Vətəndaşlara diqqət və qayğı göstərmək hər bir dövlət məmurunun borcudur

Respublika Prezidenti cənab İlham Əliyevin çıxışları zamanı "Xalqa ləyaqətlə xidmət etmək, vətəndaşlara diqqət və qayğı göstərmək hər bir dövlət məmurunun borcudur. Mən Prezident kimi öz vəzifəmi xalqa xidmətdə görürəm” söyləməsi bir daha sübut edir ki, ölkəmizdə vətəndaş amili hər zaman yüksəkdə dayanır, vətəndaşlara olan diqqət və qayğı bütün işlərdə prioritet sahə kimi götürülür.
Dövlət başçısının vətəndaşlarla bağlı verdiyi tapşırıq və tövsiyələr, sakinlərlə bağlı atdığı nümunəvi addımlar Qazaxda da hiss olunmaqdadır. Bunu son 3 ildə görülən işlərdə, həyata keçirilən tədbirlərdə vətəndaşlara olan diqqət və qayğının öz real əksini tapmasından aydın şəkildə görmək olur.
Qazax Rayon İcra Hakimiyyətinin başçısı Rəcəb Babaşovun rəhbər kimi fəaliyyətə başladığı ilk gündən vətəndaş amilini ön plana çəkməsinin ən bariz nümunəsi isə sakinlərlə keçirdiyi görüşlər, mütəmadi olaraq sakinlərin arasında olması, onların qayğıları ilə yaxından maraqlanması, narahat edən məsələləri öz dillərindən eşitməsi və həlli istiqamətində tapşırıqlar verməsidir. Bütün bunlar isə bir amala xidmət edir ki, onun da kökündə yenə də vətəndaş məmnunluğu, onların rahatlığı, xoş güzəranı dayanır.

Bu gün icra başçısı "Nazim” MMC-yə məxsus şəhərin mərkəzində yerləşən mərkəzi bazarda olub, sakinlərlə görüşüb, səmimi söhbət edərək onları narahat edən məsələlərlə, qayğılarla maraqlanıb, müraciətlərini dinləyib.

"Rəhbər kimi təyin olunduğum ilk gündən çalışmışam ki, hər zaman siz sakinlərin yanında olum, mövcud vəziyyəti, sizləri narahat edən qayğıları öz dilinizdən eşidim”, - deyən icra başçısı bugünkü görüşün də məhz bu məqsədə xidmət etdiyini bir daha qeyd edib. Onlara olan diqqət və qayğının bundan sonra da olduğu kimi davam etdiriləcəyini, ən əsası isə ölkə rəhbərinin istəyinə uyğun şəkildə yerinə yetiriləcəyini diqqətə çatdırıb.

Mərkəzi bazarda yaradılan səliqə-sahmandan danışan icra başçısı bu işlərin olduğu kimi davam etdirilməsini bildirib. Sakinlərlə səmimi söhbət aparan rayon rəhbəri satılan hər bir məhsulun keyfiyyətinə, təmizliyinə fikir verilməsini tövsiyə edib və əhalinin sağlamlığının qorunması baxımından keyfiyyətin, xüsusilə də sanitariya qaydalarına ciddi əməl olunmasının çox vacib məsələ olduğunu vurğulayıb.

Rayon rəhbərini səmimiyyətlə qarşılayan sakinlər ölkəmizdə vətəndaş amilinin, mövqeyinin üstün tutulmasını, sakinlərə olan qayğının yüksək səviyyədə olmasını, ənənəvi hal alan bu cür görüşlərin keçirilməsini minnətdarlıq hissi ilə qarşıladıqlarını qeyd ediblər. Bu cür diqqət və qayğının onlarda ruh yüksəkliyi və dövlət-xalq birliyinə böyük inam hissi yaratdığını söyləyiblər. Ölkə başçısı tərəfindən əhalinin maddi rifah halının yaxşılaşdırılması istiqamətində atılan uğurlu addımlardan, imzalanan Fərman və Sərəncamlardan, vətəndaşlara olan dövlət qayğısından söz açaraq razılıqlarını bildiriblər.

GOYEZEN.AZ