Qazaxda daha bir çoxmənzilli binanın təmiri uğurla davam etdirilir
Bu gün sevindirici haldır ki, ümummilli lider
Heydər Əliyevin müəyyənləşdirdiyi siyasi xətt uğurla davam etdirilir. Ulu
öndərin layiqli davamçısı Prezident İlham Əliyevin rəhbərliyi ilə sosial
islahatların əhatə dairəsi genişləndirilir. Ölkə başçısının əhalinin
məşğulluğunun və rahat yaşayışının təmin olunması, mənzil-məişət
şəraitinin yaxşılaşdırılması istiqamətində verdiyi tapşırıq və tövsiyələr
respublikada həyata keçirilən sosial siyasətin və aparılan quruculuq işlərinin
əsasını təşkil edir. Məhz bu diqqət və qayğının nəticəsidir ki, hər il paytaxtla
yanaşı, respublikamızın bölgələrində ictimai yaşayış binaları tikilərək istifadəyə
verilir və yaxud da mövcud çoxmənzilli yaşayış binaları əsaslı şəkildə təmir
olunur. Dövlət başçısının bununla bağlı verdiyi çoxsaylı Sərəncamlar bunu bir
daha sübut edir.
Respublikanın digər bölgələrində aparılan geniş
abadlıq-quruculuq işləri son iki il yarımdır ki, Qazax rayonunda da uğurla
həyata keçirilir. Rayonda demək olar ki, bütün sahələr üzrə bu quruculuq
işlərini görmək olar. Ölkə
başçısının diqqət və qayğısı sayəsində reallaşan işlərdən biri də rayondakı
çoxmənzilli yaşayış binalarının əsaslı şəkildə təmir olunmasıdır. Belə ki,
rayonda vətəndaşların yaşayış şəraitinin yaxşılaşdırılması istiqamətində həyata
keçirilən məqsədyönlü işlər daha geniş vüsət alıb. Prezident İlham
Əliyevin Qazaxda çoxmənzilli binaların əsaslı şəkildə təmir olunması ilə bağlı
imzaladığı 20 oktyabr 2016-cı il tarixli Sərəncama əsasən ötən il 78, bu il isə
daha 47 ədəd çoxmənzilli yaşayış binalarının fasadında, bloklarında pilləkan
qəfəslərində, su-kanalizasiya, elektrik, rabitə və qaz xətlərində əsaslı təmir,
rənglənmə və həyətlərində abadlıq işlərinin aparılması, 3 çoxmənzilli yaşayış
binasının həyətində isə xeyir-şər evlərinin tikilməsi və yaxud da təmir
olunması, bir binanın həyətində bu işin davam etdirilməsi bu sahədə görülən
işlərin əyani sübutudur.
Bundan əlavə,
dövlət başçısının respublikanın şəhər və rayonlarında çoxmənzilli binaların dam
örtüklərinin təmiri ilə bağlı əlavə tədbirlər haqqında imzaladığı 4 oktyabr 2018-ci
il tarixli Sərəncamı bu istiqamətdə görülən işlərin bundan sonra da uğurla
davam etdirilməsi deməkdir. Həmin Sərəncama əsasən şəhərin Azadlıq küçəsi 92
ünvanında yerləşən 4 bloklu, 5 mərtəbəli, 36 ailənin və Bakı küçəsi 1
ünvanında yerləşən 3 bloklu, 5 mərtəbəli, 30 ailənin yaşadığı binaların dam
örtüklərinin dəyişdirilməsi rayon sakinlərinə göstərilən diqqət və qayğının
təzahürüdür.
Rayonda
çoxmənzilli binalarda aparılan əsaslı təmir işləri bu gün də davam edir. Belə
ki, şəhərin Ə.Şıxlinski küçəsində yerləşən, keçmiş kənd təsərrüfatı
texnikumunun yataqxanası olan, 37 ailənin yaşadığı "Oxumaq-oxumaq”
adlanan binada əsaslı şəkildə təmir işlərinin aparılması görülən işlərin
yüksələn templə davam etməsindən xəbər verir.
Rayonda əsaslı
şəkildə təmir olunan çoxmənzilli binalardan biri də şəhərin N.Nərimanov yaşayış
massivində yerləşən, 4 bloklu, 5 mərtəbəli, 1 saylı binadır.
Binanın istər bloklarında, istərsə də xarici
fasadında işlər paralel olaraq aparılır. Hazırda bloklarda və xarici fasadda
üzlük vurulur. Elektrik, qaz xətləri səliqəyə salınır. Bloklara giriş qapıları
qoyulub. Həyətdə olan köhnə daşlar sökülərək səliqəyə salınır, blokların giriş
hissəsinə beton tökülür. Bundan başqa, binanın kənarında sakinlərin rahat şəkildə
gediş-gəlişini təmin etmək üçün yeni beton pilləkanlar qoyulub. Həyətdə olan
qarajların xarici fasadı suvanaraq rənglənib.
Çoxmənzilli yaşayış binasında görülən əsas işlərdən
biri də bina sakinlərinin istəyini nəzərə alaraq binanın həyətində xeyir-şər
evinin tikilməsidir. Hazırda xeyir-şər evinin xarici və daxili fasadında suvaq
işləri aparılır.
Çoxmənzilli
binalarda görülən işləri rayon sakinləri də yüksək qiymətləndirirlər.
Respublikamızda, eləcə də rayonda görülən genişmiqyaslı abadlıq, quruculuq işlərinə
görə ölkə başçısı İlham Əliyevə, rayon rəhbərliyinə öz dərin minnətdarlıqlarını
bildirirlər. GOYEZEN.AZ
Facebook-da paylaş