Qazaxda icra başçısının avqust ayında vətəndaşlarla keçirilən ilk səyyar görüşü sərhəddə yerləşən Bala Cəfərli kəndində olub

Ölkəmizdə dövlət siyasətinin əsasını vətəndaş amili təşkil edir. Prezident İlham Əliyevin və Birinci vitse-prezident Mehriban xanım Əliyevanın vətəndaşlara göstərdikləri qayğı bütün sahələrdə öz əksini tapır ki, bunu hər bir ölkə vətəndaşı hiss edir. Ölkə Prezidentinin icra hakimiyyəti başçıları, mərkəzi icra hakimiyyəti orqanlarının rəhbərləri ilə görüşləri zamanı dövlət məmurları haqqında səsləndirdiyi fikirlərdən, onlara daim xalqın içində olmaları, icra başçılarına bütün kəndləri gəzmələri, sakinlərlə görüşmələri, vətəndaşların qayğılarını öz dillərindən eşitmələri, problemlərini yerində öyrənmələri, düzgün təhlil aparmaları barədə verdiyi tapşırıq və tövsiyələrdən aydın şəkildə görmək olur ki, dövlət siyasətinin kökündə hər zaman vətəndaş məmnunluğu dayanır. 

Ölkə başçısının insanlara layiqli xidmət göstərilməsi, vətəndaş məmnunluğunun təmin edilməsi, vətəndaşların qayğılarına həssaslıqla yanaşılması ilə bağlı tapşırıqları Qazaxda da olduğu kimi icra edilir. Əhalini narahat edən problemlərin yerlərdə birbaşa həlli və sosial əhəmiyyətli sifarişlərin müəyyən edilməsi məqsədilə şəhər və kəndlərdə keçirilən səyyar qəbullar da bu məqsədə xidmət edir.

Dövlət başçısının tapşırıq və tövsiyəsinə uyğun olaraq icra başçısının 2026-cı ilin avqust ayı üzrə vətəndaşlarla keçirilən ilk səyyar görüşü rayonun sərhəddə yerləşən Bala Cəfərli kəndində olub.

Avqustun 3-də rayonun hüquq-mühafizə orqanlarının, aidiyyəti idarə, müəssisə və təşkilat, xidmət sahələri rəhbərlərinin, əməkdaşlarının, kənd sakinlərinin iştirakı ilə keçirilən görüşdə sakinləri narahat edən məsələlər dinlənilib.

Qazax Rayon İcra Hakimiyyətinin başçısı Rəcəb Babaşov kənd sakinlərini salamlayıb, səmimi ürək sözlərini çatdırıb. İcra başçısı hər zaman olduğu kimi, bugünkü görüşün təməlində də vətəndaş məmnunluğunun dayandığını, səyyar görüşün əsas məqsədinin kənddəki mövcud vəziyyəti kənd sakinlərinin dilindən öyrənərək həlli mümkün olan məsələləri operativ şəkildə yerindəcə həll etməyə, ehtiyac olduğu halda isə aidiyyəti təşkilatlar qarşısında məsələ qaldırmağa yönəldiyini bildirib. İcra başçısı Bala Cəfərli kəndində keçirilən ötən səyyar görüşlərdə səslənən məsələlərin zamanla müsbət həllini tapdığını söyləyib. Bala Cəfərli kəndində ümumilikdə, ötən illər ərzində keçirilən 9 səyyar görüşdə 44 nəfər vətəndaş tərəfindən 37 məsələ qaldırıldığını, həmin məsələlərdən 27-nin müsbət həllini tapdığını söyləyib. 2 məsələnin dövlət proqramında nəzərdə tutulduğunu, 3 məsələ ilə bağlı qanunamüvafiq izahat verildiyini, 5 müraciətin təkrar olduğu üçün baxılmamış qaldığını vurğulayıb. Ötən müddət ərzində Bala Cəfərli kəndində sakinlərlə keçirilən səyyar görüşlərdə qaldırılan məsələlərin həlli istiqamətində görülmüş işlərdən danışan rayon rəhbəri bu günə kimi səslənən hər bir müraciətə həssaslıqla yanaşıldığını söyləyib. İlk gündən sərhəd kəndi olan Bala Cəfərlidə yaşayan sakinlərə göstərilən dövlət qayğısının bu gün də davam etdiyini qeyd edib. Ötən dövr ərzində kənddə içməli su problemi, kənd qəbiristanlığının ətrafına metal torun çəkilməsi, kənd bağçasının əsaslı təmiri, internet xəttinin çəkilməsi, SİP kabelləşmənin aparılması, evlərin dam örtüyünün yenilənməsi, kənddə marşrut xətti, eləcə də bir sıra məsələlərlə bağlı edilən müraciətlərin müsbət həllini tapdığını qeyd edib. Kənddə internetin keyfiyyətinin yüksəldilməsi məqsədilə “Azəronline MB” LTD şirkəti tərəfindən fiber-optik internet xəttinin çəkildiyini, hazırda işlərin davam etdirildiyini bildirib. Rayonun bütün kəndlərində olduğu kimi, ötən illər ərzində bu kənddə də subartezian quyusunun qazıldığını, 2 ədəd subartezian quyusunun sakinlərin istifadəsində olduğunu bildirən rayon rəhbəri bu sahədə görülən işlərin bundan sonra da uğurla davam etdiriləcəyini vurğulayıb.

