Qazaxda daha bir küçəyə yeni asfalt örtüyü döşənib -

Son illər cənab Prezident İlham Əliyevin rəhbərliyi altında regionların sosial-iqtisadi inkişafı dövlət proqramlarının uğurlu icrası sayəsində bütün bölgələrimiz, o cümlədən də Qazax rayonu gündən-günə abadlaşır. Bunu "Azərsu” ASC tərəfindən Qazax şəhərinin içməli su və tullantı su sistemlərinin yenidən qurulması layihəsinin icrasından sonra rayonda  həyata keçirilən genişmiqyaslı quruculuq işləri, şəhərin prospekt və küçələrinin asfaltlanması, səkilərə yeni tamet, bardür düzülməsi, qaz, elektrik, rabitə xətlərinin səliqəyə salınması, küçələrin işıqlandırılması söyləməyə əsas verir. Şəhərin Heydər Əliyev prospektində, bir neçə küçədə, eləcə də çoxmənzilli yaşayış binalarının həyətinə yeni asfalt örtüyü vurulmuş, abadlıq işləri aparılaraq "Abad məhəllə” kimi sakinlərin istifadəsinə verilib.

Rayonda aparılan abadlıq işləri bu gün də uğurla davam etdirilir. Nəqliyyat vasitələrinin hərəkətinin yaxşılaşdırılması, vətəndaşların rahatlığını təmin etmək məqsədilə təqdirəlayiq işlər görülür. 

Əvvəlki yazılarımızda Qazax rayonunda daha 4 küçəyə - şəhərin Nəsrəddin Tusi, şəhid Yunis Kazımov (Bakı küçəsindən M.Ə.Rəsulzadə küçəsinin kəsişməsinə kimi), Ağköynək kəndində Çərkəz İsmayılov və Cabir Hüseynov (Mehdi Hüseyn küçəsinin kəsişməsindən magistral yola kimi) küçələrinə yeni asfalt örtüyünün döşənəcəyi barədə xəbər vermişdik. 

Artıq sözügedən küçələrdən üçündə - Ağköynək kəndində yerləşən Cabir Hüseynov və Çərkəz İsmayılov, şəhərin Nəsrəddin Tusi küçələrində asfaltlanma işləri başa çatıb. Bu gün isə şəhərin Yunis Kazımov küçəsinə yeni asfalt örtüyü döşənib və işlər davam etdirilir. 

Sakinlər yaşadıqları küçəyə yeni asfalt örtüyünün vurulmasına görə ölkə Prezidenti İlham Əliyevə minnətdarlıqlarını bildirirlər. Yaşadıqları küçədə aparılan abadlıq işlərini dövlətin, ölkə başçısının onlara olan növbəti qayğısı kimi dəyərləndirirlər. 

Yeni asfalt örtüyü vurulan şəhərin Yunis Kazımov küçəsi