Qazax şəhər Qaratel Hacımahmudova adına ümumi orta məktəbin müəllimləri “Virtual məktəb”də toplantı keçiriblər
Bildiyiniz kimi, ölkəmizdə koronavirus (COVID-19) infeksiyasının
yarada biləcəyi təhlükənin qarşısının alınması məqsədilə Azərbaycan
Respublikası Nazirlər Kabinetinin qərarına əsasən təxirəsalınmaz tədbirlər çərçivəsində2020-ci ilin mart ayının 3-dən bütün təhsil müəssisələrində
tədris, təlim-tərbiyə prosesinin dayandırılmasına və bununla bağlı bütün tədbirlərin
təxirə salınmasına dair qərar qəbul olunub. Koronavirus infeksiyasının ölkədə
yayılmasının, onun törədə biləcəyi fəsadların qarşısının alınması məqsədilə Azərbaycan
Respublikasının Sanitariya-epidemioloji salamatlıq haqqında Qanununun 25-ci
maddəsinə əsasən Azərbaycan Respublikasında 24 mart 2020-ci
il saat 00:00-dan etibarən 20 aprel saat 00:00-dək xüsusi
karantin rejimi elan edilib. Hazırda isə Azərbaycan Respublikası Nazirlər
Kabinetinin 1 may 2020-ci il tarixli
sərəncamına əsasən ölkəmizdə elan edilən karantin rejiminin müddəti 2020-ci
il mayın 4-dən 31-dək uzadılıb. Odur ki, ölkə ərazisində fəaliyyət
göstərən bütün təhsil müəssisələrində tədris, təlim-tərbiyə prosesinin
dayandırılması qüvvədə qalır. Respublikamızın hər yerində olduğu kimi, Qazaxda
da bu müddət ərzində şagirdlər üçün təhsilin
intensivliyinin təmin edilməsi məqsədilə bütün səy və imkanlardan səmərəli
istifadə olunur. Şagirdlərin tədris prosesindən uzaq qalmamaları üçün əlavə tədbirlər
görülür. Bunlardan biri də onlayn dərslər və distant təhsildir ki, Qazaxda
uğurla həyata keçirilməkdədir. Ümumtəhsil
müəssisələrinin şagirdləri üçün məsafədən tədris imkanlarını genişləndirmək
məqsədilə aprel ayının əvvəlindən Azərbaycan Respublikası Təhsil Nazirliyi və
"Microsoft” şirkəti arasında əməkdaşlıq çərçivəsində "Virtual məktəb” layihəsinə
start verilib. Belə ki, hər bir şagird "Microsoft Teams” adlı tətbiqi yükləyib "Virtual məktəb” portalında qeydiyyatdan keçərək
müvafiq sinifə təyin olunur və müəllimlər tərəfindən həftəiçi teledərslərdə tədris
olunmuş mövzulara uyğun hazırlanmış tapşırıqları yerinə yetirirlər. Təhsil
Nazirliyinin "Virtual məktəb” layihəsinə qoşularaq müəllim və şagirdlər üçün
yaradılan imkanlardan səmərəli istifadə edən məktəblərdən biri də Qaratel Hacımahmudova adına şəhər ümumi orta məktəbdir. Məktəbin müəllim-şagird kollektivi ilk gündən zoom proqramı ilə onlayn
dərslərdə fəallıq nümayiş etdirdikləri kimi, "Virtual məktəb” layihəsində də
aktivlikləri ilə seçilirlər. Məktəb
direktoru Yeganə Göyüşlü ilə müəllimlərin "Virtual məktəb”də keçirdikləri
toplantı da bunun əyani sübutudur. Artıq beşinci dəfədir ki, "Virtual məktəb”
portalında toplantı keçirən kollektiv bugünkü virtual görüşdə də portalın
yaratdıqları imkanlardan söz açıblar. Təhsil Nazirliyinin onlar üçün açdıqları
geniş imkanları bir daha minnətdarlıq hissi ilə qarşılayıblar. Məktəb
direktoru Təhsil Nazirliyinin təşkilatçılığı ilə 11 mart 2020-ci il tarixdən
Mədəniyyət və ARB "Günəş” kanallarında həftənin 5 günü
teledərslər keçirilməsini, teledərslərin yayınlamasına zamanında baxa
bilməyənlər üçün youtube kanalı və facebook sosial şəbəkəsində izləmək
imkanının yaradılmasını təhsil sahəsinə olan qayğı və bu sahədə görülən uğurlu
işlərin əyani sübutu kimi göstərib. 2 aprel 2020-ci il tarixdən virtual.edu.az
saytında yaradılan "Virtual məktəb” layihəsi ilə geniş imkanların
açılmasını bu istiqamətdə görülən işlərin davamı kimi dəyərləndirib. Eyni
zamanda müəllimlərə dərs dedikləri şagirdləri həmin teledərslərə yönləndirməyi,
günün ikinci yarısında isə "Virtual məktəb”də dərslərin keçirilməsini və
teledərslərdə qeyd olunan mövzuların müzakirə olunmasını tövsiyə edib. Videotoplantıda "Virtual məktəb” layihəsinin üstünlüklərindən, orada olan
yeniliklərdən, eləcə də istifadə qaydalarından da geniş şəkildə danışılıb və
izahatlar verilib. Məktəbin kimya
müəllimi Elmar İbrahimov, Azərbaycan dili və ədəbiyyat müəllimi Flora Əmirova, ibtidai
sinif müəllimlərindən Gülbəniz Bəxtiyarova, Mehriban Kərimova, riyaziyyat
müəllimi Nəsibə İsgəndərova, biologiya müəllimi Aybəniz Qurbanova toplantıda
çıxış edərək ürək sözlərini çatdırıblar. Karantin rejimi müddətində gördükləri
işlər, "Virtual məktəb”də qeydiyyatdan keçən şagirdləri və keçdikləri dərslər haqqında
məlumat veriblər. Məktəb
direktoru sonda bir daha portalın imkanlarından səmərəli istifadə edərək aktiv
iştirak etmələrini, portalda təşkil olunan təlimlərə, seminarlara qatılmalarını
tövsiyə edib. GOYEZEN.AZ
Facebook-da paylaş