Qazaxda 2025-ci il “Konstitusiya və Suverenlik İli” çərçivəsində “Vətənə sevgi, təbiətə qayğı, tarixə ehtiram” adlı yürüş və ağacəkmə aksiyası keçirilib

2020-ci il sentyabrın 27-də Ermənistanın təxribatlarına cavab olaraq başlanan Vətən müharibəsində əldə olunan tarixi Zəfər, həmçinin, 2023-cü il 19-20 sentyabr antiterror əməliyyatı ölkəmizin ərazi bütövlüyü və suverenliyini tam bərpa etdi. Bununla da Konstitusiyanın hüquqi qüvvəsi işğaldan azad olunmuş bütün ərazilərdə təmin olundu və dövlət hakimiyyətinin tam suveren tətbiqi bərqərar edildi. Respublika Prezidentinin 19 sentyabr 2024-cü il tarixli Sərəncamına əsasən 20 sentyabr tarixi ölkəmizdə Dövlət Suverenliyi Günü elan edilmişdir. Bu gün xalqımızın dövlətçilik iradəsini, suveren hüquqlarımızın bərpasını və tarixi ədalətin təminini simvolizə edir. Bu qərar həmçinin, Konstitusiyanın qəbul edilməsinin 30 illiyi, dövlət suverenliyinin möhkəmləndirilməsi və milli dövlətçilik ənənələrinin geniş təbliği məqsədi daşıyır. 2025-ci ilin “Konstitusiya və Suverenlik İli” elan edilməsi isə dövlətçilik tariximizin mühüm mərhələsi olmaqla, həm Konstitusiyanın 30 illiyini, həm də 44 günlük Zəfərlə bərpa olunmuş ərazi bütövlüyünün və möhkəmlənmiş suverenliyin əhəmiyyətini bir daha vurğulayır.

2025-ci il “Konstitusiya və Suverenlik İli” çərçivəsində ölkəmizdə müxtəlif səpkili tədbirlər, konfranslar, dəyirmi masalar və müxtəlif maarifləndirici tədbirlər keçirilir.

Belə tədbirlərdən biri də noyabrın 27-də Qazax Rayon İcra Hakimiyyəti və “Avey” Dövlət Tarix-Mədəniyyət qoruğunun birgə təşkilatçılığı ilə keçirilən “Vətənə sevgi, təbiətə qayğı, tarixə ehtiram” adlı yürüş və ağacəkmə aksiyasıdır.

Ağacəkmə aksiyasında Qazax Rayon İcra Hakimiyyətinin başçısı Rəcəb Babaşov, icra aparatının məsul əməkdaşları, “Avey” Dövlət Tarix-Mədəniyyət Qoruğunun direktoru Səadət Əliyeva və qoruğun əməkdaşları, Bakı Dövlət Universitetinin Qazax filialının, Qazax Dövlət Sosial-İqtisadi Kollecin müəllim və tələbələri, Qazax Rayon İcra Hakimiyyəti yanında Gənclərin Yerli Məşvərət Şurasının sədri Pəri İbrahimova və şura üzvləri, Qazax RİH başçısının kənd İƏD üzrə nümayəndəlikləri, bələdiyyələr, KİV nümayəndələri iştirak ediblər.

Tədbir çərçivəsində Bakı Dövlət Universitetinin Qazax filialı və Qazax Dövlət Sosial-İqtisadi Kollecin müəllim-tələbə heyəti, gənclər tərəfindən qoruğun “Göyəzən” filialında Göyəzən dağının ətəklərinə eldar şamı, badam (80 ədəd) və iqlimə uyğun digər ağac növləri əkilib.

Daha sonra tədbir iştirakçıları 3 rəngli Azərbaycan Bayrağı ilə Göyəzən dağının zirvəsi istiqamətinə yürüş etmiş, yürüşün yekununda qoruğun ekskursiyaçıları tərəfindən tələbələrə ərazidə yerləşən tarixi abidələr, burada aparılan arxeoloji qazıntılar haqqında geniş məlumatlar verilib.

Tədbirin davamı olaraq iştirakçılar qoruğun “Damcılı” filialına səfər ediblər. Burada abidələrlə bağlı videoçarx nümayiş etdirilib, “Damcılı” mağarası və ətraf ərazilərdə aparılmış elmi-arxeoloji qazıntılar barədə məlumatlar gənclərin diqqətinə çatdırılıb. Tədbir iştirakçıları müxtəlif dövrlərdə yaponiyalı və azərbaycanlı arxeoloqlar tərəfindən aparılmış qazıntılar nəticəsində aşkar olunmuş eksponatlar və qoruğa dair müxtəlif çap məhsullarının təqdim olunduğu sərgi ilə tanış olublar.

Sonda tədbir iştirakçıları üçün çay süfrəsi təşkil olunub, xatirə şəkilləri çəkdirilib.