Qazaxda “Müstəqil və qüdrətli Azərbaycan dövlətinin təməlinin qoyulduğu gün” mövzusunda elmi-praktik konfrans keçirilib

İyulun 14-də 2025-ci il “Konstitusiya və Suverenlik İli” çərçivəsində Qazax Rayon İcra Hakimiyyəti, Yeni Azərbaycan Partiyası (YAP) Qazax Rayon Təşkilatı, Milli Məclisin Beynəlxalq Münasibətlər və Parlamentlərarası Əlaqələr Komitəsi, Qazax Rayon Heydər Əliyev Mərkəzinin birgə təşkilatçılığı ilə Ümummilli Lider Heydər Əliyevin 14 iyul 1969-cu ildə Azərbaycanda ilk dəfə siyasi hakimiyyətə gəldiyi gün münasibətilə “Müstəqil və qüdrətli Azərbaycan dövlətinin təməlinin qoyulduğu gün” mövzusunda elmi-praktik konfrans keçirilib.

Qazax Rayon Heydər Əliyev Mərkəzində keçirilən tədbirdə Qazax Rayon İcra Hakimiyyətinin başçısı Rəcəb Babaşov, icra aparatının məsul şəxsləri, Azərbaycan Respublikası Milli Məclisinin Beynəlxalq münasibətlər və parlamentlərarası əlaqələr komitəsinin sədri, Avropa İttifaqı Parlament Əməkdaşlıq Komitəsindəki nümayəndə heyətinin rəhbəri Səməd Seyidov, köməkçisi Akif Əmirov, Yeni Azərbaycan Partiyası (YAP) Qazax Rayon Təşkilatının sədri Anar Nəbiyev, ziyalılar, idarə, müəssisə və təşkilat rəhbərləri, təhsil, mədəniyyət, səhiyyə işçiləri, Bakı Dövlət Universitetinin Qazax filialının, Qazax Dövlət Sosial-İqtisadi Kollecin müəllimləri, KİV nümayəndələri iştirak ediblər.

Tədbir iştirakçıları əvvəlcə Ümummilli Lider Heydər Əliyevin abidəsi önünə gül dəstələri düzərək əziz xatirəsini ehtiramla anıblar. 

Tədbirdə Azərbaycan Respublikasının Dövlət Himni səsləndirilib. Ümummilli Lider Heydər Əliyevin, respublikamızın ərazi bütövlüyü, ölkəmizin suverenliyi uğrunda canlarını fəda etmiş şəhidlərin, igid Vətən oğullarının əziz xatirəsi birdəqiqəlik sükutla yad edilib.  

Ulu Öndər Heydər Əliyevin şərəfli və mənalı həyat yolundan bəhs edən film nümayiş etdirilib.

Qazax Rayon Heydər Əliyev Mərkəzinin direktoru Ceyhunə Hüseynova tədbiri açıq elan edərək iştirakçıları salamlayıb, təşkil olunmuş tədbirin əhəmiyyətindən söz açıb. C.Hüseynova bildirib ki, Heydər Əliyev və dövrü Azərbaycan xalqının inkaredilməz gerçək tarixidir. Özünün də dediyi kimi tariximizin hər bir səhifəsi bizim üçün əzizdir. Bu baxımdan ölkəmizin həyatında 60-cı illərin sonu 80-ci illərin ortaları xüsusi yer tutur. Heydər Əliyev tamamilə başqa ideologiyada, başqa ictimai quruluşda rəhbər olmasına baxmayaraq xalqımızı düşündürən problemləri məharətlə həll edir, istiqlalın bərpası üçün lazım olan şərtləri ehtiyatla, məqsədyönlü şəkildə hazırlayır, milli ziyalıları qoruyur, xalqı üçün çalışırdı. Xalqımız da Heydər Əliyevin rəhbərliyi altında siyasi hakimiyyət ətrafında sıx birləşərək heç bir şüar, yersiz kəlmə işlətmədən ehtiyatla müstəqil dövlət quruculuğu üçün lazım olan daxili və beynəlxalq şərtləri ümumi Sovet sistemində tədricən hazırlamağa və tarixin qarşısında ümummilli məsələni həll edirdi. Həmin