Qazax: Təhsilə qayğı diqqət mərkəzindədir
RESPUBLİKA
MƏTBUATI QAZAX HAQQINDA
Son illərdə milli təhsilin
inkişaf etdirilməsi, bu sahədə maddi-texniki bazanın gücləndirilməsi,
irimiqyaslı infrastruktur layihələrinin həyata keçirilməsi dövlət başçısı İlham
Əliyevin apardığı siyasətdə prioritet təşkil edir. Böyük şəhərlərlə yanaşı,
respublikanın ən ucqar yaşayış məntəqələrində də köhnə, uyğunsuz binalar tarixə
qovuşur. Əvəzində isə müasir standartlara cavab verən təhsil ocaqları inşa
olunaraq müəllim və şagirdlərin istifadəsinə verilir. Danılmaz faktdır ki, Heydər
Əliyev Fondunun prezidenti Mehriban xanım Əliyevanın təşəbbüsü ilə fondun
maliyyə dəstəyi hesabına ölkənin bütün bölgələrində qəzalı vəziyyətdə olan yüzlərlə
məktəb binası tikilib bütün zəruri avadanlıqlarla təchiz olunaraq istifadəyə
verilmişdir. Məhz bunun nəticəsidir ki, respublikada təhsil sahəsində ürəkaçan
nailiyyətlər əldə olunur. Sözsüz ki, ziyalılar məkanı olan Qazax rayonu da bu
diqqət və qayğıdan kənarda qalmamışdır. Hələ ötən əsrin əvvəllərində
Qazax müəllimlər seminariyasından Qazax mahalı ilə bərabər respublikanın bir
çox bölgələrində, eləcə də, qonşu Gürcüstan və Qərbi Azərbaycanda yaşayan
soydaşlarımız da bəhrələnmişlər. Qeyd etmək lazımdır ki, bu gün Qazax
ziyalıları ölkəmizdə və respublika hüdudlarından kənarda ad-san qazanmışlar.
Hazırda Qazaxda elmə, təhsilə yüksək həssaslıqla yanaşılır. Qazax rayonunda son
illərdə bütün sahələrdə olan sürətli inkişafı, tərəqqini görməmək mümkün deyil. Rayonda təhsilin hazırkı
durumu ilə bağlı Qazax rayon Təhsil şöbəsinin müdiri Nizaməddin Babanlı ilə həmsöhbət
olduq. Həmsöhbətim qeyd etdi ki, son üç ildə rayonda təhsil sahəsində bir çox
layihələr həyata keçirilmişdir. Rayon İcra Hakimiyyətinin başçısı Rəcəb
Babaşovun imzaladığı müvafiq Sərəncamla işçi qrup yaradılmışdır. Bu işçi qrup əsasən
məktəblərdə şagirdlərin dərsə davamiyyətinə və təhsilin keyfiyyətinə ciddi nəzarət
edir. Qazaxda 33 tam orta, o cümlədən,
1 məktəb-lisey, 6 ümumi orta, 6 ibtidai məktəb, 2 məktəbdənkənar müəssisə fəaliyyət
göstərir. Təhsil ocaqlarında 12882, o cümlədən, 1048 nəfər məktəbə hazırlıq
qrupunda təhsilə cəlb edilmişdir. Şagirdlərin təlim-tərbiyəsi ilə 1685 nəfər müəllim
məşğul olur. Ötən təhsil ilində təhsilini
başa vuran 676 nəfər məzundan 509 nəfər ali məktəbə qəbul imtahanlarında
iştirak etmiş, onlardan 274 nəfər respublikanın nüfuzlu ali təhsil ocaqlarına qəbul
olmuşlar. Sevindirici haldır ki, tələbə adını qazananlardan 49 nəfər 500-dən,
19 nəfər isə 600-dən yuxarı bal toplamışlar. Əvvəlki illərin məzunlarından 55 nəfər
müvəffəqiyyətlə ali təhsil ocaqlarına qəbul olmuşlar. Bununla yanaşı 77 nəfər məzun
