərbaycanlı gənc təhsil almaq üçün keçmiş ittifaqın alı məktəblərinə göndərilirdi. Bu, Heydər Əliyev siyasi müdrikliyinin və uzaqgörənliyinin göstəricisi idi.

Tədbirdə Şəfəq Ləzgiyeva “Ulu bir sərkərdə, Ulu bir öndər” şeirini səsləndirib. Qazax Rayon MKS-nin əməkdaşlarından Humay Vəliyevanın, Nərmin Əliyevanın, Günel Yusifovanın, Nərmin Musayevanın, Könül Əsgərovanın, Şamama İsgəndərovanın təqdimatında Ulu Öndər Heydər Əliyevin müdrik kəlamlarından ibarət kompozisiya təqdim olunub.