Vətənə xidmət yolunun şəhidlik zirvəsinə yüksələnləri heç vaxt unutmayacağıq
Bütün yüksəkliklərdən ucada dayanan bir zirvə var: Şəhidlik zirvəsi. Bu
zirvəyə qalxmaq, o yüksək zirvəni fəth etmək isə hər kəsə nəsib olmur. Yalnız
müqəddəs amallar uğrunda vuruşan, qorxu nə olduğunu bilməyən, Vətən və xalq
yolunda canını fəda etməkdən çəkinməyən cəsarətli, ləyaqətli, qeyrətli insanlar,
oğul və qızlar yüksələ bilirlər bu müqəddəs zirvəyə. Bu yüksəkliyə ucalan
insanlar ölmürlər, əksinə ölümləri ilə bir əbədilik qazanırlar. Əbədilik
qazanan şəhidlərimizin keçdiyi ömür yolu, qəhrəmanlıqları,
Vətənə olan sevgiləri illər ötsə belə dillər dastanı olacaq. Çünki müqəddəs
amal uğrunda şəhid olmaqla əbədiyyətə qovuşan bütün igidlərimizin keçdikləri
döyüş yolu davamçıları üçün bir örnəkdir. Belə şərəfli ömür sahiblərini xatırlamaq,
daim yad etmək, onların qəhrəmanlıqlarını gənc nəsillərə çatdırmaq isə hər
birimizin müqəddəs borcudur. Bu gün düşmənlə 168 km məsafədə
sərhəddi olan Qazax rayonunun Bağanıs Ayrım,
Xeyrımlı, Barxudarlı, Sofulu, Qızılhacılı, Yuxarı Əskipara və Aşağı Əskipara kimi 7 kəndi hələ də
düşmən tapdağı altındadır. 5 kəndi isə daim düşmən gülləsinin atəşinə məruz
qalır. Vətən torpaqlarının ərazi bütövlüyü uğrunda 287 nəfər şəhid verən, 7 nəfər
igid oğlu Azərbaycanın Milli Qəhrəmanı adını alan Qazaxda igid oğul və
qızlarımızın xatirəsi hər zaman əziz tutulur. Şəhidlərimizə, onların ailə üzvlərinə
olan qayğı həmişə yüksək səviyyədədir. Rayon rəhbərinin fəaliyyətə başladığı
ilk gündən şəhidlərimizin ailə üzvlərinə daim qayğı ilə yanaşması, şəhidlərimizin
uyuduğu qəbiristanlıqların, onların xatirəsinə ucaldılmış abidələrin,
parkların, bulaqların, xiyabanların abadlaşdırılması, yenilənməsi, əsaslı şəkildə
təmir edilməsi bunun bariz nümunəsidir. Şəhərin mərkəzində yerləşən Şəhidlər
xiyabanı, orada aparılan abadlıq işləri, ən əsası da şəhidlərimizin adı və şəkli
əks olunmuş lövhənin vurulması bu istiqamətdə görülən işlərin daha bir əyani
sübutudur. Bu gün
rayonumuza ayrı-ayrı dövlətlərdən gələn qonaqlar kədər və qürur yerimiz olan bu
müqəddəs məkana baş çəkir, memorial önünə tər çiçəklər düzür, igid
oğullarımızın şəkli əks olunmuş lövhə önündən keçərək əziz xatirələrini
ehtiramla yad edirlər. Rayonumuzda keçirilən tədbirlər öncə bu müqəddəs məkanı
ziyarətlə başlayır. Məktəblilər mütəmadi olaraq xiyabanda olur, rayonunun şəhidləri
haqqında ətraflı məlumatlar alır, onlarla bir daha qürur duyurlar. Çünki gələcək
nəsillərin vətənpərvər ruhda tərbiyə olunmasında bu cür ziyarətlərin böyük rolu
vardır. Qazax rayonunda torpaqlarımızın azadlığı uğrunda
canlarından keçmiş şəhidlərimizin doğum və anım günlərinin qeyd olunması da
artıq bir ənənə halını alıb. Hər bir Vətən oğlunun doğum və ya anım günündə Şəhidlər
xiyabanında ruhlarına dualar oxunur, göstərdikləri igidliklərdən söz açılır, əziz
xatirələri dərin ehtiramla yad olunur. Bütün bunlar bir daha onu göstərir
ki, şəhidlərimiz hər zaman qəlblərdə yaşayır. GOYEZEN.AZ saytının Vətən
uğrunda canından keçmiş, doğum və anım günü olan şəhidlərimizin əziz xatirələrini
yad edərək mütəmadi olaraq onlarla bağlı silsilə yazılar dərc etməsi isə artıq
bir ənənə halını alıb. Bu həftə də ənənəmizə sadiq qalıb doğum və anım
günü olan şəhidlərimizdən – Saleh Həsənovun, Kamal Kərimovun, Vahid Osmanovun, Fərman Əliyevin,
Şəmil Yunisovun, Polad Əhmədovun, Adil Sadiqinin, Mübariz Eyyubovun əziz
xatirələrini yad edirik. Həsənov Saleh Hüseyn oğlu Həsənov Saleh Hüseyn oğlu 14
oktyabr 1957-ci ildə Ermənistan Respublikasının İcevan rayonunun Ağkilsə kəndində
anadan olmuşdur. 23 aprel 1992-ci il tarixdə Qazax rayonunun Ağköynək kəndində
"Nohur” meşəsi deyilən ərazidə odun qırarkən minaya düşmüşdür. Evli idi. 1
övladı var. Mərhum Qarapapaq kənd qəbiristanlığında dəfn edilmişdir. Kərimov Kamal Əşrəf oğlu Kərimov Kamal Əşrəf oğlu 22
noyabr 1961-ci ildə Qazax rayonunun Yuxarı Salahlı kəndində anadan olmuşdur.
