Qazaxda 2026-2030-cu illərdə kənd təsərrüfatı məhsullarının istehsalı və emalı sahələrinin inkişafı ilə bağlı yaradılmş Qərargah üzvlərinin iştirakı ilə müşavirə keçirilib

Son illər Respublika Prezidenti cənab İlham Əliyevin rəhbərliyi altında ölkəmizdə qeyri-neft sektorunun inkişafı, kənd təsərrüfatının inkişafı, məşğulluğun artırılması, vətəndaşların rifah halının yaxşılaşdırılması və su ehtiyatlarından səmərəli şəkildə istifadə edilməsi istiqamətində bir sıra məqsədyönlü işlər həyata keçirilir. 2026-cı ilin 25 may tarixində ölkə Prezidenti İlham Əliyevin sədrliyi ilə kənd təsərrüfatı məsələlərinə həsr olunmuş müşavirənin keçirilməsi, həmçinin, “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı”nın təsdiq edilməsi və bundan irəli gələrək bəzi məsələlərin tənzimlənməsi haqqında Respublika Prezidentinin 25 may 2026-cı il tarixli Sərəncamı bir daha onu deməyə əsas verir ki, ölkəmizdə kənd təsərrüfatının inkişafı dövlət siyasətinin prioritet istiqamətlərindən biridir.

Respublikamızın hər yerində olduğu kimi, Qazax rayonunda da sözügedən Dövlət Proqramında əksini tapan məsələlərin icrasına həssaslıqla yanaşılır. Bu məqsədlə Qazax Rayon İcra Hakimiyyəti başçısının 15 iyul 2026-cı il tarixli 9-23/250 nömrəli Sərəncamı ilə Qazax rayonu üzrə “2026-2030-cu illərdə kənd təsərrüfatı məhsullarının istehsalı və emalı sahələrinin inkişafı” ilə bağlı Qərargah yaradılıb və “İş Planı” təsdiq edilib.

İyulun 30-da Qazaxda 2026-2030-cu illərdə kənd təsərrüfatı məhsullarının istehsalı və emalı sahələrinin inkişafı ilə bağlı yaradılmş Qərargah üzvlərinin iştirakı ilə müşavirə keçirilib.

Qazax Rayon İcra Hakimiyyətinin təşkilatçılığı ilə keçirilən müşavirədə qarşıda duran vəzifələrdən, istehsal olunan məhsulların həcminin artırılmasından, sahibkarlara göstərilən dövlət qayğısından, taxıl biçininin mövcud vəziyyətindən, biçin zamanı, eləcə də biçindən sonra əkin sahələrinin yanğın təhlükəsizliyi qaydalarına ciddi riayət olunmasından, heyvandarlığın inkişafı istiqamətində görüləcək işlərdən, əkin sahələrinin suvarılmasının təmin edilməsindən və s. məsələlərdən geniş söhbət açılıb.

Qazax Rayon İcra Hakimiyyətinin akt zalında keçirilən müşavirədə Qazax Rayon İcra Hakimiyyətinin başçısı Rəcəb Babaşov, icra aparatının məsul əməkdaşları, Qazax Dövlət Aqrar İnkişaf Mərkəzinin direktoru Elxan Vəkilov, Qazax Bitki Mühafizə və Fumiqasiya (Zərərsizləşdirmə) Mərkəzinin rəisi Faiq Bəkirov, Qazax Rayon Heyvan Sağlamlığı və Baytarlıq Xidmətləri İdarəsinin rəisi İlqar Orucov, Ağstafaçay Hidroqovşağının İstismarı İdarəsinin rəisiRövşən Lətifov, Qazax Su Meliorasiya Sistemlərinin İstismarı İdarəsində baş mühəndis Asim Osmanov, "Aqroservis" ASC-nin Şəmkir Rayon Nümayəndəliyinin Qazax rayon bölməsinin rəhbəri Murad Nəsibov, FHN Qazax Dövlət Yanğından Mühafizə Hissəsinin rəis əvəzi Kənan Yolçuyev, Ekologiya və Təbii Sərvətlər Nazirliyi 2 saylı Regional Ekologiya Və Təbii Sərvətlər İdarəsinin Ətraf mühitin mühafizəsinə nəzarət və ekoloji monitorinq sektorunun aparıcı məsləhətçi-müfəttişi Humay Qocayeva, sözügedən müəssisələrin məsul əməkdaşları, xidmət sahələrinin rəhbərləri, RİH başçısının kənd İnzibati Ərazi Dairəsi üzrə nümayəndələri, sahibkarlar, fermerlər, KİV nümayəndələri iştirak ediblər.

