İcra Başçısı mədəniyyət müəssisələrində olub

Qazax Rayon İcra Hakimiyyətinin başçısı Rəcəb Babaşovun fəaliyyətə başladığı ilk gündən diqqət və qayğı göstərdiyi sahələrdən biri də mədəniyyət sahəsidir. Qazaxda tarixi şəxsiyyətlərin, şairlərin, yazıçıların, saz-söz adamlarının doğum və anım günlərinin keçirilməsi, tarixi günlərin yüksək səviyyədə qeyd olunması bunun bariz nümunəsidir.
Eyni zamanda rayonda fəaliyyət göstərən mədəniyyət ocaqlarının əsaslı şəkildə təmir olunması, həmin idarə, müəssisə və təşkilatlarda çalışan işçilərin iş şəraitinin yaxşılaşdırılması istiqamətində gördüyü işlər rayon rəhbərinin bu sahəyə olan marağını əyani şəkildə sübut edir.
İcra başçısı Rəcəb Babaşov bu gün rayonumuzda fəaliyyət göstərən mədəniyyət ocaqlarının hazırki vəziyyəti və işçilərin iş şəraiti ilə tanış olub, onları narahat edən qayğılarla maraqlanıb.
Rayon rəhbəri ulu öndər Heydər Əliyevin adını daşıyan Mərkəzdə, Gənclər Mərkəzində, Qazax Dövlət Rəsm Qalereyasında, E.Hüseynov adına Mərkəzi Kitabxananın Uşaq şöbəsində, Ədəbiyyat və Qazax Tarix-Diyarşünaslıq Muzeylərində olub.
Yaradılan səliqə-sahmanla, rayon sakinlərinə göstərilən xidmətlərlə tanış olub. Hər bir müəssisə rəhbəri gündəlik iş fəaliyyətləri barədə məlumat verib, ekskursiya edən rayon sakinlərinə yüksək səviyyədə xidmət göstərildiyini bildiriblər. Sakinlər tərəfindən ünvanlanan suallara tam dolğun məlumatlar verildiyini qeyd ediblər.
Mövcud vəziyyətlə yerində tanış olan rayon rəhbəri lazımi tapşırıq və tövsiyələrini verib, işlərində daha ciddi olmalarını və sakinlərə qayğı ilə yanaşmalarını bildirib.