Qazaxda əhalinin tibbi müayinəsi davam edir
Ölkə Prezidenti
İlham Əliyevin tapşırıq və tövsiyəsinə uyğun olaraq fevralın
12-dən start götürən əhalinin kütləvi pulsuz tibbi müayinədən keçirilməsi
aksiyası Qazaxda da mütəşəkkil qaydada həyata keçirilir. Səhiyyə
Nazirliyinin müvafiq sərəncamına əsasən təşkil olunmuş aksiya
çərçivəsində bu günədək 58 min 466 nəfər tibbi müayinədən keçib.
Qazax Müalicə
Diaqnostika Mərkəzində, şəhər Poliklinikasında, eləcə də kənd həkim və tibb
məntəqələrində may ayının 12-dək davam edəcək müayinə aksiyasının bütün rayon
ərazisində yüksək səviyyədə təşkil olunması üçün səhiyyə müəssisələri lazımi
dərman preparatları ilə təchiz olunub və hər cür şərait yaradılıb. Bundan
başqa, rayon Mərkəzi Xəstəxanasının baş həkiminin 14 nömrəli əmrinə əsasən
müxtəlif ixtisaslı həkimlərin cəlb olunduğu 3 həkim briqadası da
yaradılıb. Həmin səyyar həkim briqadaları qrafik üzrə kənd tibb
məntəqələrində olur, ucqar kəndlərdə yaşayan və xəstəxanalara getmək imkanı olmayan
sakinləri də evlərində müayinə edirlər. Lazım olan halda briqadalar
tərəfindən şəhid ailələri və yaşlı insanların müayinə olunması üçün evlərə də
aktiv gedişlər olur. Xəstəliklər aşkar olunduğu halda xəstələr yerlərdə,
zərurət yarandığı halda isə baş həkimə məlumat verilərək rayon mərkəzinə və
bölgələrdə fəaliyyət göstərən ixtisaslaşmış tibb müəssisələrində əlavə müayinə
və müalicəyə cəlb olunurlar.
Məlumat üçün bildirək ki, aksiya dövründə səyyar həkim briqadaları
rayonun sərhəd kəndlərindən Kəmərli, Qaymaqlı, Aslanbəyli, Quşçu Ayrım, Məzəm, Fərəhli, Cəfərli, eləcə də Daş Salahlı kəndlərində
olaraq sakinləri tibbi müayinə ediblər. Qazaxbəyli kəndində məcburi
köçkünlərin məskunlaşdığı yeni qəsəbədə olan səyyar briqada burada
yaşayan Xeyrımlı, Aşağı
Əskipara və Yuxarı Əskipara kənd sakinlərinə də tibbi xidmət
göstəriblər.
Bu gün isə
səyyar briqadalar rayonun Çaylı və Bala Çaylı kəndlərində
olub, sakinləri tibbi müayinə ediblər.
Kənd sakinləri ölkəmizdə
bu xeyirxah aksiyanın təşkil olunmasını çox böyük ruh yüksəkliyi ilə
qarşıladıqlarını söyləyib, dövlətin onların sağlamlığına göstərdiyi qayğıya
görə ölkə başçısı İlham Əliyevə minnətdarlıq ediblər.
Bu cür
aksiyanın keçirilməsində isə əsas məqsəd vətəndaşlarda yaranmış xəstəliklərin
erkən aşkar edilməsi və qarşısının alınması üçün ilkin tibbi yardımların,
profilaktik tədbirlərin görülməsidir. Eyni zamanda, xəstəlik aşkar edilmiş
şəxslərin yerlərdə, zərurət yarandığı hallarda isə Bakı şəhərində və bölgələrdə
fəaliyyət göstərən ixtisaslaşdırılmış tibb müəssisələrində əlavə müayinə və
müalicəyə cəlb olunmalarını, digər sağlamlaşdırıcı tədbirlərin həyata
keçirilməsini təşkil etməkdir. GOYEZEN.AZ
Facebook-da paylaş