Qazax Rayon İcra Hakimiyyətinin başçısı Rəcəb Babaşov giriş sözü ilə çıxış edərək keçirilən müşavirənin məqsəd və əhəmiyyətindən danışıb. Rayon rəhbəri ölkə başçısının sədrliyi ilə mayın 25-də keçirilən müşavirədə kənd təsərrüfatının inkişafı ilə bağlı səslənən fikirlərin, qarşıya qoyulmuş məqsədlərin hər kəs üçün bir yol xəritəsi olduğunu, bölgələrdə kənd təsərrüfatının inkişafı üçün hər bir sahibkarın töhfə verməli olduğunu bildirib. İcra başçısı Qazaxda sözügedən Dövlət Proqramında əksini tapan bəndlərin icrasına həssaslıqla yanaşıldığını, bu məqsədlə müvafiq Sərəncamla Qazax rayonu üzrə “2026-2030-cu illərdə kənd təsərrüfatı məhsullarının istehsalı və emalı sahələrinin inkişafı” ilə bağlı Qərargah yaradıldığını və “İş Planı”nın təsdiq edildiyini diqqətə çatdırıb. İcra başçısı İş Planında torpaq resurslarının qorunması və ondan səmərəli istifadə olunması, suvarma suyundan səmərəli istifadə mexanizminin inkişaf etdirilməsi, bitkiçilik sahəsi ilə bağlı tədbirlər, o cümlədən intensiv meyvə bağlarının salınması, istixana komplekslərinin sahəsinin artırılması, buğdanın və kartofun məhsuldarlığnın artırılması, heyvandarlıq məhsullarının istehsalının artırılması ilə bağlı tədbirlər, o cümlədən mal və qoyun əti, quş əti, süd və yumurta istehsalının artırılması, emal sahəsinin inkişaf etdirilməsi və sahibkarlıq təşəbbüslərinin dəstəklənməsinin öz əksini tapdığını bildirib. Həmçinin, İş Planında rayon ərazisində fəaliyyət göstərən aqroparkların və iri təsərrüfatların fəaliyyəti üçün ayrılmış torpaqlardan, o cümlədən əkinə yararlı sahələrdən istifadənin vəziyyətinin öyrənilməsi, müasir suvarma sistemlərinin qurulması, aqroparkın əhatə edəcəyi torpaq sahələrinin ölçülərinin və qoyulacaq investisiyaların miqdarının müəyyən edilməsi, texnika parkının mütəmadi olaraq yenilənməsi üçün müvafiq tədbirlərin görülməsi, torpaqların analizinin aparılması və ən yüksək məhsuldarlığa malik bitki növlərinin əkilməsi, kənd təsərrüfatı statistikasının dürüstləşdirilməsi, fermerlərin fəaliyyətinin əlaqələndirilməsi məqsədilə hər bir istehsal sahəsi üzrə müvafiq birliklərin yaradılması kimi məsələlərin qeyd olunduğunu vurğulayıb. Rayon rəhbəri istər Dövlət Proqramında, istərsə də İş Planında əksini tapan bəndlərin icrası ilə bağlı qarşıya qoyulmuş məqsədlərə, bu istiqamətdə görülmüş işlərə hər kəsin töhfə verməli olduğunu, bu sahədə verilən tapşırığın ciddiliyini dərk edərək qeyd edilən məsələlərə məsuliyyətlə yanaşılmasını bildirib və aidiyyəti üzrə müvafiq tapşırıqlarını verib.

Qazax Dövlət Aqrar İnkişaf Mərkəzinin direktoru Elxan Vəkilov çıxış edərək keçirilən müşavirənin əhəmiyyətindən söz açıb. Dövlət Proqramında və İş Planında əksini tapan bəndlərin icrası ilə bağlı görülməsi nəzərdə tutulan işlərin vacibliyini qeyd edib.

Sahibkarlardan Vüqar Kərimov, Xəyyam Sanıyev, fermerlərdən Asif Yusifov və başqaları çıxış edərək ölkəmizdə sahibkarlara göstərilən diqqət və qayğıya görə ölkə Prezidenti İlham Əliyevə və rayon rəhbərliyinə minnətdarlıqlarını bildiriblər. Bugünkü müşavirəni onlara göstərilən növbəti dövlət qayğısı kimi qiymətləndiriblər.

Qazax Rayon İcra Hakimiyyətinin başçısı Rəcəb Babaşov müşavirəyə yekun vuraraq bildirib ki, bizim kənd təsərrüfatının inkişaf etdirilməsi istiqamətində gördüyümüz bütün işlər demək olar ki, proqramlı şəkildə davam etdirilir. Bu isə o deməkdir ki, qarşıya qoyduğumuz məqsədə çatmaq üçün əməli işləri daha da artırmalıyıq. Ölkə başçısının yeni iş yerlərinin yaradılması baxımından kənd təsərrüfatının inkişafına yüksək təkan verməsindən, əhalinin rifah halının yaxşılaşdırılması istiqamətində gördüyü məqsədyönlü işlərdən müsbət nəticə çıxararaq öz töhfəmizi verməliyik. Üzərimizə düşən işlərin öhdəsindən layiqincə gələrək bütün sahələrdə ön sırada dayanan Qazaxda kənd təsərrüfatı sahəsində də yüksək göstəricilərə nail olmalıyıq.