dövrdə Azərbaycan xalqının qarşısında həllini gözləyən bir sıra ciddi problemlər var idi, milli vəhdət, hakimiyyətlə xalqın yekdilliyi, çarizmin azərbaycanlılara etibar etməyərək onları idaretmə orqanlarına yaxın buraxmaması, hakimiyyətdə olan azərbaycanlılar arasında intriqaların olması, milli mədəniyyətin məhv olması, azərbaycan dilinin statusu, Azərbaycanın ərazi bütövlüyünü qorumaq, iqtisadiyyatı bərpa etmək, türk dünyası ilə qırılmış əlaqələri bərpa etmək və s. Heydər Əliyev bu problemləri həll etməli idi. Ümumi Sovet mədəniyyəti, Sovet xalqı və sovet tarixi yaradan maşın sürətlə və amansız işləyirdi. Xalqın və millətin yeganə ümidi Heydər Əliyevə edilən təqiblərin, təzyiqlərin, zərbələrin ardı-arası kəsilmirdi. Buna baxmayaraq Heydər Əliyev özünün gərgin fəaliyyəti ilə bütün bu “millətçilik təzahürləri” pərdəsinə sinə gərdi və azərbaycanlılar SSR dağılanda bütöv bir xalq, millət olaraq imperiyadan ayrıldılar. Məhz Heydər Əliyevin həyata keçirdiyi misilsiz fəaliyyət milli-mənəvi, maddi və beynəlxalq münasibətlər baxımından Azərbaycanın dövlət müstəqilliyinin bərpası üçün zəruri olan şərtləri hazırlayaraq istiqlala doğru apardı. Məhz həmin təməllərin əsasında xalqımız mövcud olduqca əbədi, dönməz və sarsılmaz olacaq. Azərbaycanın dövlət müstəqilliyi XX əsrin 90-cı illərində bərpa edildi.

Qazax Rayon İcra Hakimiyyətinin başçısı Rəcəb Babaşov çıxış edərək tədbir iştirakçılarını salamlayıb, səmimi ürək sözlərini bölüşüb. İcra başçısı bildirib ki, Ulu Öndər Heydər Əliyevin müdrik fikrində deyildiyi kimi, “Azərbaycanın müstəqil dövlət olması, xalqımızın azadlığa çıxması tarixi hadisələrdir və biz bunları qiymətləndirməli, əldə edilmiş nailiyyətləri əbədləşdirməliyik. Bu, istər bizim, istərsə də gələcək nəsillərin qarşısında duran strateji vəzifədir”. Azərbaycan dövlətçiliyinin, milli müstəqilliyinin daimi və dönməz xarekter alması, müstəqil və uğurlu daxili-xarici siyasət, beynəlxalq aləmdə nüfuzunun artması və dünya birliyində sivil ölkə kimi tanınması məhz Heydər Əliyevin böyük zəhmətlərinin nəticəsidir. Heydər Əliyevin Azərbaycana rəhbərlik etdiyi ötən əsrin 70-80-ci illəri yaddaşlarda təkcə iqtisadi yüksəliş, təsərrüfatın bütün sahələrinin inkişafı dövrü kimi deyil, həm də elmin, təhsilin, mədəniyyətin, səhiyyənin misilsiz tərəqqisi illəri kimi qalıb. Məhz həmin dövrdə gələcək müstəqilliyimizin təməl daşları hörülüb, iqtisadi, sosial və mədəni potensialı formalaşıb. 1969-1982-ci illərdə həyatımızın bütün sahələrində köklü islahatlar aparılmış, əsaslı dəyişikliklər baş vermişdir. Bu nəhəng işlər öz miqyasına görə Azərbaycanın quruculuq salnaməsində ən dolğun səhifələri təşkil edir. Bildiyimiz kimi, XX əsrin 60-cı illərində Azərbaycanda durğunluq hökm sürürdü, respublika iqtisadi göstəricilərinə görə ittifaq miqyasında sonuncu yerlərdən birində idi. Azərbaycan Kommunist Partiyası Mərkəzi Komitəsinin 1969-cu il iyulun 14-də keçirilmiş plenumunda Heydər Əliyev Azərbaycan Kommunist Partiyası Mərkəzi Komitəsinin birinci katibi seçildikdən sonra bu acınacaqlı vəziyyətə son qoyulmasına başlandı. 