1969-cu ildə Yuxarı Salahlı kənd tam orta məktəbin birinci sinfinə daxil olmuş,
1979-cu ildə həmin məktəbi bitirmişdir. 14 oktyabr 1994-cü ildə Qarabağ döyüşlərində
şəhid olmuşdur. Ailəli idi. İki övladı var. Osmanov Vahid David oğlu Osmanov Vahid David oğlu 16
oktyabr 1965–ci ildə Qazax rayonunun Daş Salahlı kəndində anadan olmuşdur. 1973-1983-cü
illərdə Daş Salahlı kənd 2 nömrəli tam orta məktəbində təhsil almışdır. 1983-1984-cü
illərdə 156 saylı texniki peşə məktəbində təhsil almışdır. 1995-ci ilin mart
ayının 5-də xidməti vəzifəsini yerinə yetirərkən şəhid olmuşdur. Ailəli idi. İki
övladı var. Əliyev Fərman İbrahim oğlu Əliyev Fərman İbrahim oğlu 16
oktyabr 1969-cu ildə Qazax rayonunun Əli Bayramlı (hazırki Aslanbəyli) kəndində
anadan olmuşdur. 1976-cı ildə Əli Bayramlı kənd (hazırki Aslanbəyli) kənd tam
orta məktəbin birinci sinfinə getmiş, 1986-cı ildə həmin məktəbin onuncu sinfini
bitirmişdir. 1992-ci ildə Qazax rayon hərbi komissarlığı tərəfindən Azərbaycan
Ordusu sıralarına çağırılmışdır. 19 aprel 1993-cü ildə Vəlixan meşəsində döyüş
bölgəsində şəhid olmuşdur. Aslanbəyli kənd qəbiristanlığında dəfn olunmuşdur. Yunisov Şəmil Talıb oğlu Yunisov Şəmil Talıb oğlu 17
oktyabr 1972-ci ildə Qazax rayonunun Barxudarlı kəndində anadan olmuşdur. 9
iyun 1992-ci ildə Cəfərli kəndi ərazisində Qaraçal yüksəkliyində gedən döyüşdə
şəhid olmuşdur. Əhmədov Polad Məmməd oğlu Əhmədov Polad Məmməd oğlu 10
aprel 1972-ci ildə Quşçu Ayrım kəndində anadan olmuşdur. 1979-cu ildə Quşçu
Ayrım kənd tam orta məktəbin birinci sinfinə daxil olmuşdur. 1989-cu ildə həmin
məktəbi bitirmiş və ordu sıralarında xidmət keçmişdir. Əhmədov Polad Məmməd
oğlu 17 oktyabr 2004-cü ildə Quşçu Ayrım kəndində odun gətirən zaman erməni
silahlı qüvvələrinin açdığı atəş nəticəsində şəhid olmuşdur. Subay idi. Sadiqi Adil Rza oğlu Sadiqi
Adil Rza oğlu 18 oktyabr 1964–cü ildə Qazax rayonunun Hüseynbəyli kəndində
anadan olmuşdur. 1971-ci ildə Hüseynbəyli kənd tam orta məktəbin birinci sinfinə
daxil olmuş, 1979-cu ildə həmin məktəbin səkkizinci sinfini bitirmişdir. 1980-81-ci
illərdə Kosalar kənd tam orta məktəbin onuncu sinfini bitirib. 1991-ci ildə Azərbaycan
Ordusu sıralarına çağırılmışdır. 29 dekabr 1992-ci ildə Lələkənddə şəhid
olmuşdur. Ailəlidir, iki övladı var. Eyyubov Mübariz
Hidayət oğlu Eyyubov Mübariz Hidayət oğlu
20 oktyabr 1973-cü ildə Qazax rayonunun Daş Salahlı kəndində anadan olmuşdur. 1980-ci
ildə Daş Salahlı kənd 2 nömrəli tam orta məktəbin birinci sinfinə getmiş, 1991-ci
ildə həmin məktəbi bitirmişdir. 1992-ci ildə hərbi xidmətə getmişdir. 1993-cü
ildə aprel ayının 12–də Vəlixan meşəsi uğrunda gedən döyüşlərdə şəhid olmuşdur.
Subay idi.Şəhidlərimizi tanıyaq və
tanıdaq-----------
Facebook-da paylaş