Rayon rəhbəri Bala Cəfərli kəndinin də şəhidlər verdiyini, Birinci Qarabağ müharibəsində 6 nəfərin Şəhidlik zirvəsinə ucaldığını, 1 nəfərin müharibə əlili olduğunu bildirib. İcra başçısı 2020-ci ilin 27 sentyabrında Müzəffər Ali Baş Komandan İlham Əliyevin rəhbərliyi altında başlayan 44 günlük Vətən müharibəsində Bala Cəfərli kəndindən 8 nəfərin iştirak etdiyini, onlardan 3 nəfərin hərbi səfərbərliklə cəlb olunduğunu, iştirakçılardan 1 nəfərin yaralandığını söyləyib. Həmin müharibədə qanları ilə tarix yazan şəhidlərimizin döyüş meydanında göstərdikləri qəhrəmanlıqdan söz açan icra başçısı illər ötsə belə şanlı zəfəri bizə bəxş edən oğullarımızın heç zaman unudulmayacağını qeyd edib. Rayon rəhbəri şanlı Zəfərin müəllifi olan Ali Baş Komandana, hərbçilərimizə, şəhidlərimizə, qazilərimizə borclu və minnətdar olduğumuzu dilə gətirib. Rayon rəhbəri Respublika Prezidenti İlham Əliyev, Birinci vitse-prezident Mehriban xanım Əliyeva tərəfindən şəhid ailələrinə və qazilərimizə göstərilən qayğının Qazaxda bundan sonra da hər zaman nümunə götürüləcəyini bildirib.

İcra başçısı vurğulayıb ki, 2024-cü ildə bir güllə belə atılmadan Qazaxın 4 kəndi - Aşağı Əskipara, Bağanıs Ayrım, Xeyrımlı, Qızılhacılı işğaldan azad olundu. Hazırda həmin ərazilərdə minatəmizlənmə işləri davam etdirilir. Sözügedən kəndlərin layihə smeta sənədləri hazırlanmış və yaxın zamanlarda bərpasına başlanılacaqdır.

Rayon rəhbəri kənddə əhalinin məşğulluğunun təmin olunması sahəsində görülmüş işləri də diqqətə çatdırıb. Son illər kənddə 3 nəfərin "Özünüməşğulluq” proqramına cəlb edildiyini qeyd edib.

Sonra icra başçısı sakinləri narahat edən məsələləri dinləyib, qayğıları ilə maraqlanıb. Kənd sakinləri onlarla görüşə gəldiyinə, göstərilən qayğıya görə rayon rəhbərliyinə razılıqlarını ifadə ediblər. Son illər rayonda, o cümlədən Bala Cəfərli kəndində görülən işlərə, ölkəmizdə vətəndaşlara, şəhid ailələrinə, qazilərə göstərilən diqqət və qayğıya görə Prezident İlham Əliyevə, Birinci vitse-prezident Mehriban xanım Əliyevaya, rayon rəhbərliyinə bir daha dərin minnətdarlıqlarını bildiriblər.

Səmimi söhbət əsasında keçən görüşdə minnətdarlıqla yanaşı, sakinlər onları narahat edən bir sıra məsələlərdən də söz açıblar. Sakinlərin müxtəlif məzmunlu müraciətini dinləyən rayon rəhbəri səslənən məsələlərə diqqətlə baxılacağını, həssaslıqla yanaşılacağını, həlli istiqamətində lazımi addımlar atılacağını bildirib.