1969-1982-ci illər Azərbaycan tarixinə intibah dövrü kimi daxil oldu. Ulu Öndərin 1969-cu ildə ölkə rəhbərliyinə gəlişi keçmiş SSRİ-nin geridə qalmış respublikalarından biri sayılan Azərbaycanda həyat ritmini büsbütün dəyişdi, ölkədə görünməmiş canlanma və yüksəliş, tikinti-quruculuq işləri başlandı. Heydər Əliyevin gərgin fəaliyyəti nəticəsində iqtisadiyyat, sənaye və kənd təsərrüfatında, mədəniyyət və təhsil sahəsində böyük uğurlar əldə edildi. Məhz Heydər Əliyevin Azərbaycana rəhbərlik etdiyi o illərdə bugünkü dövlət müstəqilliyimizin möhkəm təməli qoyuldu, milli ruh, azərbaycançılıq məfkurəsi yüksəlməyə başladı, kadr korpusunun milliləşdirilməsi istiqamətində qətiyyətli addımlar atıldı, hər il yüzlərlə gənc müxtəlif mühüm, o cümlədən hərbi ixtisaslara yiyələnmək üçün SSRİ-nin ən qabaqcıl ali məktəblərinə göndərildi, azərbaycanlılar mühüm dövlət vəzifələrinə irəli çəkildilər. Tam qətiyyətlə və cəsarətlə demək olar ki, Heydər Əliyevin Azərbaycana rəhbərlik etdiyi dövr onun tarixinin xüsusi, ən intensiv inkişaf mərhələsini təşkil edir. Bu mənada həmin dövrü tariximizin nəinki sürətli və hərtərəfli yüksəliş illəri, eyni zamanda, yeni tarix adlandırmaq daha dəqiq qiymətləndirmə nümunəsi olardı. Heydər Əliyevin respublikaya rəhbərliyinin bütün fəlsəfəsi xalqın milli dirçəlişi, milli qürur hisslərinin oyanışı məramına hesablanmışdı. Heydər Əliyevin fəaliyyətinin təhlili göstərir ki, Ulu Öndər sanki gələcəyi görür, Azərbaycanın gələcək müstəqilliyi üçün hələ sovet dövründə mütəmadi iş aparmışdır. Bu ideyanın əsasında, ilk növbədə, yüksəkixtisaslı milli kadr potensialının yaradılması dayanırdı. Ulu Öndər Heydər Əliyev “Təhsil hər bir dövlətin, ölkənin, cəmiyyətin həyatının, fəaliyyətinin mühüm sahəsidir. Cəmiyyət təhsilsiz inkişaf edə bilməz” devizini rəhbər tutaraq idarəçiliyinin bütün mərhələlərində elm və təhsilin inkişafına da xüsusi qayğı ilə yanaşmış, ilk növbədə xalqın intellektual gələcəyini düşünmüşdür. Nəzər salsaq görürük ki, təkcə 1969-1982-ci illərdə 770-ə qədər məktəb binası istifadəyə verilmiş, respublikada ali məktəblərin sayı 12-dən 17-yə, burada təhsil alan tələbələrin sayı isə 70 mindən 100 minə çatdırıldı. Keçmiş SSRİ-nin 50-dən artıq böyük şəhərinin 170-dən çox ən məşhur ali məktəblərində respublikamızda ən çox ehtiyac duyulan 250-dən çox ixtisas üzrə 17 minədək azərbaycanlı gəncin təhsil alması təmin olundu. Ümummilli Liderin xalqın tələbi ilə ölkə rəhbərliyinə qayıdışı ilə göründüyü kimi bir çox sahələrdə genişmiqyaslı islahatların, o cümlədən qanunvericilik islahatlarının həyata keçirilməsinə başlanıldı. 