Əsas Səhifə > Manşet / Təhsil > Heydər Əliyev Fondu tərəfindən əsaslı şəkildə yenidən qurulan İsmayıl Şıxlı adına Kosalar kənd tam orta məktəbindən -

Heydər Əliyev Fondu tərəfindən əsaslı şəkildə yenidən qurulan İsmayıl Şıxlı adına Kosalar kənd tam orta məktəbindən -

7-09-2020, 17:51

Son illər ölkə Prezidenti cənab İlham Əliyev tərəfindən təhsil sahəsinə göstərilən diqqət və qayğı sayəsində həyata keçirilən məqsədyönlü tədbirlər Qazaxda da uğurla icra olunur. "Azərbaycan Respublikası regionlarının 2019–2023-cü illərdə sosial-iqtisadi inkişafı Dövlət Proqramı”nın həyata keçirilməsi üzrə hazırlanmış tədbirlər planına Qazax rayonu üzrə 11 məktəb binasının əsaslı təmirinin və ya tikintisinin salınması da bunun əyani sübutudur. Bu, Qazaxın timsalında bölgələrimizdə təhsil sahəsinə olan qayğının daha bir bariz nümunəsidir.

Hər kəsə o da yaxşı məlumdur ki, 2004-cü ildən fəaliyyətə başlayan Heydər Əliyev Fondu təhsil, səhiyyə, mədəniyyət, idman, elm və texnologiya, ekologiya, sosial və digər sahələrdə müxtəlif layihələr həyata keçirərək yeni cəmiyyət quruculuğunda fəal iştirak edir, ölkənin sosial-iqtisadi inkişafına öz töhfəsini verir. Öz fəaliyyətində təhsil sahəsini, bu sahənin inkişafını prioritet götürən Heydər Əliyev Fondu dövlətin sosial-iqtisadi inkişafa istiqamətlənən proqramlarına dəstək verərək müxtəlif layihələr reallaşdırır. Birinci vitse-prezident, Heydər Əliyev Fondunun prezidenti Mehriban Əliyevanın təşəbbüsü ilə Fondun reallaşdırdığı "Yeniləşən Azərbaycana yeni məktəb”, "Təhsilə dəstək” layihələri də ölkəmizdə təhsilin inkişafında mühüm əhəmiyyət daşıyır. Məhz bu layihələr çərçivəsində ölkəmizin hər yerində çoxsaylı məktəb binaları, körpələr evi-uşaq bağçaları inşa olunur.

Sevindirici haldır ki, respublikamızın hər yerində olduğu kimi, Qazaxlı məktəblilər də Mehriban xanım Əliyevanın diqqət və qayğısını hər an hiss edir. Təkcə bu il Heydər Əliyev Fondu tərəfindən rayonda bir məktəb üçün yeni binanın tikilməsi, digər bir məktəbin isə əsaslı şəkildə yenidən qurulması bu dediklərimizin əyani göstəricisidir. Həmin məktəblərdən biri Sarıvəlli kənd tam orta məktəbidir ki, bu məktəbin həyətində 220 şagird yerlik yeni bina inşa olunur. Dövlət Proqramında təmiri nəzərdə tutulan məktəblərdən biri də Xalq yazıçısı İsmayıl Şıxlının adını daşıyan 1176 şagird yerlik Kosalar kənd tam orta məktəbidir ki, artıq həmin məktəb Heydər Əliyev Fondu tərəfindən əsaslı şəkildə yenidən qurulub.

Əsaslı təmirinə ötən il iyul ayının ortalarından başlanılan məktəbdə son tamamlanma işləri aparılır. Məktəbin ümumi sahəsi 25 min kvadratmetr, bina sahəsi isə 5500 kvadratmetrdir. Məktəb binası 2 korpusdan ibarətdir. Birinci korpus üçmərtəbəli, ikinci korpus isə ikimərtəbəlidir.

Məktəbin həyətində girişdə sağ tərəfdə Vətən uğrunda canından keçən Kosalar kəndindən olan şəhidlərimizin xatirəsini əbədiləşdirən abidə yerləşir ki, burada şəhidlərin şəkli əks olunmuş lövhə vurulub. Sol tərəfdə isə Xalq yazıçısı İsmayıl Şıxlının büstü qoyulacaq.

Birinci korpusun birinci mərtəbəsində bir-birindən gözəl guşlər göz oxşayır. Sol tərəfdə ulu öndər Heydər Əliyevin uşaqlara olan qayğısını və qiymətli sözlərini əks etdirən guşə ilk andan diqqəti cəlb edir. Sağ tərəfdə Respublika Prezidenti cənab İlham Əliyevin və Birinci vitse-prezdent Mehriban xanım Əliyevanın gələcəyimiz olan uşaqlara göstərdikləri diqqət və qayğını özündə əks etdirən guşə yer alır. Bundan əlavə, Dövlət rəmzlərimiz haqqında məlumat lövhəsi vurulub. Məktəbdə bu gün adını daşıdığı Xalq yazıçısı İsmayıl Şıxlının həyat və yaradıcılığını, yazmış olduğu əsərlərin adlarını özündə əks etdirən guşəyə də yer ayrılıb.