orta ixtisas təhsili müəssisələrinə qəbul olmuşlar. Bir sözlə, əvvəlki illərin
məzunları ilə birlikdə qəbul olma faizi 70,51 faiz olmuşdur. Qazaxlı şagirdlər fənn
olimpiadalarında da uğurlu nəticələr əldə etmişlər. 2018-ci ildə olimpiadaların
rayon turunda 374 şagird iştirak etmiş, zona mərhələsinə 49 şagird vəsiqə
qazanmışdır. Mart ayında Gəncə şəhərində keçirilən olimpiadada 4 nəfər məktəbli
respublika mərhələsinə çıxmışdır. Aprel ayında Bakı şəhərində keçirilən
olimpiadada Azərbaycan dili və ədəbiyyatı fənni üzrə bir nəfər şagird – Bala Çaylı
kənd tam orta məktəbinin XI sinif şagirdi Quluyeva Günay Sabir qızı birinci yerə
layiq görülərək qızıl medal almış, respublika üzrə IX, X, XI sinif şagirdləri
arasında "Birincilərin birincisi” nominasiyasının qalibi olmuşdur. Bundan başqa,
ötən il VI, VII sinif şagirdləri arasında fizika, riyaziyyat, kimya, biologiya
və informatika fənnləri üzrə fənn müsabiqələri keçirilmişdir. Müsabiqənin rayon
mərhələsində 126 nəfər şagird iştirak etmişdir. Bu müsabiqədə 4 nəfər qalib gələrək
respublika müsabiqəsində iştirak etmək hüququ qazanmışdır. Qaliblər Bakı şəhərində
keçirilən respublika mərhələsində iştirak etmişlər. Məktəb-liseyin VII sinif
şagirdi Dadaşov Məhəmməd Vüqar oğlu informatika fənni üzrə respublika fənn
müsabiqəsində birinci yeri tutmuşdur. Rayonda yeniyetmələrdə hərbi-vətənpərvərlik
hissinin aşılanması məqsədilə mütəmadi olaraq müxtəlif maraqlı tədbirlər
keçirilir. Ümumtəhsil məktəblərinin X, XI sinif şagirdlərinin sıra hazırlığı,
faktiki hazırlıq, silahlar və atəş hazırlığı üzrə bilik və təcrübələrini
artırmaq məqsədilə Qazax rayonunda yerləşən Müdafiə Nazirliyinin "N” saylı hərbi
hissə və Daxili İşlər Nazirliyi daxili qoşunlarının Qazax rayon bölməsi ilə sıx
əməkdaşlıq edilmiş, vaxtaşırı olaraq şagirdlərin göstərilən bölmələrə səfəri təşkil
olunmuşdur. Qeyd etmək lazımdır ki, rayonda son illərdə təhsil müəssisələrinin əsaslı
və cari təmiri geniş vüsət almışdır. Azərbaycan Respublikasının Prezidenti cənab
İlham Əliyevin müvafiq Sərəncamı ilə dövlət büdcəsindən ayrılan vəsait hesabına
2018-ci ildə Qazax şəhər Səməd Vurğun adına 2 №-li tam orta məktəbi əsaslı təmir
olunmuşdur. Məktəbin açılışı bu il reallaşmışdır. Rayonun Ağköynək, Xanlıqlar və
Daş Salahlı kənd 1 saylı tam orta məktəblərində cari təmir işləri həyata
keçirilmiş, müəllim və şagirdlərin istifadəsinə verilmişdir. Rayonun bütün təhsil
müəssisələri İKT sistemi ilə təmin olunmuşdur. Görünən odur ki, Qazaxda bütün
sahələrlə yanaşı təhsil sistemi də özünün əsl inkişaf dövrünü yaşayır.
Vəli VƏLİYEV, "Respublika” qəzeti 10 mart 2019-cu
il
Facebook-da paylaş