İcra başçısı vətəndaşları fərdi qəbul edərək müraciətlərini dinləyib

Cənab Prezident İlham Əliyevin rəhbərliyi altında ölkəmizdə həyata keçirilən dövlət siyasətinin təməlində vətəndaş amilinin dayanmasını bütün sahələrdə aydın şəkildə görmək olur. Bu, hər bir dövlət məmuruna nümunədir. Bu, eyni zamanda ölkə başçısı və Birinci vitse-prezident Mehriban xanım Əliyeva tərəfindən vətəndaşlara göstərilən qayğıda da hər zaman hiss edilir. 

Ölkə başçısının yerlərdə vətəndaş müraciətlərinə obyektiv şəkildə baxılması, vətəndaş məmnunluğunun təmin edilməsi ilə bağlı müvafiq sərəncam və tapşırıqlarının icrasına Qazax rayonunda hər zaman operativ və həssaslıqla yanaşılır. 

Vətəndaş məmnunluğunun təmin olunması istiqamətində dövlət siyasətini əsas tutaraq, Rayon İcra Hakimiyyətinin inzibati binasında vətəndaşların fərdi və ümumi qəbulları həyata keçirilir, müraciət və təklifləri dinlənilir. Rayonda şəhid ailələri və müharibə iştirakçılarının sosial qayğılarının öyrənilməsi və həlli də daim diqqət mərkəzində saxlanılır.

İyulun 7-də Qazax Rayon İcra Hakimiyyətinin başçısı Rəcəb Babaşov rayonun Ağköynək kəndindən müraciət etmiş Vətən müharibəsi iştirakçıları Omarov Səməd Epitat oğlu və Omarov Mədət Epitat oğlunu anaları ilə birlikdə fərdi qəbul edib. Rayon rəhbəri müharibə iştirakçılarının qayğılrları ilə maraqlanaraq müxtəlif məzmunlu müraciətlərini dinləyib, müvafiq olaraq cavablandırıb.