Qazaxda icra başçısı vətəndaşın etdiyi müraciətlə bağlı görülmüş işlərin nəticəsi ilə maraqlanıb

Respublika Prezidenti İlham Əliyevin səsləndirdiyi “Siyasətimizin mərkəzində Azərbaycan vətəndaşı dayanır. Bu, həmişə bizim siyasətimizin ana xəttini müəyyən edən istiqamətdir. Çünki mən uzun illərdir deyirəm və bunu əməli işlərdə də biz görürük ki, siyasətimizin mərkəzində Azərbaycan vətəndaşı dayanır. Bu, sadəcə olaraq, şüar deyil. Bizim bütün siyasətimiz həm sosialyönümlüdür, həm də ki, investisiyayönümlüdür” sözləri bu gün hər bir dövlət məmuru üçün iş fəaliyyətlərində yol xəritəsidir. Ən önəmlisi isə odur ki, ölkə başçısının rəhbərliyi altında bu gün müstəqil, suveren Azərbaycanımızda həyata keçirilən dövlət siyasətinin əsasında vətəndaş amilinin dayanması bütün sahələrdə əks olunur. Bu, ölkə başçısı və Birinci vitse-prezident Mehriban xanım Əliyeva tərəfindən vətəndaşlara göstərilən qayğıda hər zaman hiss edilir. Ən əsası isə bu, hər bir dövlət məmuruna nümunə olmalıdır.

Dövlət başçısının yerlərdə vətəndaş müraciətlərinə obyektiv şəkildə baxılması, vətəndaş məmnunluğunun təmin edilməsi ilə bağlı müvafiq sərəncam və tapşırıqlarının icrasına Qazax rayonunda hər zaman operativ və həssaslıqla yanaşılır.

Vətəndaş məmnunluğunun təmin olunması istiqamətində dövlət siyasətini əsas tutaraq, Rayon İcra Hakimiyyətinin inzibati binasında vətəndaşların fərdi və ümumi qəbulları həyata keçirilir, müraciət və təklifləri dinlənilir. Rayonda şəhid ailələri və müharibə iştirakçılarının sosial qayğılarının öyrənilməsi və həlli də daim diqqət mərkəzində saxlanılır.

Yanvarın 23-də Qazax Rayon İcra Hakimiyyətinin başçısı Rəcəb Babaşov Qazax şəhərindən müraciət etmiş Balaməmmədova Səkinə Murad qızını fərdi qəbul edərək onun müxtəlif məzmunlu müraciətini dinləyərək qeyd etdiyi məsələnin araşdırılmasını bildirmişdi. Vətəndaşın etdiyi müraciətlə əlaqədar aidiyyəti üzrə müvafiq tapşırıqlarını vermişdi.

Yanvarın 24-də icra başçısı Rəcəb Babaşov vətəndaşı təkrar qəbul edərək onun etdiyi müraciətlə bağlı görülmüş işlərin nəticəsi ilə maraqlanıb.

Vətəndaş S.Balaməmmədova ona göstərilən qayğıya və müraciətinə operativ şəkildə baxılmasına görə ölkə Prezidenti İlham Əliyevə, rayon rəhbərliyinə razılığını ifadə edib.