BDU-nun Qazax filialında Xocalı soyqırımının 27-ci ildönümünə həsr olunmuş anım tədbiri keçirilib
Xocalı soyqırımı
qurbanlarının xatirəsi bir dəqiqəlik sükutla yad edilib. Soyqırım dəhşətlərini
əks etdirən slayt nümayiş olunduqdan sonra çıxışlar olub.
BDU Qazax filialının
direktor müavini, dosent Məmməd Yusifov tədbiri giriş sözü ilə açaraq
Azərbaycanın üzləşdiyi işğal və etnik təmizləmə siyasətindən danışıb, Xocalı
soyqırımı barədə tədbir iştirakçılarına ətraflı məlumat verib.
Filialın müəllimi Ülviyyə
Bayramova "Xocalı soyqırımı işğalçı erməni siyasətinin davamıdır” mövzusunda
məruzə ilə çıxış edərək qeyd edib ki, XX əsrdə Azərbaycan xalqına qarşı
törədilmiş soyqırımlardan ən ağrılısı Xocalı faciəsidir. Xocalı soyqırımı
Azərbaycan tarixinə ən dəhşətli və faciəli səhifələrdən biri kimi daxil olub.
1992-ci il fevral ayının 25-dən 26-na keçən gecə erməni-daşnak silahlı
qüvvələri və keçmiş sovet ordusunun 366-cı motoatıcı alayı Xocalıya divan
tutdu. Həmin vaxt dünya ictimaiyyətinin diqqəti bu dəhşətli soyqırıma
yönəldilməli və hadisəyə hüquqi-siyasi qiymət verilməli idi. Lakin o vaxtkı
hakimiyyət tərəfindən bunların heç biri edilmirdi. Qanlı Yanvar hadisələri
zamanı olduğu kimi, bu hadisənin də əsl mahiyyəti ümummilli lider Heydər
Əliyevin Azərbaycanda ikinci dəfə siyasi hakimiyyətə qayıdışından sonra açıldı
və dünya ictimaiyyətinə çatdırıldı. Milli Məclisin 1994-cü ilin fevral ayında
keçirilən iclasında Xocalı soyqırımı müzakirə edildi və hadisəyə hüquqi-siyasi
qiymət verildi. Xocalı soyqırımı ilə bağlı qərar da həmin yığıncaqda qəbul
edilərək fevral ayının 26-ı "Xocalı soyqırımı günü” elan olundu.
Respublika Prezidenti İlham
Əliyev Xocalı soyqırımı həqiqətlərinin dünya ictimaiyyətinə çatdırılması ilə
bağlı belə deyib: "Azərbaycana qarşı erməni şovinist dairələrinin XIX-XX
əsrlərdə mərhələ-mərhələ həyata keçirdiyi etnik təmizləmə siyasətinin tərkib
hissəsi olan Xocalı soyqırımı haqqında həqiqətlər dünya ictimaiyyətinə, xarici
ölkələrin parlamentlərinə çatdırılmalı, Azərbaycan xalqının və ümumən
insanlığın əleyhinə yönəlmiş bu son dərəcə ağır hərbi cinayət beynəlxaq
miqyasda öz hüquqi–siyasi qiymətini almalıdır”.
Daha sonra filialın
müəllimi Türkan Məmmədova "Tarixin qanlı səhifələri milli birliyin qarantı
kimi”, tələbələrdən Nigar İsmayıllı "Xocalı soyqırımı tariximizin ən dəhşətli
faciəsidir”, Kamran Əsgərov "Xocalı faciəsinə gənclərin elmi-nəzəri yanaşması”
adlı mövzularla çıxış edərək Xocalı soyqırımının Azərbaycan xalqının yaddaşına
yazılan ən dəhşətli faciə olduğunu qeyd ediblər.
Facebook-da paylaş