1995-ci il noyabrın 12-də referendum yolu ilə müstəqil Azərbaycanın ilk Konstitusiyası qəbul edildi. Bununla da Azərbaycan demokratik inkişafın yeni mərhələsinə qədəm qoydu. Eyni zamanda, Ulu Öndər Heydər Əliyev qəbul ediləcək yeni Konstitusiyanın məqsədləri, qaynaqları və mahiyyətinə aydınlıq gətirərək ölkə Konstitusiyası barədə belə söyləmişdir: “Konstitusiya birinci növbədə dövlətlə, hakimiyyətlə xalqın arasında olan münasibətləri özündə əks etdirməlidir. Hakimiyyət bölgüsü, ali icra, qanunvericilik, məhkəmə hakimiyyətləri - bunlar hamısı xalqın iradəsinə söykənməli, seçkilər yolu ilə təmin olunmalıdır”. Konstitusiyanın qəbul edilməsinin milli dövlətçilik tarixində müstəsna əhəmiyyəti nəzərə alınaraq, Ulu Öndər Heydər Əliyev tərəfindən imzalanan 1996-cı il 1 noyabr tarixli fərmana əsasən hər il noyabrın 12-si ölkəmizdə Konstitusiya Günü kimi qeyd edilməyə başlandı. Əminliklə deyə bilərik ki, hazırda dövlətimiz müstəqillik tarixinin ən qüdrətli, yüksək inkişaf mərhələsini yaşayır. Müstəqil dövlətçilik tariximizin ən mühüm hadisəsi şübhəsiz ki, tarixi Azərbaycan torpaqlarının işğaldan azad edilməsi oldu. 2020-ci il sentyabrın 27-də başlayan, 44 gün davam edən və işğal altındakı ərazilərimizin qaytarılması ilə nəticələnən Vətən müharibəsi müasir tariximizin ən parlaq səhifəsi olmaqla, Azərbaycan xalqının qürur mənbəyidir. Bununla bağlı, Azərbaycan Respublikasının Prezidenti, Müzəffər Ali Baş Komandan İlham Əliyev 2021-ci il sentyabrın 27-də Anım Günü ilə əlaqədar xalqa müraciətində qeyd etmişdir: “İkinci Qarabağ müharibəsi bizim şanlı tariximizdir. Bu Qələbə tarixdə əbədi qalacaq. Azərbaycan Silahlı Qüvvələri 44 gün ərzində düşmən ordusunu məhv edərək öz ərazi bütövlüyünü bərpa etdi... Biz düşməni torpaqlarımızdan qovduq və ədaləti, beynəlxalq hüququ bərpa etdik. Biz milli ləyaqətimizi bərpa etdik. Bu gün Azərbaycan xalqı müzəffər xalq kimi yaşayır. Bu gün Azərbaycan dövləti qalib dövlət kimi yaşayır. Biz bundan sonra müzəffər xalq və qalib dövlət kimi əbədi yaşayacağıq”. 2023-cü il sentyabrın 20-də Azərbaycan Respublikasının bütün ərazisində qanunun aliliyinin təmin olunduğu və Azərbaycan Respublikasının dövlət suverenliyinin bərpa edildiyi nəzərə alınaraq Respublika Prezidentinin 2024-cü il 19 sentyabr tarixli Sərəncamı ilə hər il sentyabrın 20-si Azərbaycan Respublikasında Dövlət Suverenliyi Günü kimi təsis edildi. Sərəncamda qeyd edildiyi kimi: “Hər bir xalq üçün öz taleyinə sahib olmaq, müstəqil dövlətini yaradaraq inkişaf etdirmək onun ən böyük nailiyyətidir. Tarixin müxtəlif mərhələlərində üzləşdiyi çətinliklərə, işğala, məhrumiyyətlərə baxmayaraq, heç bir qüvvə xalqımızın müstəqillik, dövlətçilik əzmini sarsıda bilməmişdir. Azərbaycan xalqı bu gün öz müstəqil dövlətinə sahibdir, qəhrəman əsgər və zabitlərimizin, şəhidlərimizin qanı hesabına əldə edilmiş ərazi bütövlüyümüz, suverenliyimiz xalqımızın milli sərvətidir”. Prezidentin müəyyən etdiyi