İcra başçısı Ağköynək kəndində yol kənarında həyata keçirilən abadlıq işlərinin mövcud vəziyyəti ilə maraqlanıb

Son illər cənab Prezident İlham Əliyevin rəhbərliyi altında, dövlət başçısının göstərdiyi qayğı sayəsində respublikamızın bütün bölgələrində genişmiqyaslı abadlıq-quruculuq işləri aparılır. Ölkəmizdə qəbul edilən regionların sosial-iqtisadi inkişafı Dövlət Proqramlarının icrası uğurla həyata keçirilir ki, bu, paytaxt Bakı ilə yanaşı, bütün bölgələrimizin inkişaf etdirilməsi deməkdir. Bunu son bir neçə ildə günü-gündən gözəlləşən Qazaxda aparılan abadlıq işlərindən aydın şəkildə görmək olur. Ölkə rəhbərinin tapşırığına əsasən Qazax şəhərinin içməli su və tullantı su sistemlərinin yenidən qurulması layihəsinin icrasından sonra prospekt və küçələrin asfaltlanması, səkilərə yeni tamet, bardür düzülməsi, qaz, elektrik, rabitə xətlərinin səliqəyə salınması, küçələrin işıqlandırılması, çoxmənzilli yaşayış binalarının həyətində abadlıq işləri aparılaraq Abad məhəllə kimi sakinlərin istifadəsinə verilməsi söylədiklərimizin bariz nümunəsidir.

Sentyabrın 2-də Qazax Rayon İcra Hakimiyyətinin başçısı Rəcəb Babaşov Ağköynək kəndinin ərazisindən keçən magistral yolun kənarında aparılan abadlıq işləri ilə bağlı yerində baxış keçirib. Rayon rəhbəri görülmüş işlərin mövcud vəziyyəti ilə maraqlanıb, aidiyyəti şəxslərə müvafiq tapşırıq və tövsiyələrini verib.

Rayon rəhbəri həmçinin, vətəndaşların kənddən keçən su kanalının ətrafı ilə bağlı müraciətini dinləyib, qeyd edilən məsələyə həssaslıqla yanaşılacağını bildirərək həlli istiqamətində lazımi addımlar atılacağını vurğulayıb.