Qazaxlı qadın idmançımız “Bakı-2017”nin ağır atletika yarışlarında bürünc medal qazanıb

Bakıda keçirilən IV İslam Oyunlarında ağır atletika yarışları davam edir. Dünən çəkisi 63 kq olan qadınlar körpücük üzərinə çıxıblar.

Qazaxdakı “Zirvə” idman klubunun yetirməsi olan Elnarə Abbasova da medal mübarizəsi aparıb. Elnarə birdən qaldırma hərəkətində 82 kq, təkanla qaldırma hərəkətində isə 102 kq-ı ram edib. Toplam 184 kq (82+102) nəticə göstərən atletimiz bu çəkidə bürünc medal qazanıb.

Elnarə Abbasova yarışdan sonra fikirlərini və sevinc hislərini AAAF TV ilə bölüşüb:

“Belə bir nəticəni gözləmirdim və çox sevincliyəm. Mən əziyyətimi çəkən məşqçim Rayət Abdalova təşəkkürümü bildirirəm və qarşılarında baş əyirəm. Yarış zalında göz yaşlarımı saxlaya bilmədim. Bu, mənim sevinc göz yaşlarım idi”.



Qeyd edək ki, Elnarə Elçin qızı Abbasova ağır atletika ilə 2011-ci ildən məşğul olur. İndiyə qədər bir çox uğurlar qazanan Elnarə 2014-cü ildə Türkiyənin Ankara şəhərində keçirilən klublararası Dünya çempionatında II yerə çıxıb. Bu ilin mart ayında isə Bakıda keçirilən Respublika çempionatında qalib gələrək “mütləq çempion” adını qazanıb.


Həmyerlimiz E.Abbasovanı qazandığı qələbə münasibətilə səmimi qəlbdən təbrik edir, ona daha yüksək nailiyyətlər qazanmağı arzulayırıq.