strateji xəttə əsaslanaraq dayanıqlı iqtisadi inkişafın təmin olunması məqsədilə çevik, adekvat addımlar atılıb, kompleks islahatların həyata keçirilməsi nəticəsində makroiqtisadi sabitlik möhkəmləndirilib, biznes və investisiya mühiti daha da yaxşılaşdırılıb. Rayon rəhbəri Respublika Prezidenti İlham Əliyevin imzaladığı müvafiq Sərəncamla 2025-ci ilin Respublikamızda “Konstitusiya və Suverenlik İli” elan edilməsini Azərbaycan dövləti üçün yeni inkişaf mərhələsinin başlaması istiqamətində önəmli addım olmaqla, ölkəmizin hərtərəfli inkişafında mühüm mərhələ olacağını qeyd edib. Azərbaycanın əsl müstəqilliyini, hüquqi dövlət quruculuğunu və milli suverenliyinin tam bərqərar olunmasını Ulu Öndər Heydər Əliyevin başladaraq həyata keçirdiyi və bu gün cənab Prezident İlham Əliyevin qətiyyətlə davam etdirdiyi siyasi kurs təmin etdi. Bu gün şanlı üçrəngli bayrağımız işğaldan azad olunmuş bütün ərazilərimizdə əzəmətlə dalğalanaraq, Azərbaycanın milli suverenliyini bütün dünyaya vüqarla bəyan etməkdədir. Azərbaycanın müstəqilliyi daimidir və sarsılmazdır. Heç bir qüvvə tarixinin ən qüdrətli dövrünü yaşayan Azərbaycanın  müstəqilliyinə və suverenliyinə təhdid yarada bilməz. İcra başçısı  vurğulayıb ki, Ulu Öndərin söylədiyi kimi, “Dövlət müstəqilliyi Azərbaycan xalqının tarixi nailiyyətidir və bu tarixi nailiyyəti qoruyub saxlamağı biz özümüzün ali vəzifəmiz, ən yüksək borcumuz hesab edirik”. Müstəqil Azərbaycan yaşadıqca, Ulu Öndər Heydər Əliyev də ürəklərdə yaşayacaqdır. Xalqımız Ulu Öndər Heydər Əliyevin əziz xatirəsini həmişə uca tutur və minnətdarlıqla anır. Əminik ki, Heydər Əliyev yolu Azərbaycanı daha böyük uğurlara aparacaqdır.

Azərbaycan Respublikası Milli Məclisinin Beynəlxalq münasibətlər və parlamentlərarası əlaqələr komitəsinin sədri, Avropa İttifaqı Parlament Əməkdaşlıq Komitəsindəki nümayəndə heyətinin rəhbəri Səməd Seyidov çıxış edərək tədbir iştirakçılarını salamlayıb, dahi şəxsiyyət Heydər Əliyevə həsr olunmuş tədbirin əhəmiyyətindən söz açıb. Millət vəkili Səməd Seyidov bildirib ki, bu gün Azərbaycan dünyada aparıcı dövlətlərdən birinə çevrilibsə, qalib ölkə kimi bütün dünyada söz sahibidirsə, bunun təməlində Ulu Öndərin siyasəti dayanır. “Bu gün Azərbaycan dövləti elə bir siyasət aparır ki, həmin siyasətlə bütün dünya hesablaşır”, - deyən millət vəkili Ulu Öndər Heydər Əliyevin əsasını qoyduğu dövlət siyasətinin bu gün onun layiqli davamçısı Prezident, Müzəffər Ali Baş Komandan İlham Əliyev tərəfindən uğurla davam etdirildiyini diqqətə çatırıb. Millət vəkili qeyd edib ki, Ulu Öndərin söylədiyi kimi, bu gün hər bir azərbaycanlı fəxr edir ki, qalib dövlətn vətəndaşıdır. Bu qalibiyyətə, qazandığımız nailiyyətlərə, uğurlara görə ölkə Prezidentinə minnətdarıq. Qürurla deyə bilərik ki, 56 il öncə dahi lider tərəfindən əsası qoyulmuş fəlsəfə bu gün də işləyir və gələcəkdə də işləyəcəkdir.

