YAP Qazax Rayon Təşkilatında 28 May – Respublika Gününə həsr olunmuş tədbir keçirilib
Bu gün Yeni Azərbaycan Partiyası (YAP) Qazax Rayon Təşkilatında
Azərbaycan Xalq Cümhuriyyətinin yaranmasının 101-ci ildönümü münasibətilə tədbir
keçirilib. Təşkilatın akt zalında keçirilən tədbirdə Qazax
Rayon İcra Hakimiyyəti başçısının birinci müavini Məmməd Alıyev, icra
aparatının məsul işçiləri, partiya fəalları, idarə, müəssisə və təşkilat rəhbərləri,
gənclər iştirak ediblər. YAP Qazax Rayon Təşkilatının sədri Həmid Pənahov tədbiri giriş sözü ilə açaraq bildirib ki, bu il may ayının 28-də müsəlman Şərqində
ilk parlamentli respublikanın – Azərbaycan Xalq Cümhuriyyətinin yaranmasının
101 ili tamam olur. Ötən il isə ölkə başçısı İlham Əliyevin müvafiq Sərəncamı
ilə 2018-ci il ölkəmizdə "Cümhuriyyət ili” elan edildi və Azərbaycan Xalq
Cümhuriyyətinin yaranmasının 100 illi təntənə ilə qeyd olundu. 1918-ci
il may ayının 28-də Azərbaycanın müstəqilliyini bəyan edən İstiqlal bəyannaməsi
qəbul edildi. Yeni qurulan Azərbaycan Xalq Cümhuriyyəti öz üzərinə götürdüyü
çətin tarixi vəzifəni imkanlarının ən son həddində çalışaraq şərəflə yerinə
yetirdi. Azərbaycanın ilk Parlamenti və Hökuməti, dövlət aparatı təşkil edildi,
ölkənin sərhədləri müəyyənləşdirildi, bayrağı, himni və gerbi yaradıldı, ana
dili dövlət dili elan edildi, dövlət quruculuğu sahəsində ciddi tədbirlər
həyata keçirildi. Ölkənin ərazi bütövlüyü və milli təhlükəsizliyi təmin edildi,
qısa müddətdə yüksək döyüş qabiliyyətli hərbi hissələr yaradıldı, milli
tələblərə və demokratik prinsiplərə uyğun dövlət orqanları quruldu, maarifin və
mədəniyyətin inkişafına xüsusi diqqət yetirildi, Azərbaycanın ilk universiteti
təsis olundu, təhsil milliləşdirildi, xalqın sonrakı illərdə mədəni yüksəlişi
üçün zəmin hazırlayan, ictimai fikir tarixi baxımından müstəsna əhəmiyyətli
işlər görüldü. Mövcudluğunun
ilk günlərindən xalq hakimiyyəti və insanların bərabərliyi prinsiplərinə
əsaslanan Azərbaycan Xalq Cümhuriyyəti bütün ölkə vətəndaşlarına eyni hüquqlar
verərək irqi, milli, dini, sinfi bərabərsizliyi ortadan qaldırdı. Cümhuriyyət
parlamentinin il yarımlıq fəaliyyəti boyunca qəbul etdiyi qanunlar milli
dövlətin müstəqilliyinin möhkəmləndirilməsinə, siyasi və iqtisadi inkişafa,
mədəniyyət və maarif sahələrində sürətli irəliləyişə imkan verdi. Azərbaycan
Xalq Cümhuriyyəti daim sülhsevər siyasət apararaq bütün dövlətlərlə qarşılıqlı
əməkdaşlıq əlaqələri yaratmağa və bir-birinin hüquqlarına hörmət prinsipləri
əsasında münasibətlər qurmağa cəhd göstərirdi. Dünya birliyi tərəfindən
tanınmış Xalq Cümhuriyyətinin fəaliyyəti sayəsində Azərbaycanın beynəlxalq
hüququn subyekti olması 1920-ci ilin aprel ayındakı bolşevik işğalından sonra
Azərbaycanın bir dövlət kimi dünyanın siyasi xəritəsindən silinməsinin
qarşısını aldı. Azərbaycan
Xalq Cümhuriyyəti təcavüzə məruz qaldığı üçün qarşıya qoyduğu məqsədlərə tam
müvəffəq ola bilmədən süquta uğrasa da, onun şüurlarda bərqərar etdiyi
