Qazaxda icra başçısı meyvə bağlarına baxış keçirib

Son illər Respublika Prezidenti İlham Əliyevin rəhbərliyi altında ölkəmizdə qeyri-neft sektorunun inkişafı, kənd təsərrüfatının inkişafı, məşğulluğun artırılması, vətəndaşların rifah halının yaxşılaşdırılması və su ehtiyatlarından səmərəli şəkildə istifadə edilməsi istiqamətində məqsədyönlü işlər həyata keçirilir. 2026-cı ilin 25 may tarixində Respublika Prezidenti İlham Əliyevin sədrliyi ilə kənd təsərrüfatı məsələlərinə həsr olunmuş müşavirənin keçirilməsi, həmçinin “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı”nın təsdiq edilməsi və bundan irəli gələrək bəzi məsələlərin tənzimlənməsi haqqında Respublika Prezidentinin 25 may 2026-cı il tarixli Sərəncamı bir daha onu göstərir ki, ölkəmizdə kənd təsərrüfatının inkişafı dövlət siyasətinin prioritet istiqamətlərindən biridir.

Ölkə başçısının rəhbərliyi ilə kənd təsərrüfatının inkişaf etdirilməsi istiqamətində həyata keçirilən islahatlar qısa müddətdə öz müsbət nəticəsini göstərir. Dövlət tərəfindən sahibkarlara, kəndli fermerlərə göstərilən dəstək ölkə iqtisadiyyatında böyük pay sahibi olan kənd təsərrüfatının inkişafına öz töhfəsini verir. Kənd təsərrüfatı sahəsi neft sənayesi və tikinti sektorundan sonra ölkə iqtisadiyyatında üçüncü böyük sahə olduğu üçün aqrar sektor həm də işsizliyin aradan qaldırılmasında və əhalinin sosial vəziyyətinin yaxşılaşmasında mühüm rol oynayır. Kənd təsərrüfatının inkişafı həm də ölkənin ərzaq təhlükəsizliyinin təmin edilməsində aparıcı rola malikdir. Bu baxımdan aqrar siyasətin prioritet olması təsadüfi deyil və dövlətin strateji maraqlarına xidmət edir.

Azərbaycanda meyvəçiliyin inkişaf etdirilməsi bu gün qarşıda duran əsas vəzifələrdəndir. Aqrar sahə ilə bağlı qəbul olunan dövlət proqramlarında meyvəçiliyin inkişaf etdirilməsinə xüsusi diqqət yetirilir.Kənd təsərrüfatının ayılmaz qollarından olan meyvəçiliyin inkişafı əhalinin həyat səviyyəsinin yüksəldilməsində mühüm rol oynayır. Son illər Qazaxda bütün sahələrlə yanaşı kənd təsərrüfatı sahəsinin, xüsusilə də meyvəçiliyin uğurla inkişaf etməsi istiqamətində mühüm addımlar atılır. Dövlət tərəfindən sahibkarlara, kəndli fermerlərə göstərilən dəstəyi yüksək qiymətləndirən təsərrüfat sahibləri onlara olan bu dəstəyi düzgün dəyərləndirirlər. Sahibkarlar, kəndli fermerlər məhz bu qayğını əldə rəhbər tutaraq əkin sahələrini, meyvə bağlarının hektarını və çeşidini ildən-ilə genişləndirirlər.

İyunun 12-də Qazax Rayon İcra Hakimiyyətinin başçısı Rəcəb Babaşov icra aparatının məsul şəxsləri, Qazax Dövlət Aqrar İnkişaf Mərkəzinin direktoru Elxan Vəkilov, digər aidiyyəti şəxslərlə birlikdə rayonun Xanlıqlar və Çaylı kəndləri ərazisində müxtəlif meyvələrdən salınmış meyvə bağlarına baxış keçirib.

Təsərrüfata baxan aqronom Rövşən Qənbərov rayon rəhbərliyinə məlumat verərək ərik, gilas, xurma, nektarin, şaftalı olmaqla ümumilikdə, 33 hektarda meyvə bağının salındığını bildirib. Gilas yığımının başa çatdığını, hazırda isə ərik yığıldığını, mövsümü olaraq 25 nəfərin çalışdığını qeyd edib.