YAP Qazax Rayon Təşkilatının sədri Anar Nəbiyev çıxış edərək bildirib ki, 1969-cu il iyulun 14-dən respublikamıza rəhbərlik edən Heydər Əliyev ölkəmizin müstəqil dövlətçilik ənənələrinin inkişaf etdirilməsində, milli mənlik şüurunun oyanışında əvəzsiz xidmətlər göstərmişdir. Tariximizin Heydər Əliyev dövrü müasir Azərbaycan cəmiyyətinin formalaşması vəzifələrinin uğurla və ardıcıl olaraq yerinə yetirilməsi ilə seçilir. Məhz Heydər Əliyevin rəhbərliyi illərində Azərbaycan böyük və sürətli inkişaf mərhələsinə qədəm qoyub. Heydər Əliyevin Azərbaycana rəhbərlik etdiyi birinci dövr təkcə iqtisadi yüksəliş dövrü kimi deyil, həm də elmin, təhsilin, mədəniyyətin tərəqqisi illəri kimi yadda qalıb. Məhz həmin dövrdə gələcək müstəqilliyimizin təməli qoyulub, sosial, iqtisadi və mədəni potensialı formalaşıb. Həyatın bütün sahələrində köklü islahatların aparılması Azərbaycanın quruculuq salnaməsində böyük səhifələrə yol açıb. Ölkənin inkişafı istiqamətində görülən işlər, qəbul edilən cəsarətli qərarlar, həyata keçirilən tikinti, quruculuq işləri Azərbaycanın gələcəyinə hesablanmış məqsədyönlü addımlar idi. Ulu Öndər Heydər Əliyevin Azərbaycan xalqı və dövləti qarşısındakı tarixi xidmətləri dahi şəxsiyyətin fəaliyyətinin bütün mərhələlərini əhatə edir. Heydər Əliyevin azərbaycançılıq ideologiyasının həyata keçirilməsi müstəqil dövlətimizin bugünkü varlığının və gələcək inkişafının əsasını təşkil edir. Belə ki, ölkəmizdə əsası Heydər Əliyev tərəfindən qoyulmuş azərbaycançılıq ideologiyasının formalaşması dövlətçiliyimiz və xalqımızın inkişafında mühüm rol oynamışdır. Ümummilli Lider həm müstəqil Azərbaycanın iqtisadi inkişafını müəyyənləşdirdi, həm də müstəqil dövlət ideologiyası olaraq azərbaycançılığın iqtisadi təməlini formalaşdırdı. Bu gün müasir müstəqil Azərbaycan Ulu Öndər Heydər Əliyevin ideyaları əsasında inkişaf edir. Azərbaycan Heydər Əliyev yolu ilə irəliləyir. Ümummilli Lider Heydər Əliyevin xalqımız qarşısında ən böyük xidmətlərindən biri Azərbaycanı idarə etməyə qadir olan layiqli davamçı hazırlamasıdır. Beynəlxalq aləmdə nüfuzlu siyasətçi kimi qəbul olunmuş, müasir təfəkkürlü Prezident İlham Əliyev atdığı addımlarda Heydər Əliyev siyasi kursunun layiqli davamçısı olduğunu təsdiqləmişdir. Müasir, müstəqil Azərbaycan dövlətinin qurucusu və memarı Heydər Əliyevin siyasi kursu bundan sonra da milli dövlətçiliyimizin inkişafına xidmət edəcək. Prezident İlham Əliyevin rəhbərliyi ilə Azərbaycan inamla irəliləyəcək.