müstəqillik ideyası unudulmadı. Azərbaycan xalqı ötən dövr ərzində milli
dövlətçilik atributlarının bir çoxunu qoruyub saxlaya bildi. Ümummilli lider
Heydər Əliyevin respublikada uğurla gerçəkləşdirdiyi siyasət xalqımızın
tarixi-mədəni yaddaşını özünə qaytararaq milli mənlik şüurunu inkişaf etdirdi,
azərbaycançılıq məfkurəsi işığında müstəqillik arzularının güclənməsi və yaxın
gələcəkdə yenidən həqiqətə çevrilməsinə zəmin yaratdı. 1991-ci
ildə müstəqilliyinin bərpasına nail olarkən müasir Azərbaycan Respublikası
özünün qədim dövlətçilik ənənələrinə sadiq qaldığını göstərdi, Xalq
Cümhuriyyətinin siyasi və mənəvi varisi olmaqla onun üçrəngli bayrağını,
gerbini, himnini qəbul etdi. Xalqımız Cümhuriyyətin istiqlalını dünyaya yaydığı
28 May gününü həmin vaxtdan Respublika Günü olaraq təntənə ilə qeyd edir.
Qazax Rayon İcra Hakimiyyəti başçısının birinci
müavini Məmməd Alıyev çıxış edərək vurğulayıb ki, Şərqdə ilk demokratik dövlət olan Azərbaycan
Xalq Cümhuriyyətinin yaranmasından artıq 101 il ötür. 28 may 1918-ci ildə öz
müstəqilliyini elan edən Azərbaycan dövləti mövcud olduğu 23 ay ərzində bir çox
tarixi əhəmiyyətli işlər həyata keçirdi. Azərbaycan Demokratik Respublikası
süquta uğrasa da 1918-ci ildə onun Azərbaycana əkdiyi müstəqillik toxumu XX əsrin
son on illiyində yenidən cücərib üzə çıxdı. 1991-ci il oktyabrın 18-də Azərbaycan
Respublikası Ali Sovetinin sessiyasında Azərbaycanın Dövlət Müstəqilliyi
haqqında Konstitusiya Aktı qəbul edildi. Beləliklə, XX əsrdə Azərbaycan ikinci
dəfə siyasi müstəqillik əldə etdi. Ulu öndər Heydər Əliyevin ikinci dəfə
hakimiyyətə qayıdışından sonra respublikamızın müstəqilliyi məhv olmaq təhlükəsindən
qurtuldu. M.Alıyev qeyd edib ki,
ulu öndərin dediyi kimi "Müstəqilliyi qazanmaq çətindir, amma onu qoruyub
saxlamaq isə ondan da çətindir” sözləri zamanın sınağından çıxdı. M.Alıyev qeyd edib ki, bu gün fəxrlə deyə bilərik ki, Azərbaycanın dövlət
müstəqilliyi bizim tarixi nailiyyətimizdir, ən böyük sərvətimizdir. Ümummilli
liderin sözləri ilə desək, "Azərbaycanın dövlət müstəqilliyi daimidir, əbədidir,
dönməzdir”. Ulu öndərin layiqli
davamçısı İlham Əliyev müstəqillik yolu ilə irəliləyən Azərbaycanı daha böyük
zirvələrə çatdırıb və ölkəmiz bütün dünyada güclü dövlət kimi tanınır. Sonra
YAP Qazax Rayon Təşkilatında məsləhətçi Polad Ağakişiyev, Bakı Dövlət Universiteti Qazax filialının tarix müəllimi
Ülviyyə Bayramova, YAP Qazax rayon təşkilatı İ.Qayıbov adına şəhər 3 saylı tam
orta məktəb ərazi ilk partiya təşkilatının sədri Tahirə Xasməmmədova, Qazax
Dövlət Sosial-İqtisadi Kollecinin müəllimi Tərlan Bədəlova, kollecin maliyyə
işi fakültəsinin I kurs tələbəsi Tutu
Qocayeva, N.Vəliyev adına şəhər 5
saylı tam orta məktəbin tarix müəllimi Nuriyyə Nuriyeva Azərbaycan Xalq
Cümhuriyyətinin yaranmasından, fəaliyyətindən, demokratik hüquq və azadlıqların
bərqərar olmasından ətraflı söz açaraq öz arzu və istəklərini bildiriblər. GOYEZEN.AZ
Facebook-da paylaş