Birinci mərtəbədə 10 sinif otağı, kimya və laboratoriya otağı, hərbi sinif otağı, qarderob yerləşir. İkinci mərtəbədə sinif otağlarının sayı 8-dir. Burada fizika və laboratoriya otaqları, müəllimlər otağı, tibb otağı-psixologiya otağı yerləşir. Üçüncü mərtəbədə 9 sinif otağı var. Biologiya və laboratoriya otaqları, iki informatika otağı, uşaq birliyi otağı da bu mərtəbədə yerləşir. Qeyd edək ki, hər mərtəbədə müəllim və şagirdlər üçün ayrıca sanitar qovşaq var.

İkinci korpusun birinci mərtəbəsində idman zalı, oğlan və qızlar üçün soyunub geyinmə otağı (duş otağı), oğlan və qızlar üçün əmək otağı, müəllim və şagirdlər üçün yeməkxana, mətbəx, əl-üz yuma otağı yerləşir. İkinci mərtəbədə isə 3 sinif otağı, 140 nəfərlik akt zalı, kitabxana, elektron kitabxana, musiqi otağı, xarici dil müəllimlərinin otağı, arxiv yerləşir. Həmçinin, məktəb binası daimi isti və soyuq su, elektrik və istilik sistemi ilə təmin edilib. Binanın daxilində və ərazidə videomüşahidə kameraları quraşdırılıb.

Məktəbin arxa tərəfində iki böyük idman meydançası diqqəti cəlb edir. Müasir standartlara cavab verən yeni məktəbdə futbol və basketbol meydançası yaradılıb. Kənd sakinlərinin, xüsusilə də idmançıların, güləşçilərin istəyini nəzərə alaraq arxa hissədə məktəbin həyətində əlavə olaraq güləş zalı da tikilib. Bundan başqa, məktəb binasının arxa hissəsində hər birinin həcmi 154 kubmetr olan 2 ədəd yanğından mühafizə, 1 ədəd içməli su hovuzu, nasosxana, qazanxana və sanitar qovşaqları da inşa edilib.Məktəbin həyətyanı ərazisində abadlıq və yaşıllaşdırma işləri aparılıb, həyətə asfalt döşənib, müasir işıqlandırma sistemi ilə təmin olunub.

Məktəbdə 608 nəfər şagird təhsil alacaq ki, onların təlim-tərbiyəsi ilə 59 nəfər müəllim məşğul olacaq. 20 nəfər texniki işçi çalışacaq. Sinif komplektinin sayı 27-dir.

Məktəbin direktoru Samir Hüseynov ötən il Xalq yazıçısı İsmayıl Şıxlının 100 illik yubileyi münasibətilə onun adını daşıyan Kosalar məktəbinin əsaslı şəkildə yenidən qurulmasını müəllim və şagirdlərin bu gün də böyük razılıq hissi ilə qarşıladıqlarını bildirir. S.Hüseynov qeyd edir ki, məktəbdə görülən işlərin keyfiyyəti də gözümüzdən yayınmadı. Heydər Əliyev Fondunun həyata keçirdiyi layihələrin yüksək səviyyədə icra olunduğunu eşitmişdik, Kosalar kənd tam orta məktəbində görülən işlər, yaradılan şərait sayəsində bir daha izlədik, şahidi olduq. Mehriban xanımın təhsil sahəsinə olan qayğısını əldə rəhbər tutan podratçı təşkilat, eləcə də bütün işçilər işləri yüksək səviyyədə həyata keçirdilər. Necə deyərlər, bizim dilimizlə desək gördükləri işdən gül ətri gəlir. Bu gün bütün kənd sakinləri, məktəbin müəllim-şagird kollektivi, eləcə də valideynlər Mehriban xanıma və Heydər Əliyev Fondunun əməkdaşlarına öz dərin minnətdarlığımızı bildiririk. Məktəbin tikintisini uğurla həyata keçirən şirkət rəhbərliyi başda olmaqla, tikintidə əməyi keçən, öz işlərinin öhdəsindən layiqincə gələn bütün işçilərə sonsuz təşəkkürümüzü çatdırırıq.

Onu da qeyd edək ki, Qazaxda Təhsil Nazirliyi tərəfindən daha bir məktəb - Aydın Məmmədov adına Qaymaqlı kənd tam orta məktəb üçün də 180 şagird yerlik yeni bina inşa olunur. Həmçinin, ölkə başçısı tərəfindən Mehdi Hüseyn adına humanitar və təbiət fənləri üzrə məktəb-lisey binasının əsaslı təmiri ilə bağlı imzalanan 5 mart, daha sonra məktəb-lisey binasının əsaslı təmiri ilə bağlı imzalanmış Sərəncama dəyişiklik edilərək sökülərək yenidən tikilməsi haqqında imzalanan 4 avqust 2020-ci il tarixli Sərəncama əsasən məktəb-lisey üçün də yeni bina inşa ediləcək. Bütün bunlar Qazax təhsilinə və gələcəyimiz olan uşaqlara olan dövlət qayğısı deməkdir. Bu gün hər bir qazaxlı təhsil işçisi təhsil sahəsinə göstərilən diqqət və qayğıya görə ölkə başçısına və Birinci vitse-prezidentə sonsuz təşəkkürlərini ifadə edirlər.