Partiya veteranı Bəsdi Ələkbərova çıxış edərək Ümummilli Lider Heydər Əliyevin Azərbaycan dövləti və xalqı qarşısında müstəsna xidmətlərindən danışıb. O, qeyd edib ki, Azərbaycanın çoxəsrlik dövlətçilik tarixində Heydər Əliyev dövrünün böyük əhəmiyyəti var. Bu dövr 1969-cu il 14 iyul tarixindən başlayır. Məhz xalqımızın Ümummilli Lideri Heydər Əliyevin Azərbaycanda siyasi hakimiyyətə gəldiyi həmin gün müstəqil və qüdrətli Azərbaycan dövlətinin əldə etdiyi bütün uğurların təməli, xalqın özünəqayıdışının başlanğıcı kimi yadda qalıb. Həmin dövr xalqımızın və dövlətimizin mənafeyinə xİdmət edən əhəmiyyətli addımlar atılıb, misilsiz xidmətlər göstərilib. Azərbaycan tarixinin, ədəbiyyatının, mədəniyyətinin öyrənilməsinə və təbliğ olunmasına, Azərbaycanın bütün dünyada tanıdılmasına xüsusi diqqət verilib. Məhz 1969-cu ilin iyul plenumunda Heydər Əliyevin respublika rəhbəri təyin edilməsi ilə Azərbaycanın tarixində sürətli inkişaf dövrü başlayıb. Qısa vaxt ərzində mühüm sənaye müəssisələri Azərbaycanın şəhərlərində inşa edilib, təsərrüfat, elm və təhsil sahələrində qətiyyətli islahatlar həyata keçirilib. Azərbaycan dövlətinin həqiqi inkişafı məhz o tarixdən başlayıb. Heydər Əliyevin yorulmaz fəaliyyəti, həyata keçirdiyi tədbirlər Azərbaycanın müstəqilliyi, siyasi-iqtisadi gücü, dünyada tanınması üçün əvəzsiz və təkrarolunmaz təməl oldu. Həmin tarixdən 56 il keçməsinə baxmayaraq, xalqımız Ulu Öndərin uzaqgörən, elmi-iqtisadi cəhətdən əsaslandırılmış siyasətinin bəhrəsini görür. Ulu Öndər Heydər Əliyev tərəfindən 1969-cu il 14 iyul tarixində təməli qoyulmuş müstəqil və qüdrətli Azərbaycan bu gün Prezident İlham Əliyevın qətiyyəti sayəsində daha da inkişaf edir, ölkədə böyük islahatlar həyata keçirilir, tarixi Zəfərin təntənəsi ilə özünün ən qüdrətli və güclü dövrünü yaşayır.

Qocaman tarix müəllimi, Yuxarı Salahlı kənd sakini Məhəmməd Vəkilov çıxış edərək bildirib ki, Azərbaycan tarixində və dövlətçiliyin inkişafında misilsiz xidmətləri olmuş Heydər Əliyevin çoxşaxəli fəaliyyətində təhsil xüsusi yer almışdır. Həm sovet dövründə, həm də müstəqillik illərində ölkəmizə rəhbərlik etdiyi zamanlarda həyata keçirdiyi təhsil siyasəti mühüm tarixi əhəmiyyət daşımışdır. Ümummilli Lider Heydər Əliyev 1969-cu ildə hakimiyyətə gəldikdən sonra Azərbaycan xalqının tərəqqisində təhsilin roluna xüsusi əhəmiyyət verilir, xalqımızın maariflənməsinə, savadlanmasına diqqət yetirilir,  təhsilə dair çoxsaylı qərarlar qəbul edilir, milli kadrların hazırlanmasına xüsusi əhəmiyyət verilir, yeni məktəblər tikilir, onların maddi-texniki bazası gücləndirilir, müəllimlərə qayğı göstərilirdi. Həmin  illərdə ali təhsilli müəllimlərin sayının artırılmasına, xüsusilə də kənd məktəblərinin ixtisaslı müəllim kadrları ilə təmin edilməsinə xüsusi yer verilirdi. Müəllimlərin fəxri adlar almasında, ölkədə tanıdılmasında dahi şəxsiyyətin müəllim əməyinin qiymətləndirilməsinə böyük diqqət yetirdiyini göstərirdi. Ulu Öndər Heydər Əliyev Azərbaycan təhsilinin beynəlxalq əlaqələrinin qurulmasına və respublikanın xarici ölkələr üçün mütəxəssis hazırlayan mərkəzlərdən birinə çevrilməsinə çalışır və buna nail olurdu. Azərbaycanın  ali məktəblərində təhsil alan xarici ölkə gənclərinin sayı ildən- ilə artır, Azərbaycan gənclərinin  keçmiş ittifaqın ən nüfuzlu ali məktəblərində təhsil almaları üçün hər bir şərait yaradılırdı. Sovet dövründə təhsilin inkişafına ayrılan diqqət müstəqillik illərində özünün əhəmiyyətini xüsusi olaraq göstərdi. Ulu Öndər müstəqillik illərində də elm və təhsilin inkişafını diqqətdə saxlamış, Azərbaycanda dünyanın inkişaf etmiş ölkələrinin təcrübəsinə uyğun təhsil strategiyasında tədbirlər həyata keçirmiş, mühüm fərman və sərəncamlar imzalamışdır. Əsası Ulu Öndər Heydər Əliyev tərəfindən qoyulmuş Azərbaycan təhsilinin uğurlu inkişafı Prezident İlham Əliyevin rəhbərliyi ilə davam etdirilir və bundan sonra da dövlətimizin uğurlu gələcəyi naminə davam edəcək.

