Qazaxda 5 Mart - Bədən Tərbiyəsi və İdman Günü qeyd olunub

Bu gün Qazax rayonunda 5 Mart - Bədən Tərbiyəsi və İdman Günü qeyd olunub. Bu münasibətlə keçirilən tədbirdə idmançılar və məşqçi-müəllimlər, idman ictimaiyyətinin nümayəndələri, mətbuat işçiləri iştirak edib.

Tədbir iştirakçıları əvvəlcə ulu öndər Heydər Əliyevin abidəsi önünə gül dəstələri qoyub, əziz xatirəsini böyük ehtiramla yad ediblər.

Gənclər Mərkəzində keçirilən tədbir Dövlət Himninin səslənməsi ilə başlayıb.

Qazax rayon İcra Hakimiyyəti başçısının müavini Gulaya Həsənova giriş sözü çıxış edərək idmançıları 5 Mart - Bədən Tərbiyəsi və İdman Günü münasibətilə təbrik edib, ölkəmizdə dövlət səviyyəsində idmana göstərilən diqqət və qayğıdan söz açıb. Qeyd edib ki, respublikamızda bədən tərbiyəsi və idmanın inkişafı ulu öndərin adı ilə bağlıdır. Respublikamızda bu əlamətdar gün Prezident İlham Əliyevin “Bədən Tərbiyəsi və İdman Günü”nün təsis edilməsi haqqında 2005-ci il 4 mart tarixli Sərəncamına əsasən qeyd edilir. Ölkə başçısının 1997-ci ildə Azərbaycan Milli Olimpiya Komitəsinə rəhbər seçilməsindən sonra ölkəmizdə idmana və bədən tərbiyəsinə diqqət daha da artırılmışdır. Bu gün Azərbaycanın dünyanın idman mərkəzlərindən birinə çevrildiyini böyük fəxrlə söyləmək olar.

Bildirib ki, Prezident İlham Əliyev Qazaxda idmana və idmançılara hər zaman diqqət göstərmişdir. Belə ki, ölkə başçısının müvafiq Sərəncamı ilə 2007-ci ildə may ayının 30-da istifadəyə verilmiş möhtəşəm Qazax Olimpiya İdman Kompleksi Qazax idmanının inkişafına xüsusi təkan verərək yeni gənc idmançıların yetişməsinə səbəb olmuşdur.

Gənclər və İdman İdarəsinin rəisi Vüqar Nəbiyev tədbirdə çıxış edərək tədbir iştirakçılarını təbrik edib, 2017-ci ildə idmançılarımızın qazandıqları uğurlardan söz açıb. Rayonumuzda idmana və idmançılara göstərdiyi diqqət və qayğıya görə rayon İcra Hakimiyyətinin başçısı Rəcəb Babaşova idmançılar adından öz dərin minnətdarlığını bildirib. Qeyd edib ki, rayon rəhbərliyi ölkə və beynəlxalq turnirlərdə, çempionatlarda iştirak edib yüksək nəticələr qazanmış bütün idmançıları qəbul etmiş, onları təbrik edərək mükafatlandırmışdır.

Azərbaycan Respublikası Prezidentinin Fərdi Təqaüdçüsü, Əməkdar Bədən Tərbiyəsi və İdman Xadimi, sərbəst güləş üzrə SSRİ idman ustası, Əməkdar məşqçi Kamal Əhmədov, Əməkdar Bədən Tərbiyəsi və İdman Xadimi, sərbəst güləş üzrə SSRİ idman ustası, Əməkdar məşqçi, Ramiz Tağıyev, Fəxri Bədən Tərbiyəsi və İdman İşçisi, Əməkdar müəllim Bəsti Ələkbərova, IV İslam Həmrəyliyi Oyunlarının Zorxana və pəhləvan güləşi üzrə gümüş mükafatçısı, Zoraxana idman növü üzrə Avropa və Dünya çempionu, sərbəst güləş üzrə Əməkdar məşqçi, Beynəlxalq dərəcəli hakim Tural Əliyev, rayon Təhsil şöbəsinin nəzdində Uşaq Gənclər İdman Şahmat Məktəbinin direktoru, Fəxri Bədən Tərbiyəsi və İdman İşçisi Rəşad Bəkirov, rayon Təhsil şöbəsinin nəzdində UGİM-də məşqçi, Yunan-Roma güləşi üzrə Əməkdar məşqçi Tariyel Nəsibov çıxış edərək idmançıların qazandıqları uğurlardan, ölkəmizdə, eləcə də Qazaxda idmana və idmançılara göstərilən diqqət və qayğıdan danışıblar.

Tədbirin sonunda veteran idmançılar və məşqçi-müəllimlər, respublika çempionları, beynəlxalq yarışlarda mükafat qazanmış idmançılar Gənclər və İdman İdarəsinin Fəxri Fərmanları ilə təltif olunublar.