Əsas Səhifə > Manşet / Şəhidlər > “YAŞAT” Fondu Türkiyənin Uşaq Oyunları və İdman Klubları Federasiyası ilə birgə “Hədiyyə Karvanı” layihəsini təqdim edir

“YAŞAT” Fondu Türkiyənin Uşaq Oyunları və İdman Klubları Federasiyası ilə birgə “Hədiyyə Karvanı” layihəsini təqdim edir


1-06-2021, 22:23


İyunun 1-də Tovuz "ASAN xidmət”də "Hədiyyə Karvanı” layihəsinin açılış mərasimi keçirilib.

Layihə "YAŞAT” Fondunun və Türkiyənin Uşaq Oyunları və İdman Klubları Federasiyasının birgə təşkilatçılığı, Türkiyə Respublikasının Xarici İşlər Nazirliyinin, Türkiyə Respublikasının Ailə və Sosial Xidmətlər Nazirliyinin və Balıkəsir Böyükşəhər Bələdiyyəsinin tərəfdaşlığı ilə reallaşdırılır.

Layihə çərçivəsində şəhidlərimizin övladlarına müəyyən anlama və həlletmə bacarıqları tələb edən oyuncaq hədiyyələr, idman geyim dəstləri, qoruyucu maskalar, jurnallar paylanılacaq. Məqsəd onlara sevinc bəxş etmək, eləcə də yaradıcı potensiallarının inkişafına dəstək olmaqdır.

Açılış mərasimində "YAŞAT” Fondunun rəhbəri, Qarabağ qazisi Elvin Hüseynov, Tovuz Rayon İcra Hakimiyyətinin başçısı Məmməd Məmmədov, Türkiyə Uşaq Oyunları və İdman Klubları Federasiyasının rəhbəri Mehmet Mutlu, Türkiyə Böyük Millət Məclisinin 22-ci və 26-cı çağırış Ərzurumdan seçilən millət vəkili Mustafa Ilıcalı, İstanbul Universitetinin rektor köməkçisi İlyas Topsakal, Türkiyənin Gəncədəki baş konsulu Zəki Öztürk, Azərbaycan Milli Məclisinin deputatı Arzu Nağıyev, Gənclərin İnkişaf və Karyera Mərkəzinin baş direktoru Rəvanə Həsənli, "Yeni Müsavat" Media Qrupunun rəhbəri Rauf Arifoğlu, "ASAN Könüllüləri" Təşkilatının sədri Emiliya Bayramova çıxış ediblər.

Mərasimin ardından Tovuz "ASAN xidmət” mərkəzində həmin rayondan olan şəhidlərimizin uşaqlarına hədiyyələrin paylanılmasına start verilib.

Ankara şəhərindən start götürən "Hədiyyə karvanı” layihəsi 13 iyun tarixinədək davam edəcək. Bu çərçivədə ölkəmizin müxtəlif şəhər və rayonlarına səfər ediləcək və həmin rayonlardan olan şəhidlərimizin ailələri ziyarət olunmaqla onların övladlarına hədiyyələr paylanılacaq.


Məlumat üçün onu da qeyd edək ki, Qazax rayonundan olan şəhidlərin övladları da tədbirə qatılıblar. Qazax Rayon İcra Hakimiyyəti başçısı aparatında Vətən müharibəsi iştirakçıları və şəhid ailələri ilə işin təşkili şöbəsinin müdiri qazi kapitan Samir Çobanov Vətən müharibəsinin şəhidləri kapitan İmamverdi İsmayılovun, gizir Tahir İsmayılovun, çavuş Xaliddin Veyislinin, çavuş Elməddin Pənahovun, əsgər Elməddin Nəsibovun, əsgər Elşən Orucovun, İyul döyüşlərinin şəhidi mayor Namiq Əhmədovun, şəhidlərimizdən gizir İsə Almazovun, çavuş Qoşqar Qurbanovun ailə üzvləri və övladları ilə birlikdə tədbirdə iştirak ediblər. Ümumilikdə, 15 nəfər şəhid övladına müxtəlif hədiyyələr təqdim olunub.











yashat.gov.az


Geri qayıt