Gənc partiya fəalı Nicat Göşşüyev çıxış edərək bildirib ki, 56 il əvvəl milli inkişafın və tarixin qüdrətli Azərbaycanının təməli qoyuldu, Azərbaycan tədricən Heydər Əliyevin yüksək idarəçilik məharəti, düşünülmüş və uzaqgörən fəaliyyəti, siyasi iradəsi sayəsində keçmiş ittifaqda ən qabaqcıl respublikalardan birinə çevrildi. Ulu Öndərin hakimiyyətə birinci dəfə gəlişi ilə ölkədə sürətli yüksəliş, milli ruhun inkişafı və mənəviyyatın tərəqqisi dövrü başladı. Azərbaycanda bütün sahələrdə ciddi uğurlar əldə edilməklə yanaşı, milli yaddaşın dirçəldilməsi və milli özünüdərkin inkişaf etdirilməsində mühüm addımlar atıldı. Müstəqil dövlətçiliyimizin inkişafında gənclərimizin də rolu böyükdür. Ulu Öndər hakimiyyətinin hər iki dövründə də gənc nəslin mütəşəkkil formada yetişdirilməsi üçün mühüm işlər həyata keçirmiş, savadlı, qabiliyyətli, istedadlı gənclərə diqqət və qayğı göstərmiş, mükəmməl təhsil almaları üçün hər bir şərait yaratmışdır. Gənclərimizin əsl Azərbaycan vətəndaşı kimi formalaşmasında Ümummilli Lider Heydər Əliyevin misilsiz  xidmətləri var. Ulu Öndərin gəncliyə və gənclərə etimadı bu gün artıq öz təsdiqini tapmaqdadır. Bu gün bu siyasət Prezident İlham Əliyev tərəfindən uğurla davam etdirilir, hər zaman gənclər irəli çəkilir, onlara etimad göstərilir, ictimai işlər həvalə edilir, onlara öz imkanlarını göstərməsinə həmişə şərait yaradılır, gənclərlə bağlı müxtəlif sərəncamlar imzalanır, proqramlar qəbul edilir. Bütün bunlar məhz Ulu Öndərin siyasi kursunun davamıdır. Heydər Əliyevin Azərbaycan üçün gördüyü işlər, xalqımızın rifahı üçün yorulmaz fəaliyyəti bu gün hər bir azərbaycanlı üçün örnəkdir. Azərbaycan elmini, mədəniyyətini, tarixini və ədəbiyyatını dərindən bilən, böyük məhəbbətlə sevən və yüksək qiymətləndirən Ulu Öndər Heydər Əliyevin Azərbaycana rəhbərlik etməsi respublikanın ictimai-siyasi, iqtisadi və mədəni həyatında sürətli yüksəlişə səbəb oldu.  

Partiya veteranı şair Kazım Kazımlı çıxış edərək Ulu Öndər Heydər Əliyevə həsr olunmuş şeirlərini səsləndirərək dahi şəxsiyyətə olan sonsuz ehtiramını çatdırıb.